أزمات من سنة 2020 بيعيشها مطرب المهرجانات عمر كامل مع نقابة المهن الموسيقية وبتوصل للمنع والإيقاف، وبرغم إن الأزمات دي في أغلبها كانت بتتحل في اجتماعات للنقابة، لسه الأزمات “عرض مستمر”.
والنهارده أزمة جديدة بتضاف لتاريخ وقائع عمر كمال، بعد ما أصدرت نقابة المهن الموسيقية برئاسة الفنان مصطفى كامل في الساعات الأخيرة بيان عاجل، أكدت فيه إيقاف المطرب عمر كمال لحين انتهاء التحقيق معه.
بيان النقابة
“قررت نقابة المهن الموسيقية وقف التصريح السنوي للعضو عمر محمد كمال، لحين التحقيق معه” ده كل اللي اتقال في التصريح والنقابة ماوضحتش سبب الإيقاف لحد دلوقتي وليه هيتم التحقيق.
بس في كلام بيتقال إن القرار جيه بعد ما أنهى عمر كمال إحياء حفلات خارج مصر، والبعض أشاروا إنه بكده مالتزمش بطلب الحصول على التصريح الخاص بالغنا في الخارج قبل السفر، وإن ده هو القرار اللي ألزمته به النقابة بعد اجتماع عدد من المطربين مع النقيب مصطفى كامل.
وده فعلًا اللي أكده الدكتور أحمد أبو المجد، سكرتير عام نقابة المهن الموسيقية في تصريحات لمصراوي، وقال إنه ماحترمش قرارات النقابة اللي وافق على شروطها مؤخرًا.
وأضاف “إن في وقت وضع الضوابط لمؤدي الأغاني تم الاتفاق على عدم إحياء حفلات خارج مصر إلا بتواصلهم مع النقابة، وإعلامها بالسفر، ومكان الحفل، لإن الفنانين هما صورة مصر في الخارج” وختم كلامه إن للسبب ده تم إيقاف عمر كمال لإنه مابلغش النقابة بسفره خارج مصر.
مش المرة الأولى: أزمات عمر كمال مع نقابة المهن الموسيقية
سلسة من الأزمات بيعيشها عمر كمال مع نقابة المهن الموسيقية حتى قبل تولي الفنان مصطفى كامل النقابة، والعقوبات كانت بتوصل لحد الوقف والمنع من الغناء.
أزمة الـ “لايف”
وقت ظهوره في بث مباشر بيهاجم النقابة والفنان هاني شاكر بشكل غير لائق، واتقال إنه وقتها كان تحت تأثير الكحول، وقال بعض الدلالات غير الأخلاقية في الفيديو، وده وفقًا للمستشار القانوني لنقابة المهن الموسيقية علاء عامر، ووقتها قررت النقابة إيقافه لما بدر منه على مواقع التواصل الاجتماعي، وقالت “ترفض النقابة النيل والتلفظ على شخصه من أي طامح أو حالم بالنيل منه، حيث تاريخه ممتد ومثمر في الحفاظ على أصالة وريادة الأغنية المصرية”.
واقعة تمور وحليب
في 2 ديسمبر 2021، عمر كمال استبدل كلمات “أشرب خمور وحشيش” في أغنيته “بنت الجيران” لـ “تمور وحليب” بمشاركة حسن شاكوش في واحدة من حفلات موسم الرياض، وفسر السبب في التغيير وقال “أنا واقف على أرض طاهرة” وبعدها نقابة المهن الموسيقية برئاسة الفنان هاني شاكر قالت إن الفنان هاني شاكر طلب منه تغيير الكلمات قبل كده لخطورتها على القيم والأخلاق، وإنها هتترسخ في وجدان الأجيال اللي جاية، وبسببها النقابة أوقفته في فبراير 2020 بعد إحياء حفلة الفلانتين وغنى أغنية “بنت الجيران” زي ما هي من غير استبدال “خمور وحشيش” لإنها من المخالفات اللي بتتعارض مع شروط العضوية.
لفظ خارج
في 9 أغسطس 2021، اتعرض على لجنة التحقيقات بناءً على قرار مجلس الإدارة، للتحقيق في اللفظ الخارج اللي بدر منه في أحد الحفلات، ووقتها قال عمر كمال إن ده كان في إطار حفل خاص وقديم من سنة ونص في بإحدى الفيلات بمنطقة المريوطية.
عمر كمال في آخر ظهور له كتب على صفحته الرسمية على فيس بوك: “أنا عندي 11 مليون أخ وأخت على الصفحة، جمعتهم بتعب على مدار سنين بأغاني حلوة، وحلمت إني أوصل لهم.. فيه منهم كتير بيحبوني ومنهم كتير بينتقدوني ويشتموني، وأنا مش زعلان منهم وممكن يكون أنا السبب، لإني عملت حاجات في أول طريقي المفروض ماعملهاش، بس يمكن عملتها عشم فيكم إنكم تفرحوا معايا بها، وفي إشاعات طلعت أنا مليش ذنب فيها” وبقالي فترة مركز في الشغل وبس، والأيام الجاية مش هتسمعونى أو هتشوفونى غير في شغل وبس.. وأغانى كويسة محترمة تليق بكم”.
الجدير بالذكر، إن مصطفى كامل من وقت توليه المنصب من حوالي شهرين أصدر قرار بحضور مغنيين المهرجانات، وقال وقتها إن مفيش حاجة اسمها مطربين مهرجانات شعبية ووقتها أطلق شعبة اسمها “شعبة الأداء الصوتي” خاصة بهم، ووضع لها شروط وقال إن تصريحها بيتجدد كل ٣ شهور، وكانت من ضمن شروطها إن كلمات الاغنية تخضع لجهاز الرقابة، والالتزام بعدم إدراج أي كلمة تخدش الحياء، وشدد الفنان مصطفى كامل وقتها على وجوب تعهد المطربين بعدم مخالفة قوانين ولوائح النقابة والالتزام بالبنود، وده في حالة السفر للخارج للقيام بأعمال فنية.