5 طرق تقدر تستمتع بيهم بالعيد ده من راحة بيتك
العيد السنة دي غير أي عيد بسبب فيروس الكورونا وحظر التجوال اللي متطبق في معظم الدول العربية والعالم كله. حبسة البيت مش مديه طعم لأجواء العيد اللي كنا بنستناها من السنة للسنة، والموضوع مأثر على نفسيتنا كلنا. لكن بالرغم من كل السلبية دي، لازم نحاول نتمسك بالفرحة، ونحاول نتبسط بالحاجات الصغيرة حتى لو مش بنفس الشكل، عشان نحافظ على الروح الحلوة في وقت محتاجين فيه أمل أكتر من أي حاجة تانية.
دي حاجات تقدر تعملها في البيت مع الناس اللي بتحبها عشان تحافظ على روح عيد الفطر المبارك.
زيّن بيتك
عشان تدخل أجواء العيد بيتك تاني أول حاجة لازم تعملها هي إنك تبدأ تزين أركان بيت بزينة العيد، ممكن بشوية فيديوهات بسيطة على اليوتيوب أو شوية إرشادات على Pinterest، ممكن كمان تنزل صور جاهزة للعيد وتطبعها على ورق وتقطعها عشان تعمل أشكال زي اللي في الصورة دي. نشاط زي ده هيكون جميل لو أفراد العيلة عملوه مع بعض.
العدية
العدية من أهم طقوس العيد، والكل بيستناها سواء كبير أو صغير، حتى لو مبلغ رمزي، فمتنساش توزع عدية على الناس اللي بتحبها في العيد.
لعب مسلية
بدل ما تقضي العيد على تليفونك ممكن تختار شوية ألعاب مسلية سواء على Xbox أو Playstation، بس الأحلى من ده و اللي هيناسب الكل بغض النظر عن السن هي الألعاب الورقية زي الكوتشينة و Uno و الـ board games زي monopoly و sequence وبنك الحظ.
اشتروا لبعض هدايا
ممكن أفراد العيلة يعملوا Secret santa ويسحبوا أسماء ويجيبوا هدايا سرية لبعض، ومع الهدية ممكن يكتبوا رسالة صغيرة للشخص اللي هيستلم الهدية عشان يعبروا فيها ليهم عن حبهم.
أنشطة للكبار والصغيرين
ممكن تجيب كذا كتاب تلوين للأطفال وتساعدهم فيه أو تجيبوا ورق أبيض كبير وترسموا وتلونوا عليه سوا. نشاط زي ده هيقربكم من بعض.