على طريقة سارة حلمي: ليه نشتري لبس الشتا في الصيف؟

جملة غريبة ومش قادرين نستوعبها صح؟ إيه اللي جاب لبس الشتا في عز الحر اللي احنا فيه دلوقتي و بندورله على حلول تخفف حدته علينا وطرق نواجه بيها الحر، بس بطريقة تانية، إيه اللي يخلينا نفكر دلوقتي في وسط ده كله إننا نجيب لبس شتوي، اللي حتى مش هنقدر نقيسه في الجو ده، لكن لو فكرتم فيها، مميزات كتير تخلينا نشتري لبس شتوي في عز الصيف، وبنصايح من البلوجر سارة حلمي، تعالوا نشوف ليه ده يعتبر وقت مناسب لشوبينج لبس الشتا.

مميزات كتير تخلينا نفكر نشتري لبس الشتا من دلوقتي، زيّ إنه هيكون بأسعار مانتخيلهاش، توصل لنص تمنه تقريبًا، عكس الجنان اللي بنشوفه في أسعار اللبس الشتوي في الموسم بتاعه، بس كمان في حاجات لازم ناخد بالنا منها لو قررنا نشتري من كوليكشن اللبس الشتوي علشان نجيب أحسن قطع تناسب الموضات المختلفة وفرق الوقت بين الشراء في الصيف وفي الشتا.

من الأحسن، واحنا بنختار القطع من الكوليكشن، نحاول نختار basics نقدر نلبسها في أي وقت وماتكونش متحددة بموضة في وقت وبعدها لما نلبسها تبقى خلاص راحت عليها، علشان كمان ناخد بالنا إن اللبس اللي هنشتريه ده هنلبسه في الموسم اللي بعده، فالأحسن نجيب حاجات موضتها مابتبطلش.

عمومًا مش في اللبس بس، في ناس واخدة القاعدة دي وبتتعامل بيها، إنك تشتري الحاجات في غير الموسم بتاعها، لإن بيكون عليها عروض وخصومات مابتحصلش في الموسم بتاعها، زيّ إنك تشتري التكيف والمراوح في الشتا، وتشتري الدفاية والسخان في الصيف، وهكذا، ودي قاعدة تفكير عايزين نهتم بيها فعلًا في الفترة الجاية.

آخر كلمة: ماتفوتوش قراءة: رخيص_بس_شيك: تريند شرى اللبس من وكالة البلح

تعليقات
Loading...
Tweet
Share
Share
Pin