مؤخرًا، حصلت واقعة بسبب كلب بيتبول شرس بيتربى في بيت في مصر، هجم على جار صاحبه واتسبب له في أزمة صحية وصلته لغيبوبة وجروح وإصابات بالغة، من غير ما يكون في أي سابق تعامل بين المصاب والكلب، والقضية حاليًا شغالة وتم القبض على صاحب الكلب. وده فتح مجال المناقشة عن تربية الكلاب في البيوت وكونها حيوانات أليفة صديقة للإنسان، ولا ممكن تكون مفترسة في بعض الحالات.
فصيلة البيتبول
الدكتور شهاب الدين عبد الحميد، رئيس جمعية الرفق بالحيوان بالقاهرة، صرح إن في بعض الجهات في مصر بتدرب الكلاب، وكل دورها تشريسها بهدف الدفاع عن صاحب الكلب، وخاصة البيتبول.
وقال: “لا بد من صدور تشريع من مجلس النواب يمنع تواجد هذه الكلاب في البلاد من الأساس، لأنه في مصر بيتم استخدام هذا النوع من الكلاب بطريقة خطأ، حيث يستطيع قتل الإنسان”.
وأكد على وجود قانون بيخص الكلاب، بيفرض ضوابط لخروج الكلاب في الشارع مع مالكه، ومنها ارتداء كمامة معينة، وتقييده بحبل بمواصفات معينة.
مقترح برلماني بمنع استيراد كلب البيتبول في مصر
أعلنت آمال عبد الحميد عضو مجلس النواب، تقدمها بمقترح برلماني للمستشار حنفي جبالي رئيس المجلس، موجه إلى رئيس الوزراء ووزير الزراعة، لإصدار قرار وزاري بمنع استيراد ودخول كلاب من سلالة (البيتبول) لمصر، واعتبار اقتنائها وحيازتها جريمة.
وعلقت على الواقعة الشهيرة وقالت: “تلك الواقعة ليست الأولى ولن تكون الأخيرة بطبيعة الحال، ما لم يكن هناك قرار حاسم تجاه هذا الأمر، فسبق وتعرض طفل إلى عقر من كلب يمتلكه أحد سكان التجمع الخامس، وكذلك شهدت مدينة الرحاب بحي التجمع بالقاهرة واقعة مماثلة في عام 2019، تعرض الضحية لتشوهات في الوجه والجسد”.
جدير بالذكر، إن الإمارات منعت استيراد النوع ده من الكلاب وفقًا للقرار الوزاري (348) لسنة 2008، وأرجعت سبب المنع لسلوكياتها العدائية، حفاظًا على حياة مواطنيها من الأذى.
حالات العقر بدأت تتزايد بنسبة 20%
وزير الصحة المصري خالد عبد الغفار، قال في تصريحات حديثة له: “حالات العقر (العض) المسجلة خلال الأعوام الماضية بدأت تتزايد بنسبة 20 في المائة سنويًا، وأثناء فترة كورونا تضاءلت نسبة العقر لكنها عادت للزيادة عام 2022”.
ازاي نربي كلاب أليفة من غير ما نؤذي حد
زي ما ذكرنا، بالفعل مصر فيها قانون بيخص الكلاب، بيفرض ضوابط لخروج الكلاب في الشارع مع مالكه، ومنها ارتداء كمامة معينة، وتقييده بحبل بمواصفات معينة، ودي مش مجرد لوائح وقواعد، لكن لو التزم بها أصحاب الكلاب وقدروا يسيطروا على الكلاب اللي بيربوها، أكيد هتفرق.
مش كل الناس بتحب الحيوانات، ولو شخص بيخاف من الكلاب الموضوع هيكون مرعب، ولو رجعنا بصينا على الواقعة الأخيرة، زوجة المصاب أكدت على إنه مش بيخاف من الكلاب ومتعود يتعامل معاهم عادي، لكن الكلب برضه افترسه بدون سابق إنذار، ما بالك لو شخص بيخاف من الكلاب؟
قواعد تربية الكلاب
أيًا كان نوع الكلب اللي بتربيه -باستثناء الكلاب اللي من فصائل شرسة- أكيد قبل ما تجيب الكلب هتبقى عارف إنه روح مسؤولة منك، وعارف كمان هتتعامل معاه ازاي حتى لو مجرد كلب حجمه في حجم قطة صغيرة، والطرق دي موجودة حتى في أبلكيشن على الموبايل بيعلمك ازاي تعود الكلب على أوامر منك، وازاي يسمع كلامك وازاي تسيطر عليه وما إلى آخره، وفي أماكن كتير لتعديل سلوك الكلاب، تقدر تستعين بهم لو في أي لحظة حسيت إن الكلب بتاعك بيصدر منه سلوك عدواني، بيقدروا بطرق متخصصة وعلمية إنهم يعدلوا سلوك الكلب.