“ماعنديش حاجة البسها” جملة روتينية طبيعية متكررة بتقولها كل بنت، بتصحى الصبح من النوم تفضل قاعدة سرحانة قدام الدولاب ساعة بالظبط، وكإنها بتتفرج على لوحة فنية، وفي الآخر تطلع بنتيجة واحدة وهي إنها ماعندهاش هدوم خالص ومحتاجة تشتري هدوم جديدة، في حين إن الدولاب هيكون بيقع من كتر الحاجات اللي فيه، والمفروض أنك تكذب عينيك وتصدق أن فعلًا مفيش حاجة تروح بيها الشغل ولا تروح بيها المناسبة السعيدة.
إزاي نحل مشكلة البنات الأزلية؟
مش عارفين هل ده شيء سيكولوجي بحت وفيه عمق وكده ملوش علاقة باللي بتمتلكه بالبنت ولا له علاقة بقلة التنظيم مش أكتر ولا أقل، خصوصًا أن معروف أن البنات بتشتري أضعاف ما بيشتري الولاد هدوم وعمرنا ما سمعنا ولد بيقول “ماعنديش حاجة أروح بيها” وإلا يحصل لك تهنيج مرة واحدة.
لو بصينا من قشور سيكولوجية هنلاقي أن في فئة من البنات بتعتبر أن اللبس عمومًا بيعبر عنهم وعن شخصيتهم وهما مين، على عكس الولد أي قطعتين أمشي بيهم حالي، وفيه جانب برضه من الضغط المجتمعي أو معايير الموضة أنها لازم تظهر بشكل معين وجديد فمينفعش تلبس حاجات راحت عليها.
وبرغم أنك هتلاقي معظم فيديوهات البلوجرز بتأكد على نفس المعلومة وهي إن “مفيش هدوم” ولكن أحيانًا بيقدموا حلول ولو بسيطة ممكن تساعد البنات اللي “ماعندهاش هدوم في الدولاب”
الحلول بتتخلص مش في إنك تعملي نفسك مش واخدة بالك وتشتري زي العادة ولكن الزتونة كلها في “التنظيم”.
- ترتيب الدولاب: السبب الأول اللي خلى بنات تلبس هدوم متكررة أكتر من مرة وبالتالي تحس أنها معندهاش هدوم هي إن الدولاب ببساطة مش متظبط، فحاولي تنسقي القطع اللي محتجاها وتشيلي القطع اللي مش بتفكري تلبسيها علشان الرؤية بالنسبة لك تبقى أوضح.
- القطع الأساسية: أتأكدي الأول أن موجود القع الأساسية اللي تقدري تطقمي عليها كل الهدوم زي الجينز والشيميز والبلوزات السادة والتيشرتات الأوفر سايز.
- الألوان المحايدة: في الأحذية أو الشنط أو الإيشاربات ضروري يبقى في الألوان المحايدة زي الأبيض والأسود والبني علشان تقدري بتسهولة تظبطيهم مع أطقم مختلفة.
- مبدأ القطعة الواحدة: اختاري قطعة واحدة وابني عليها باقي القطع اللي هتليق عليها، وحاولي في كل مرة تجددي من القطع دي أو تغيري في ألوانها حتى لو في حاجات بسيطة، ده هيطلع لك فكرة كذا طقم مبني على أساس قطعة واحدة.
- اللعب بالألوان: ممكن التفكير مايبقاش على أساس قطعة واحدة ولكن على أساس الألوان اللي هتتلبس وتشكلي الطقم على هذا النمط.
ممكن الحاجات دي تساعدك تكوني طقم جديد كل يوم ويمكن تقلل شوية من جملة “معنديش حاجة ألبسها”
آخر كلمة: ماتفوتوش قراءة: الحايك والطنطور: قطع أزياء تراثية ارتدتها نساء الوطن العربي