شخصيات نعرفها قاموا بدور أبلكيشنز قبل اختراعها

قبل وجود الأبلكيشنز والأجهزة اللي موجودة دلوقتي وبتسهل علينا حياتنا كان في شخصيات نعرفها، والحقيقة لسه موجودين يعني، بيقوموا بدور التطبيقات دي على أكمل وجه، فاحنا كمصريين مش متفاجئين يعني بالتطور التكنولوجي دلوقتي لإننا سبقناه، ودي شخصيات بنشوفها يوميًا في حياتنا كانوا هما الفكرة الأساسية لأكبر وأهم أبلكيشنز واختراعات إلكترونية دلوقتي.

الخاطبة – Dating Apps

على طريقة “وأنتوا رايحين كنا احنا راجعين” المصريين اخترعوا وظيفة كاملة لتوفيق راسين في الحلال، دلوقتي الاختراع بقى dating apps وبشكل أروش وكده، بس زمان كانت الخاطبة دي بتبقى عارفة المنطقة كلها ومين ابن مين والناس بتروحلها علشان تشوفلهم عروسة أو عريس.

“هو قالك فين” – Google Maps

الشخص الغريب اللي لما نتوه في الشارع بنسأله عن اسم الشارع أو أي حاجة، ويقولك “هو قالك فين” طب ما هو لو حد قالي أنا هبقى تايه وبسألك ليه؟ الحمدلله Google maps جيه ينقذنا من الشخص ده، مش أنقذنا أوي يعني بصراحة علشان برضه بنتوه.

البواب – Spy Apps

اللي بيراقب العمارة كلها والعمارات المجاورة كمان، أنت مين طالع معاك، جايب إيه وأنت طالع، صوتك لو عالي شوية فالبواب عارف كل تفاصيل حياتك، البواب سبق كل الـ Spy apps اللي في العالم، وممكن لحد دلوقتي يعلمهم كمان.

جدتك – ATM

دايمًا بتلحق حالتك المادية لما بتكرمشلك الفلوس في إيدك وتقولك ماتقولش لحد إني أديتلك فلوس، الحقيقة قبل اختراع الـ ATM اللي بينقذك في أي وقت وتسحب منه فلوس، وجدتك هتنقذك برضه في أي وقت حالتك المادية تبوظ.

الجارة الحشرية – News Apps

شيخة الحارة اللي عارفة كل كبيرة وصغيرة بتحصل في الشارع كله، وتنقل أخبار ده وده لده وده، والعكس، هتيجي تقولك أخبار عن الناس، وتقول أخبارك للناس، مستحيل يفوتها أي حدث، لو دلوقتي الـ News Apps بتعرف الخبر قبل حصوله، الحشرية دي بتعرفه قبل ما يحصل حتى.

آخر كلمة: ماتفوتوش قراءة: استغلال إنساني للتكنولوجيا: تطبيقات بتساعد ذوي الاحتياجات الخاصة بطرق مختلفة

تعليقات
Loading...
Tweet
Share
Share
Pin