في حوار مع برنامج قعدة ستات اللي بتقدمه الإعلامية مروة صبري على شاشة القاهرة اليوم، كل يوم سبت، كشفت الراقصة المصرية صفوة تفاصيل طلاقها، اللي وضحت إنها مرت خلاله بحالة اكتئاب حادة سببت تساقط شعرها بالكامل. قالت صفوة خلال اللقاء التلفزيوني: “أنا اتطلقت من جوزي 3 مرات، ومرتين لأسباب لا داعي لذكرها”.
وأضافت: “آخر طلقة جالي اكتئاب وشعري وقع وبقيت أركب بواريك لدرجة مفيش شعر أركب فيه بنس الباروكة، منهم فيلم الرغبة ساعتها كنت لابسة باروكة وناس كتبوا إني مش هشتغل تاني وبمر بفترة اكتئاب”.
اتكلمت صفوة عن صعوبات مهنة الرقص الشرقي وقالت: “الرقص مهنة صعبة لأن الراقصة بتشتغل مع أكتر من 40 راجل، ولكني اعتزلته من 14 سنة وبذلت مجهود كبير علشان أثبت نفسي في التمثيل وأمحي لقب راقصة، لإن كلمة راقصة المجتمع مش بيقبلها وخاصًة لو مجتمع شرقي، على الرغم من إني كنت بكسب كتير من الرقص”.
ووضحت صفوة: “الراقصات المحترمات أصبحوا قليلين، منهم بوسي، ودنيا، وفيفي عبده ودول فنانات وراقصات محترمات وفوق دماغي، ولكن مع الأسف شغلهم أصبح أقل، ومن 10 سنوات ظهر العديد من الراقصات زي صافيناز، وكل ما العري زاد كل ما الراقصة بتكبر”.
واتكلمت الراقصة المصرية عن علاقتها بجوزها التالت اللي كان سبب رئيسي في دخولها السجن، بعد ما حبته لدرجة كبيرة، ووضحت إنها اتمنت لو الجوازة استمرت، وقالت: “جوزي سرق فلوسي ودخلني السجن علشان أنا حمارة، ومش أنا لوحدي بقول كده في ستات سامعين كلامي، وبيقولوا نفس الكلام، هو عمل كده برغم إنه كان بيعمل حاجات كويسة جدًا معايا ومع أهلي كمان، ومخي ساعتها ماكانش قادر يستوعب إن الخير اللي كان بيعمله مني أنا”.
وأضافت: “لما كان حد بيقول على جوزي إنه مش كويس وشوفي مستقبلك ماكنتش بصدقهم، وأعمل لمستقبلي، وأنا كنت بالنسبة له الفرخة اللي بتبيض دهب، وأنا عمري ما كنت بفكر وراه، وماكنتش مستوعبة إنه بيصرف من فلوسي”.
اتعودت صفوة تسبب جدال كبير بتصريحاتها في البرامج الحوارية، وبتظهر كل فترة والتانية وبيتم تداول تصريحاتها. وفي النهاية نتمنى لصفوة راحة البال وتقدر تعدي مرحلة الاكتئاب اللي هي بتمر بها.