دفن انشراح موسى، أشهر جاسوسة إسرائيلية في تل أبيب وسط دموع الحاخامات

توفت النهاردة الجاسوسة الإسرائيلية الأشهر انشراح موسى عن عمر 87 عام، بعد صراع طويل مع الإكتئاب، ودفنت على الشريعة اليهودية ووسط صلوات الحاخامات وكاميرات الإعلام الإسرائيلية اللي كانت بتحتفل بذكراها لمساهمتها في هزيمة مصر في نكسة 1967.

دخلت إسرائيل سيناء واحتلتها في يونيو 1967، ووسط الظروف دي كانت المخابرات الإسرائيلية بتشتغل بنشاط، وبتحاول تصطاد العملاء بسبب الضغوط المعيشية الصعبة وظروف الاحتلال، وبالفعل نجحت في تجنيد انشراح موسى وزوجها ابراهيم شاهين.

وكانت أول عمليات شاهين الجاسوسية هي الإبلاغ عن موقع فدائي مصري ونقل المعلومات الخاصة بنقطة الشرطة اللي تحت بيته في العريش لإسرائيل واستلم مقابل مادي يبلغ ألف دولار في الوقت اللي ماكانش معاه تمن علبة سجاير.

لما رجع شاهين لزوجته انشراح بالدولارات فرحت جدًا ولما قالها عن شغله في الجاسوسية اكدت له إنه لو ماعملش كده كان حد غيره هيعمله وياخد الفلوس، وطلبت كمان تساعده وتقابل الموساد، وتنضم لزوجها في الأعمال الجاسوسية.

أما عن تفاصيل تجنيد انشراح موسى أو “دينا بن دافيد” وزوجها وأولادها التلاتة للعمل كجواسيس لصالح الموساد الإسرائيلي فقال ابنها عادل أو “رافي”، الاسم اليهودي اللي اختاره أهله بعد انتقالهم لإسرائيل، خلال حوار له إن والدته ووالده، إبراهيم شاهين “بن دافيد” سافروا لمدينة بئر السبع الإسرائيلية وقابلوا ظابط الموساد أبو نعيم، وهناك تم تجنيدهم وتدريبهم على التقنيات الجاسوسية بعد ما ظابط الموساد اتأكد إنهم مخلصين لإسرائيل وتحت سيطرته بالكامل.

وأكد رافي إن اسم والدته هو انشراح علي مرسي مش موسى، وإنه على عكس اخواته التانيين اتصدم جدًا لما أهله قالوله إنهم جواسيس وقالهم إن اللي بيعملوه ده جريمة ولو مابطلوش هيبلغ عنهم، وأكد إنه بيحب مصر جدًا وكان عمره ما يشارك في حاجة زيّ دي.

عن: alwafd

انشراح موسى من مواليد المنيا سنة 1937، حصلت على الشهادة الإعدادية في 1957 وسافرت مع والدها للعريش علشان تحضر فرح وقابلت ابراهيم شاهين وربطت ما بينهم قصة حب هتنتج بعد كده أكبر شبكة تجسس إسرائيلية مكونة من أسرة مصرية.

كان شاهين بيتشغل عامل مكاتبات خلال فترة الحرب مع إسرائيل وكان بيحاول يبقى غني بكل الطرق وتم اتهامه في قضية رشوة في شغله بعد نكسة 67 واتسجن 3 شهور، وهي التهمة اللي قالت عليها انشراح إنها ملفقة وإن مديره لبسه القضية دي علشان كان عايز ينام معاها. وبعدها بدأ أول عملياته الجاسوسية بنقل كل المعلومات عن نقطة الشرطة اللي تحت بيته.

عمليات تجسس انشراح وجوزها كانت سبب في مقتل الفريق أول عبدالمنعم رياض بعد ما كشفت للجيش الإسرائيلي عن موقع وميعاد وصوله للجبهة المصرية يوم 9 مارس 1969، واللي كان سبب مباشر في تعرضه خلال وجوده في الخطوط الأمامية للجبهة خلال حرب الاستنزاف لهجوم مدفعي إسرائيلي مفاجئ واتضرب عليه الرصاص والقذائف، وأُصيب، وفارق الحياة قبل نقله للمستشفى.

 في 24 أغسطس 1974، وصلت انشراح لمطار القاهرة الدولي جايه من روما، ولما دخلت بيتها كان رجال المخابرات مستنينها بعد ما وصلوا لجوزها من خلال محاولته إرسال أول برقياته لرؤسائه في إسرائيل.

وقدرت المخابرات المصرية تلتقط الذبذبات من خلال اختراع سوفيتي وقتها، لما وصلت إلى منزلها وفتحت الباب لقت رجال المخابرات مستنينها فوقفت من غير أي حركة، وتبولت على نفسها لما واحد من ظباط المخابرات قرب منها وقالها “حمدلله على السلامة يا مدام دينا،” وهو الأسم الإسرائيلي اللي معروفة بيه في الموساد.

في أواخر الثمانينات استضافت الإذاعة الإسرائيلية دينا بن ديفيد، وصرحت بإنها فخورة باللي قدمته لإسرائيل وللشعب الإسرائيلي، ونشرت صحيفة يديعوت أحرونوت عام 1989 موضوع عن انشراح وأولادها قالت فيه: إن انشراح شاهين (دينا بن دافيد) عايشة مع اثنين من أولادها وسط إسرائيل وهما محمد وعادل، بعد ما اتحولت أسماءهم للعبرية وبقوا حاييم ورافي أما الابن الأكبر نبيل فغير اسمه ليوشي.

وتقول الصحيفة أن دينا بن دافيد بتشتغل عاملة في دورة مياه للسيدات في مدينة حيفا وفى أوقات الفراغ بتحلم ترجع تشتغل جاسوسة لإسرائيل في مصر!، وابنها حاييم بيشتغل حارس ليلي في مصنع، والابن الكبير ماتحملش الحياة في إسرائيل وهاجر هو وزوجته اليهودية لكندا وبيشتغل هو وزوجته في محل لغسل وتنظيف الملابس.

تمت محاكمة الخونة بتهمة التجسس لصالح إسرائيل وأصدرت المحكمة حكمها بإعدام إبراهيم وانشراح واتحكم على ابنه الكبير نبيل بالأشغال الشاقة ومحمد وعادل اتحطوا في إصلاحية الأحداث بسبب سنهم الصغير، واتنفذ حكم الإعدام بالشنق في إبراهيم شاهين بس، وتم الإفراج عن انشراح واولادها بعد تلات سنين في السجن في عملية تبادل للأسرى مع بعض أبطال حرب أكتوبر.

والجدير بالذكر إن اتعمل مسلسل بيحكي قصة انشراح موسى من بطولة اسعاد يونس ومدحت صالح واسم المسلسل هو “السقوط في بئر السبع”. وبعد خروجها من السجن ظهرت في لقاء تلفزيوني في برنامج “النادي الدولي” اللي كان بيقدمه سمير صبري وكانت بتظهر ندم على اللي بتعمله، لكن بعد كده سافرت مع أولادها اسرائيل ودخلت الديانة اليهودية، وماتت النهاردة واتدفنت على الشريعة اليهودية.

آخر كلمة: متفوتوش قراءة: إسرائيل تواصل تجريف المقبرة اليوسفية بالقدس، لبناء حديقة توراتية.

تعليقات
Loading...
Tweet
Share
Share
Pin