حاجات نفسنا ترجع: كرينجات أغاني ألفينات

من أغنية واحدة قديمة، خلتنا واحد ورا التاني نحس بحنين للفترة دي ولاقينا إننا بنغني الأغنية من غير ما نحس وحافظين كلماتها رغم إننا ماسمعناهاش من سنين كتير، وأغنية تجر التانية لقينا إننا عملنا ليستة كاملة لأغاني من فترة فاتت بس بنحن لها دلوقتي ونفسنا بشكل ما ترجع، بس مش كلها، واحنا معترفين إن معظمها يتصنف كرينجات يعني، بس الحنين مالوش تفسير. خلينا نبتدي بحاجة معظم اللي يفتكرها يحن ليها ويعترف إنها كانت فترة ذهبية في عصر الموسيقى في مصر وساهمت في تطور المشهد الموسيقي:

فري ميكس

مش أغنية ولا اتنين دي حقبة زمنية كاملة، بدايات بهاء سلطان، واكتشاف تامر وشيرين، وليه يا دنيا الواحد بيقرب من ناس بايعاه. نصر محروس عملنا تحفة فنية حقيقية عايشة لحد دلوقتي وهي اللي ساهمت في شهرة نجوم بنحبهم دلوقتي، واللي شيرين عبدالوهاب أخدت لقب شيرين أه يا ليل منه.

بدايات واما وأعضاء الفريق نفسهم

فريق واما اللي كان من أروش اللي موجودين وقتها، وبعدها شوفنا تجربة أعضاء الفريق كل واحد لوحده، واللي قدروا يحققوا فيها كمان نجاح مش بس مع بعض.

نجوم لمعوا وطفوا في وقت قصير

الفترة الذهبية دي كمان شهدت ولادة نجوم، للأسف اختفوا بعد فترة قصيرة رغم إن نجمهم لمع بسرعة والناس حبتهم، حابين نفتكر الفنان يوري مرقدي وكام أغنية له، منهم كرينجات ومنهم “حدا مش أنا” اللي لسه بنسمعها لحد دلوقتي.

ومن الكرينجات اللي كانت في بدايات يوري وأول طريقه الفني، تحفة فنية مانعرفش ازاي اتسكت عليها وقتها؛ شوفتي وصلتي بيا لفين غصب عني جرحت اتنين. آه والله.

أماني السويسي للأسف واحدة من النجوم دول، صوت جميل واختيار أغاني أجمل، وكمان اهتمت بتصوير فيديو كليب طلع بالجمال ده زيّ “وين” يوصل قلبك.

العصر الذهبي لعمرو دياب

الفترة اللي الكل بيحن لها، حتى لو من فانز عمرو دياب، لكن بشكل ما الأغاني دي بالذات كانت جزء من حياتنا، ولما تسمعها هتفتكر ذكريات مختلفة ولازم يبقى له معاهم ذكريات، حقيقي يعتبر العصر الذهبي لعمرو دياب من وجهة نظرنا المتواضعة.

وطبعًا كلنا عارفين الدبدبة في الأغنية دي، اللي كنا بنعتبرها اختبارات للسماعات وجودتها، وكل ما دبدبت أكتر كل ما بقيت أروش.

تألق عمرو مصطفى

ماينفعش ننسى فترة تألق عمرو مصطفى ساعتها، كملحن عمل أغاني كتير محفورة في ذاكرة الموسيقى، وكمان عمل أغاني بصوته وقتها كانت مكسرة الدنيا وبكليبات كانت قمة في الروشنة.

ومش بس في الأغاني الهيصة، كمان الأغاني الهادية، والعتاب:

أخر كلمة: ماتفوتوش قراءة: لطرق السفر الطويلة: ليستة أغاني مناسبة لكل مود

تعليقات
Loading...
Tweet
Share
Share
Pin