شريهان، الفنانة الجميلة وفراشة المسرح والتلفزيون رجعت للمسرح تاني بمسرحية “كوكو شانيل” اللي هيتم بثها علي منصة شاهد الإلكترونية بداية من أول أيام عيد الأضحي المبارك. المسرحية هي أول اعمالها المسرحية بعد غياب 30 سنة عن الساحة الفنية.
الفنانة الجميلة من مواليد محافظة القاهرة، 6 ديسمبر 1964، وعندها النهاردة 56 سنة. بدأت مشوارها الفني وهي عندها 4 سنين، وبقت نجمة مسرح وتلفزيون وسينما في وقت قصير جدًا. مشوارها الفني وقف في سنة 2002 بعد المرض اللي خلاها مقدرتش تكمل شغلها.
مشوار نجمة سرقت قلب الجماهير
أخر أعمال شريهان كانت مسرحية “شارع محمد علي” اللي قدمتها سنة 1991 وبعدها اختفت من علي الساحة الفنية بسبب الحادثة اللي اتعرضت لها والضغوط اللي تلت الحادثة دي.
الحادثة والمرض اللي عاشت معاهم فراشة الإستعراض لوقت طويل اخروا رجوعها للفن لمدة 30 سنة. ورغم انها مرت بعمليات جراحية وعلاجات طويلة ومرهقة لسنين كتير إلا إنها قدرت ترجعلنا مرة تانية وتسحرنا باستعراض مبهر في اعلان فودافون في رمضان 2021.
شريهان فنانة شاملة، برعت بشكل ملحوظ في السينما والتلفزيون والمسرح، بس شغلها في مجال الاستعراض هو اللي حققلها النجومية وحب الجمهور، بالذات بعد ما قدمت أول فوازير من بطولتها “فاطيمة وحليمة وكريمة” سنة 1984، وبعدها بقت محبوبة الجماهير اللي بيستنوا فوازيرها بفارغ الصبر. قدمت بعدها فوازير تاني زي ألف ليلة وليلة وحول العالم.
شريهان وكوكو شانيل
مسرحية “كوكو شانيل” من تأليف مدحت العدل، وإخراج هادي الباجوري. المسرحية اتصورت من تلات سنين وكان المفروض تتذاع علي التلفزيون مباشرة بس ده محصلش بسبب مشاكل في الإنتاج. المسرحية ضمن مشروع من 13 عمل مسرحي بيسلطوا الضوء علي 13 امرأة اثروا بشكل ايجابي علي التاريخ.
شريهان وربع دستة اشرار
من الجدير بالذكر ان أول اعمال شريهان المسرحية كانت سنة 1979 في مسرحية “ربع دستة اشرار”، واللي لعبت فيها دور البطولة مع ممثلين كبار زي ليلي طاهر ووحيد سيف وجمال اسماعيل واحمد سامي غنيم.