جوائز سكوب إمباير لمسلسلات رمضان 2022

بعد ما خلص موسم الدراما الرمضاني لسنة 2022، ظهرت قيمة كل المسلسلات الحقيقية بعد عرض أخر الحلقات، واتغيرت واختلفت أراء كتير في مسلسلات رمضان بعد ما اتفرجوا على النهاية. وعلشان موسم الدراما الرمضاني هو واحد من أهم مواسم الميديا العربية، قررنا نقدم جوائز سكوب إمباير للأعمال الدرامية الخاصة برمضان.

بطلوع الروح: جائزة أكتر مسلسل مثير للجدل

المسلسل من تأليف محمد هشام عبية ومن إخراج كاملة أبو ذكري. واشتغل عليه مجموعة من نجوم التمثيل العرب العمالقة زيّ منة شلبي وإلهام شاهين وأحمد صلاح السعدني ودياموند بو عبود.

وبيحكي المسلسل عن دولة داعش المتطرفة اللي نشرت الرعب في دول عربية كتير خلال السنين اللي فاتت، وبتدور الأحداث في إطار قصة “روح”، اللي بتلعب دورها منة شلبي، اللي بيضحك عليها جوزها وياخدها من مصر لواحد من مراكز داعش في سوريا، ولما تحاول روح تهرب بتلاقي نفسها في معكسر للهاربات من التنظيم، وتتحول مجرد محاولة الرجوع لمصر لحلم شبه مستحيل.

مثال مختصر عن الجدل اللي حصل بخصوص المسلسل في الثريد ده

وعلى مدار حلقات المسلسل اتقلبت عليه السوشيال ميديا، ما بين مؤيد لتركيب المسلسل الدرامي والرافض، وما بين ناس بتنتقد الطريقة اللي صور بها المسلسل داعش وناس تانية شايفة إن ده التصوير الأدق للناس المتطرفة دي.

وعلشان الجدل الكبير اللي المسلسل سببه ولسه مستمر لحد النهارده، قررنا ندي المسلسل جايزة أكتر مسلسل مثير للجدل في رمضان 2022.

الكبير أوي 6: جائزة أحسن comeback

المسلسل من تأليف أحمد صقر، وإخراج أحمد الجندي، ومن بطولة أحمد مكي ورحمة أحمد ومحمد سلام وبيومي فؤاد.

بعد خمس مواسم من مسلسل “الكبير أوي”، قلت شعبية المسلسل بشكل كبير، ولكن لما رجع أحمد مكي بالموسم الـ 6 عمل قلبان بين الشعوب العربية اللي حبت المسلسل جدًا، وبدأت ميمز المسلسل تنتشر في كل حتة على السوشيال ميديا.

وسبب النجاح المبهر للمسلسل هو الحفاظ على الشخصيات القديمة بنفس كاريزمتها وأهميتها الدرامية، وبعد كده الوجوه الجديدة اللي قدمها المسلسل زيّ الممثلة رحمة أحمد اللي عملت دور “مربوحة” ومصطفى غريب “العترة” واللي أسروا قلوب المشاهدين على طول وأثبتوا إنهم ممثلين وكوميديانيين شاطرين.

وعلشان القلبان اللي عمله الموسم الـ 6 من الكبير أوي وعلشان رجع يتصدر الموسم الرمضاني بعد ما تراجعت جودة المواسم اللي فاتت، قررنا نديله جايزة أحسن comeback.

مين قال: جائزة أكتر مسلسل قدم وجوه شابة

المسلسل من تأليف عبدالعزيز النجار، ومجدي أمين، ومنى الشيمي، ومن إخراج نادين خان. ومن بطولة جمال سليمان ومجموعة كبيرة من الوجوه الشابة زيّ أحمد داش وإلهام صفي الدين ومحمد زيزو وهنا داود وأميرة أديب وغيرهم.

المسلسل بيناقش قضية اختلاف الأجيال والمشاكل اللي بيعاني منها المراهقين في المجتمع المصري من خلال قصص عائلية بسيطة ولكن مشحونة بانعكاسات اجتماعية مهمة.

وعلشان قدر المسلسل يقدم مجموعة كبيرة من الوجوه الشابة من المراهقين اللي بيشكلوا الجيل الجديد من الفنانين العرب، فالمسلسل يستحق عن جدارة جائزة أكتر مسلسل قدم وجوه شابة في رمضان 2022.

مسلسل سوتس بالعربي: جائزة أحسن كتابة مُعدلة إلى الثقافة المصرية

المسلسل من تأليف محمد حفظي وياسر عبدالمجيد ومحمد جلال، ومن إخراج عصام عبدالحميد وشريف عاشور وطارق زهران. وقام ببطولة المسلسل مجموعة كبيرة من النجوم منهم آسر ياسين وأحمد داود وصبا مبارك وريم مصطفى ومحمد شاهين وتارا عماد وهدى المفتي.

وبتدور أحداث المسلسل في إطار من الدراما عن قصة آدم اللي بيتحول لمحامي بالصدفة ويلاقي نفسه بيشتغل في شركة محاماة كبيرة، ولما يكشف سره للمحامي زين، يتعاونوا مع بعض في حل قضايا صعبة.

المسلسل هو النسخة العربية من مسلسل أمريكي بنفس التسم Suits، ورغم إن المسلسل العربي استخدم نفس القصة بنفس الأحداث، إلا إن كتابة المسلسل المعدلة اللي خلت القصة والأحداث والشخصيات أقرب للثقافة المصرية كانت جميلة جدًا. وعلشان كده يستاهل المسلسل جائزة أحسن كتابة مُعدلة إلى الثقافة المصرية.

فاتن أمل حربي: جائزة قضايا المرأة

المسلسل من تأليف إبراهيم عيسى ومن إخراج محمد العدل، وشارك في البطولة نخبة من نجوم مصر زيّ نيللي كريم وشريف سلامة وهالة صدقي وفادية عبدالغني ومحمد الشرنوبي.

المسلسل بيحكي قصة فاتن الموظفة البسيطة في الشهر العقاري واللي عايشة مع زوج بيعنفها ومخلي حياتها جحيم، فلما تقرر تطلق منه تلاقي نفسها في دوامة محاكم الأسرة وقضايا الطلاق والنفقة والولاية التعليمية، وبعد ما تكتشف إن القانون في صالح جوزها تقرر ترفع قضية على قانون الأحوال الشخصية ذات نفسه.

المسلسل ناقش مجموعة كبيرة من القضايا اللي بتهم المرأة في المجتمع المصري، سواء من التعنيف والإساءة والتحرش الجنسي لأزمات الطلاق وضياع الحقوق في المحاكم، وعلشان شجاعة المسلسل في مناقشة القضايا الحساسة دي قررنا ندي المسلسل جائزة قضايا المرأة.

جزيرة غمام: جائزة أكتر مسلسل مهدور حقه

رمضان 2022
عن: .elaosboa

المسلسل من تأليف عبدالرحيم كمال ومن إخراج المنباوي، ومن بطولة مجموعة من الفنانين زيّ مي عز الدين وأحمد أمين وطارق لطفي ووفاء عامر وفتحي عبدالوهاب ومحمد جمعة.

في جزيرة غمام يظهر واحد اسمه خلدون ومعاه العايقة الغجرية في محاولة للسيطرة على أهل الجزيرة بسبب اعتقادهم إن في كنز وسر كبير ماحدش يعرف عنه حاجة في الجزيرة، وفي محاولات السيطرة على الجزيرة يظهر الاعتراض من جانب عرفات والعجمي ومحارب.

في أول أيام رمضان ماكانش حد بيسمع عن المسلسل خالص لحد ما بدأت الناس تتكلم عن المناظر الجميلة اللي في مشاهد المسلسل والألوان والإخراج والقصة والتمثيل وقد إيه المسلسل يعتبر عمل فني متكامل.

وعلشان المسلسل ماخدش حقه ما بين أعمال رمضان 2022، قررنا نديه جائزة أكتر مسلسل مهدور حقه.

إيه رأيك في مسلسلات رمضان السنة دي؟ اتفرجت على إيه وإيه أكتر مسلسل عجبك؟ وهل متفق معانا على الجوائز اللي أديناها للمسلسلات اللي فوق دي؟

أخر كلمة: ماتفوتوش قراءة: فاتن أمل حربي: 8 أسباب ليه لازم نتابع مسلسل نيللي كريم الجديد

تعليقات
Loading...
Tweet
Share
Share
Pin