تكرار بدون إبداع .. ده حال البرامج لسنة 2021

زيّ كل سنة متعودين على مجموعة من برامج رمضان واللي تقريبًا بتبقى هي هي اللي بنشوفها كل سنة مابتتغيرش، سواء في المحتوى أو الأهداف أو حتى النجوم اللي بيستضفوهم هما برضه! علشان كده جبنالكم قايمة من البرامج اللي فضلت ماشية على نفس الوتيرة لمواسم كتير، بتكرار بدون إبداع.

رامز عقله طار

ناس كتير من الجماهير ومتابعين برامج رمضان مش عارفين هو ليه لسه مستمر لحد دلوقتي في المحتوى ده أو ليه في تكرار مستمر، حتى مش عارفين عايز يوصل لإيه، على طول بنسمع إنه بيضحك علينا واحنا عارفين إنه بيضحك حتى الضيوف عارفين، وبرضه مستمرين وبرضه لسه بنتفرج ولسه بيتصدر التريندات! ماننكرش طبعًا إن رامز جلال بيتمتع بموهبة استثنائية في التمثيل، وعنده حضور عالى وده باين من تقديمه للبرنامج والجو اللي بيعمله.

ولكن شوفنا ناس كتير برضه يتقول إنه لو استغل كل إمكانياته وطور من المحتوى اللي بيقدمه، نعتقد هيفرق كتير والبرنامج هيبقى في حتة تانية خالص، خصوصًا إن البرنامج ابتدا تقل شعبيته، عشر سنين كتير برضه على تقديم نفس المحتوى.

نفتكر إن رامز كان عامل برنامج “رامز حول العالم” كذا جزء قبل ما يعمل المقالب، وكان برنامج مميز ومختلف، نتمنى يعمل حاجة زيَ دي تاني.

شيخ الحارة

تفاصيل الموسم الثالث لـ برنامج "شيخ الحارة" - E3lam.Com
عن: إعلام

شوفنا ناس كتير بتقول إن البرنامج ماحاولش يقدم أي جديد في المحتوى على مدار المواسم بتاعته، يمكن الحاجة الوحيدة اللي غيرها هى المذيعة، جابو إيناس الدغيدي بدل بسمة وهبة، البرنامج في معظم الأوقات بيتعمد يضغط على الضيف بأسئلة غير متوقعة، مابقاش غريب الموضوع ده علشان يحقق التريند ويجمع عدد المشاهدات.

خمس نجوم

برنامج بيقدمه خمس نجوم بيعملوا مقالب في نجوم تانيين، واللي شوفنا تعليقات عليه برضه من الجمهور إن مفيش أي إضافة لمحتوى البرامج اللي موجود على الساحة، أو بمعنى أصح كان ممكن يتعمل بشكل تاني خفيف ولذيذ، بس ماننكرش إنه عامل مشاهدات عالية علشان كل يوم مقلب غير اليوم اللي قبله فالناس عندها فضول للمقلب الجديد اللي هيتعمل الحلقة اللي جاية ومع مين من النجوم.

آخر كلمة: ماتفوتوش قراءة: نجوم الراديو: 13 مسلسل إذاعي هيتعرض في سباق رمضان 2021

تعليقات
Loading...
Tweet
Share
Share
Pin