حلويات العيد بين المذاق الرائع والتنوع في دول المنطقة

0

واحدة من أحلى لحظات التجهيز للعيد هي شراء وتحضير حلوياته، وده لأن العيد مرتبط دايماً بالتجمعات العائلية والحلويات على اختلاف أصنافها وأشكالها في كل الدول العربية. وعلى الرغم من ظهور أنواع حلويات جديدة كل سنة إلا إن كل بلد ليها حلوياتها اللي بتميزها وبيتوارثها أهلها من جيل لجيل لمئات السنين، وكتير من الحلويات دي بتكون مخصوصة بمناسبة العيد وبيستنى أهل البلد من السنة للسنة علشان ياكلوها.

ولأننا مُعتزين بأصولنا العربية وبنحب عادات وتقاليد أهالينا، إحنا جمعنالكم قائمة بأشهر انواع حلويات العيد من مختلف الدول العربية، وكل سنة وانتم طيبين.

كحك العيد

بواسطة: رائج.كوم

الكحك هو الحلوى الأساسية اللي بياكلها المصريين في عيد الفطر، وهو من الحلويات اللي اتوارثوها عن أجدادهم الفراعنة ومكملة معاهم لحد دلوقتي. هو عبارة عن كعكات على شكل دائري بيتم رشها بسكر بودرة، وممكن تتاكل سادة أو جواها مكسرات أو عجوة.

ومع الكحك بياكل المصريين في العيد أنواع تانية من الحلويات زي بسكوت النشادر اللي نادراً ما بتلاقيه في أي مناسبة تانية غير العيد، والبيتيفور، والغريبة.

الكليجة

بواسطة: justfood.tv

الكليجة هي واحدة من أشهر الحلويات العراقية في عيد الفطر وعيد الأضحى، وهي نوع من المُعجنات بيشبه المعمول وبتكون محشية بالعجوة في أغلب الأوقات. الكليجة بتكون متعطرة بماء الورد، وبيتضافلها السمسم، وأغلب العراقيين بيعملوها في ليلة العيد وبكده بيكون البيت مليان بالروايح الحلوة بجانب بهجة قدوم العيد.

المعمول

بواسطة: لذيذة.كوم

المعمول مشهور بشكل كبير في بلاد الشام والسعودية، وبيتم عمله باستخدام قوالب خشبية لعمل أشكال متنوعة. وممكن يكون المعمول سادة أو محشو بالتمر أو المكسرات، وممكن يتضاف عليه السكر، ودائماً ما بيتقدم مع القهوة في الأعياد والمناسبات.

العصيدة

 وبالنسبة للمغرب، فالعصيدة هي أكلة صباحية بتتاكل في صباح العيد. هي عبارة عن طبق بيشبه بودنغ الأرز ولكنها بتتكون من الكسكس والزبدة والعسل وبعض التوابل.

العصيدة اليمنية

بواسطة: إفتي.نت

في اليمن العصيدة بتختلف عن المغرب، وده لأن مكوناتها عبارة عن دقيق قمح ودقيق ذرة وزبادي وعسل، وهي بتكون شبه الجيلي في شكلها النهائي وبياكلها اليمنيين مع القهوة قبل صلاة العيد. وهي مشهورة بردو في السعودية والإمارات وليبيا والسودان.

البقلاوة

بواسطة: طريقة.كوم

أخيراً وليس آخراً البقلاوة، وهي حلوى مقرمشة محبوبة في كل الدول العربية، وأصلها تركي. عادةً ما بتكون البقلاوة مصنوعة من طبقات من عجينة الباف المغطاة بالزبدة والفستق المفروم، وبيتمزج الفستق ده مع أنواع مكسرات تانية، وبتكون مرشوشة بالشربات.

آخر كلمة: أيه هو نوع الحلويات المفضل ليك؟

تعليقات
Loading...