جدل كبير في مصر على تعيين بكاري جاساما حكم لماتش مصر والكاميرون

بواسطة: رحمة حجاج

الاتحاد المصري لكرة القدم قدم شكوى رسمية للاتحاد الأفريقي بعد تعيين الجامبي بكاري جاساما حكم لماتش مصر والكاميرون في نص نهائي كأس أمم أفريقيا. الاتحاد المصري لكرة القدم والشعب المصري اعترض على الحكم بكاري جاساما لإن في قلق إنه يبقى متحيز للكاميرون بسبب وقائع سابقة حصلت منه مع المنتخب المصري والفرق المصرية ومنتخبات تانية كمان. واعتراضات الشعب المصري ظهرت بشكل كبير على السوشيال ميديا بعد قرار الاتحاد الأفريقي إن بكاري جاساما يكون هو الحكم في ماتش مصر والكاميرون.

وقال عضو في مجلس إدارة اتحاد كرة القدم المصري محمد أبو الوفا، إنه حتى بعد تقديم شكوى للاتحاد الأفريقي فهو عارف إن برضه مش هيتم تغيير الحكم. أما بالنسبة لرد مدير الاتصالات بالاتحاد الجامبي لكرة القدم بوبكار كامارا على الاتهامات اللي توجهت للحكم بكاري جاساما، إن هو مش عارف إيه سبب الاعتراضات دي وإن هو شايفه من أحسن الحكام في العالم دلوقتي وإنه معروف بسمعته الكويسة.

وقال: “نطمئن الجميع أنه سيقدم مستوى يليق بالمباراة.” أما عن الاتحاد الأفريقي، فقال بعد ما الاتحاد المصري قدم الشكوى إن مش هيتم تغيير الحكم. ووعد المنتخب المصري إن الحكم الجامبي هيدير الماتش بكل هدوء وبشكل احترافي. ويذكر إن بكاري جاساما كان هو الحكم في ماتش مصر ونيجيريا في دور المجموعات.

عن: eremnews

من المواقف اللي حصلت قبل كده مع الفرق المصرية اللي بسببها بيبقى في قلق لما بكاري جاساما يتولى تحكيم أي ماتش تكون مصر طرف فيه، هو إنه لغى هدف صحيح للنادي الأهلي في ربع نهائي بطولة دورى أبطال أفريقيا ٢٠١٧ لما كانوا بيلعبوا ضد صن داونز.

وفي ماتش مالي وغينيا الاستوائية في دور الربع نهائي في بطولة كأس أمم أفريقيا اللي بتتلعب دلوقتي في الكاميرون كان فيها جدل كبير جدًا على قراراته التحكيمية. وكان خلال الماتش ده، جاساما ماطردش لاعب غينيا الاستوائية بيكورو رغم إنه تسبب في تدخل عنيف جدًا على اللاعب كامارا.

مش بس كده، هو كمان ماحسبش ضربة جزاء للمنتخب المالي في أخر دقائق للماتش رغم إن كان في لمس واضح للكرة باليد من مدافع غينيا الاستوائية كوكو.

آخر كلمة: هل بكاري جاساما هيكون محايد خلال ماتش مصر والكاميرون في نص نهائي كأس أمم أفريقيا ولا هنشوف قرارات مثيرة للجدل؟ وماتفوتوش قراءة: غضب بسبب صورة للعيبة منتخب مصر وهما بيعملوا استشفاء عضلي في برميل مياه!

تعليقات
Loading...
Tweet
Share
Share
Pin