حرب الصور والمقارنة: هل فعلًا في حكاية وراء كل صورة لريهام حجاج؟

من الطبيعي إن كل الناس سواء نجوم أو لأ بيعبروا عن مشاعرهم وبينشروا صور تهنئة ومباركة للناس اللي بيحبوهم على حساباتهم الخاصة بالسوشيال ميديا، ولكن الحظ، واختيار الصور كمان بيكون عامل أساسي بيتحدد على أساسه إذا كانت الصور دي هتعدي عادي كده على الجمهور، ولا الناس هتقف عندها وهتبدأ تحلل كل تفصيلة وتتوقع سيناريوهات ورا الصور المنشورة.. والفنانة ريهام حجاج، هي من أكتر الفنانات اللي بتتعرض صورها مع جوزها لانتقادات وهجوم كتير، وبيتعمل مقارنة مباشرة بينها وبين ياسمين عبدالعزيز.

ده بيرجع بسبب إن الفنانة ريهام حجاج اتجوزت من زوج ياسمين عبدالعزيز السابق رجل الأعمال محمد حلاوة. فبدأت حرب غير معلنة بين الفنانتين، زيّ ما الناس بتقول، باستخدام الصور.. فهل فعلًا تحليلات الناس حقيقية وإن كل صورة أو فيديو بتنشره ريهام على حسابها الشخصي، بيبقى بهدف الرد أو التعليق على قصة معينة؟ اللي خلانا نطرح الأسئلة دي دلوقتي، هو إن بعد ما نشرت ريهام حجاج مؤخرًا صورة مع زوجها بتهنئه فيه بعيد ميلاده، بدأ الجدل من تاني لما اتهامها بعض الناس إنها بتحاول تقلد صور ياسمين مع زوجها الحالي الفنان أحمد العوضي.

لتشابه الصورة وتقارب مناسبات الاحتفال بأعياد الميلاد، (عيد ميلاد العوضي في شهر ديسمبر، ومحمد حلاوة في شهر يناير)، بدأت لعبة الانتقادات والمقارنة تاخد مكانها، ففي اللي خد الصور بشكل ساخر، وقال تعليقات زيّ “براحة شوية وليه العنف ده”، وفي اللي كان حاد شوية وقال إن دي محاولة من ريهام علشان تقلد صورة ياسمين والعوضي، وإثبات إنهم مبسوطين في حياتهم مع بعض.. ولكن كان في كمان تعليقات إيجابية كتير من فنانين وجمهور بيتمنلهم السعادة والفرحة الدائمة.

دي ماكانتش أول مرة تحصل المقارنة دي، ولكن في عيد الحب السنة اللي فاتت، نشرت ياسمين صور لبوكيه ورد جالها، ومكتوب عليه بحبك، ولكن اللي خلى الكل يعتقد وقتها إن الورد من زوجها السابق، هو تعليق ياسمين على الستوري، بإفيه شهير من مسرحية العيال كبرت “ما تشوف جوزك يا اسماعيل بيه”، وقالت كمان “برضه لأ” وفيديو لأغنية أم كلثوم بتقول فيها قول للزمان ارجع يا زمان.. وتزامن مع ده نزلت ريهام صور ليها مع محمد حلاوة بمناسبة الفلانتين، وبعدها وصل الموضوع إن ريهام صورت فيديو مع جوزها وهو بيقول إنه مابعتش ورد غير لزوجته اللي بيحبها.. الحاجة اللي خلت كتير يقول إن كل صورة وفيديو بتحطه ريهام بيكون بسبب حكاية معينة بتحصل.

ومن الواضح إن لسه المقارنة اللي بين الفنانتين مابتنتهيش، فخلال مسلسل “ونحب تاني ليه” كان في مشهد معروف لما بطل المسلسل كريم فهمي بيكتب اسم ياسمين في المسلسل “غالية” على اليخت بتاعه.. وكانت ريهام ليها صورة على حسابها الشخصي واسم الدلع بتاعها مكتوب كمان على يخت، وده اللي خلى شوية من الناس يقولوا إن دي محاولة من ياسمين لتقليدها، وشوية تانيين كان ليهم رأي مختلف إن دي حركة دارجة، ولم يقصد التقليد.

وجنب كل ده، بتنشر ريهام صور كتير لزوجها بتعبر فيها عن فخرها بيه وحبها الشديد وسعادتها وهي معاه، ولكن دايمًا بتقابل النوع ده من منشوراتها بحدة من بعض الجمهور اللي بيقولوا إنها صور “مستفزة”، ولكن في البعض كمان اللي بيشوف إنها صور طبيعية جدًا من إنسانة بتعبر عن حبها لزوجها على طول، وإن ده حقها ومش لازم الناس تربطوا إطلاقًا بأي نوايا تانية غير إنها بتعبر لزوجها عن حبها وامتنانها لوجوده في حياتها، خصوصًا إنها قالت أكتر من مرة إنها ماكنتش السبب في الطلاق بين زوجها الحالي وياسمين، وبالتالي ده من حقها ومفيش أي حاجة تدعي للاستفزاز من صورهم.

آخر كلمة: ماتفوتوش قراءة: “قميص التعبير عن التحرش وهدى المفتي: إيه القصة وليه حصل جدل وهجوم عليهم؟“...

تعليقات
Loading...
Tweet
Share
Share
Pin