علشان تجيب فيلا بـ 100 مليون: شغلانات ماكنتش تتوقع إنها بتكسّب

علشان مرتبك في “سنة” يقدر يجيب لك فيلا في مراسي بـ 100 مليون جنيه، يبقى لازم دخلك الشهري يبقى مبلغ جميل كده، وهنفكر معاك في شغلانة تجيب لك الدخل الجميل ده، ومش اللي هييجوا في بالك لأ.. في شغل ممكن ماتتخيلش إنه بيجيب فلوس كتير كده، علشان كده هنخليك تعيد تفكير في تغيير وظيفتك اللي مرتب السنة فيها مايجيبش أستوديو في كوالالمبور. وسيبك من اللي يقول ذاكر واطلع كذا، تعالى احنا نقولك ذاكر واطلع إيه.

دكتور التجميل

فيلر وبوتكس وحكايات، وبتتجدد كمان كل شوية، ده غير الحاجات الأتقل وعمليات التجميل نفسها. لو حسبتها، هتشتري فيلا في المالديف كمان مش بس في مراسي، ويا سلام بقى لو أنت دكتور جامد وبتعمل الفيلر والبوتكس والتجميل لفنانات بقى.

وبالأرقام، في السعودية اتعملت إحصائية بتقول رواتبهم تتراوح ما بين 40 و48 ألف ريال شهريًا، ومتوسط راتب جراح التجميل في روسيا مثلًا بيتراوح ما بين 85-100 ألف روبل، والأرقام أعلى بكتير من مرتبات المتخصصين في مجالات تانية من الطب، ومن متوسط الراتب في البلد بشكل عام. أما في كوريا الجنوبية، جراحين التجميل هما الأكثر أجرًا، ورواتبهم هي الأعلى، فهي ما بين 2.9 و3.2 ملايين روبل. أما المتخصصين من أمريكا رواتبهم بتتراوح ما بين 40 ل50 ألف دولار شهريًا، وفي ألمانيا بتتراوح ما بين 800 ألف و1.2 مليون يورو.

المحامي

بالذات لو بتترافع في قضايا كبيرة من اللي بيكون التعويض فيها ملايين دي، بس لو اتكلمنا بجد، في إحصائية بتقول إن دخل المحاميين وصل لمعدل 112,530 دولار في 2014، ده كمان دخل المحامين الإداريين، مش المحامين اللي بيمسكوا قضايا جنائية لا، الإداريين اللي بيشتغلوا في شركات تجارية كبيرة وبيشرفوا على عقود وتعاملات تجارية، فتخيل بقى الباقي.

اعمل أغنية واحدة في حياتك تبقى تريند

اطلع مرة واحدة كده من غير ما يبقى حد عارفك، واعمل أغنية ويا سلام لو بفيديو كليب، ونزلها على اليوتيوب. لو حظك جامد وبقيت تريند والناس بتشوف الفيديو، هتفضل طول حياتك بتكسب من المشاهدات وتعيش على الأغنية دي وخلاص الناس ماتشوفكش بعدها، أنت عملت المصحلة وخلاص.

زيّ ديسباسيتو، مش ملايين مشاهدات، لا ده رقم مانعرفش نعده أصلًا. أغنية اتعملت ومش بس بقت تريند في بلدها لا في العالم كله، وأطلقوا عليها إنها الأغنية اللي شاهدها تلت سكان الأرض، شوف دول يجيبوا كام لما يبقوا أرباح بالفلوس.

اخترع برفان

اعمل أي تركيبة كده تطلعلك في الأخر برفان مش مهم ريحته عاملة ازاي، بس في التسويق بقى قول إنه من زهرة خشخاش نادرة موجودة فقط في بحيرات مالحة في ضواحي إندونيسيا، والعطر كمان معمول بكحول مصنوع مخصوص من مصانع طبية في أمستردام.

الفكرة جات لنا لما شوفنا برفان في موسوعة جينيس، وهو أغلى عطر في العالم واسمه Clive Christian No.1، سعر 30 مل منه 2،355 دولار أمريكي، وحقق الرقم القياسي لأغلى عطر (متاح للبيع) في العالم.

مدرب تنمية بشرية (لايف كوتش)

شغلانة جديدة حلوة قوي، شجع الناس وقول لهم كل حاجة هتبقى كويسة وبصوا لنص الكوباية المليان، وتشاور على الإيجابيات والفراشات اللي في الجو وكده، وتاخد فلوس كتير في الحصة الواحدة، وطبعًا كلنا محتاجين تشجيع وحد يقول لنا نكمل وكده، فهتكسب فلوس كتير.

فيديوهات تيك توك

ده بقى أي هلس ممكن يطلع تريند، ممكن تعمل فيديو بتقلي كفتة في أوضة النوم وتبقى تريند وتكسب منه ملايين، أو تقلد فيديوهات مضحكة، أو حتى تشغل أغنية وتغني معاها أوتعمل مشهد من فيلم في كام ثانية، وهتتفاجئ من كمية المشاهدات اللي ممكن تجيلك.

ولو فكرنا في أرباح تيك توك، في مقال اتنشر على bbc قال فيه “الغندور”، وده شاب فى التلاتينيات من عمره، قال إنه بيكسب من البيع بالعمولة فلوس بتتراوح ما بين 1000-3000 دولار شهريًا، لكن مش بيعتمد على تيك توك كمصدر للدخل لوحده.

رسام

ومش رسام عادي، لا خليك من نوعية اللي بيرسموا لوحات مش مفهومة، وسبحان الله بتتباع بملايين، لوحة من اللي كانت في مشهد لعادل إمام وهو بيحاول يفهمها، وشالها قلبها على الناحية التانية لعل وعسى يفهم المغزى منها، لكن لا حياة لمن تنادي. يمكن ده نوع فن مش فاهمينه؟ مش مهم، ادخل شخبط أي حاجة يمكن واحدة فيهم تتشهر وتتباع في مزاد بكام مليون دولار، زيّ اللوحة القماشية “بدون عنوان” للفنان بلينكي باليرمو، اللي اتباعت بـ 1.7 مليون دولار.

أخر كلمة: ماتفوتوش قراءة: الساحل الطيب والساحل الشرير: مقارنة أزلية بتتجدد كل صيف