ضمن الخدمات الحكومية الأونلاين.. تقدر تستخرج أوراقك في دقايق بعيد عن زحمة المصالح الحكومية

بواسطة نيره عبدالعزيز.

وسط إتخاذ إجراءات جديدة للحكومة بهدف التيسير على المواطنين وتقليل الزحمة والإتجاه نحو خطة إلكترونية شاملة تليق بخطة الدولة في التقدم، خدمات كتير دلوقتي تقدر تستفيد بيها في تخليص أوراقك أونلاين، زي استخراج شهادة ميلاد من خلال ماكينة مخصصة وبتستخرج الشهادة في دقيقة واحدة، كمان خدمات المرور اللي من خلالها تقدر تدفع مخالفاتك أونلاين، وكمان الحملة القومية للتوعية بأهمية السداد الإلكتروني من خلال ماكينة خاصة بتستخدم تقنية الـ QR code بدلاً من الدفع ببطاقة الائتمان، هنقدملكم تفاصيل عن كل خدمة فيهم علشان توفروا على نفسكم الوقت والمشاوير والزحمة.

خدمة استخراج شهادة الميلاد في دقيقة

وزارة الداخلية دلوقتي بتقدم خدمة استخراج شهادة الميلاد من خلال ماكينات مخصصة موجودة في أماكن كتير وتقدر منها تستخرج شهادة ميلادك بإجراءات بسيطة من غير ما تضطر تروح للسجل المدني في الزحمة والطوابير الكتير، بمجرد ما تدخل البيانات المطلوبة، وهي: رقم بطاقتك، رقم المصنع -وده موجود على البطاقة-، اسم الأم ثنائي، ورسوم دفع 50 جنيه، وفي خلال دقيقة الماكينة هتطلعلك شهادة ميلادك.

الماكينات متوفرة في أماكن كتير، منهم مطار القاهرة، ومطار شرم الشيخ، ومطار الغردقة، وسجل مدني العباسية، والماكينات متاحة 24 ساعة طول أيام الأسبوع.

مشروع ماكينات الأحوال المدنية الجديدة يعتبر في شكله المبدئي في المرحلة التجريبية، وبعدين هيتم تعميمه ونشره في اماكن أكتر تسهيلاً على المواطنين.

الحملة القومية للتوعية بأهمية السداد الإلكتروني

عن Jan Penninkhof

ودي حملة أطلقها البنك المركزي المصري، خلال جهود لنشر الدفع الإلكتروني وكمان تسهيل طرقه، الخدمة الجديدة بتستخدم من خلال رمز الإستجابة السريع “QR code” بهدف تسهيل عملية الشراء للعملاء والدفع للتجار من خلالها بواسطة ماكينة مخصصة بتكون متوفرة لدى التاجر، وكمان بتتميز بالسهولة والسرعة عن استخدام بطاقة الإئتمان.

الخدمة دي بتقدمها 7 بنوك وهما البنوك الحاصلة على تراخيص من البنك المركزي، وبتشمل: البنك الأهلي، بنك القاهرة، بنك مصر، البنك التجاري الدولي، البنك العربي الأفريقي الدولي، بنك قطر الوطني الأهلي، وبنك الأسكندرية.

علشان تفعل الخدمة دي، بتتوجه لبنك من البنوك المقدمة للخدمة وبشتشرك أولاً في خدمة المحفظة الذكية كشرط أساسي. وعلشان تشترك في خدمة المحفظة الذكية من أحد البنوك دي، من خلال زيارة أي فرع من فروع البنوك المقدمة للخدمة أو الاتصال بخدمة الخط الساخن، بيتم الاشتراك من خلال صورة الرقم القومي وربطها بخط الموبايل الخاصة بالعميل، بشرط متكونش مشترك في خدمة المحفظة في أي بنك تاني.

علشان تستخدم الـ QR code في الدفع لمشترياتك للتاجر بتقوم بفتح تطبيق المحفظة الذكية علي موبايلك، وبتختار طريقة الدفع QR code وبتقوم بعمل scan عن طريق كاميرا موبايلك للكود اللي بيظهر في الماكينة المخصصة لدي التاجر، وبتكتب بيانات العملية وقيمة الدفع والرقم السري، وبتضغط علي كلمة التأكيد، بعدها بيتم خصم المبلغ من حسابك في المحفظة.

مش بس كده، خدمات كتير بتقدمها الحكومة أونلاين، زي كمان خدمة مخالفات رخص القيادة اللي بتقدمها النيابة العامة، ومن خلالها تقدر تخلص مخالفاتك أونلاين من هنا.

آخر كلمة: إيه الخدمات اللي مستنيينها تبقى أونلاين؟

تعليقات
Loading...
Tweet
Share
Share
Pin