معروف دايمًا عند الشعوب إن أي مناسبة لازم تبقى مربوطة بالأكل، سواء مناسبة حلوة أو وحشة وفرح أو حتى عزا! شيء أساسي ومقدس بيشاركنا كل لحظاتنا، وبمناسبة إننا خلاص على مشارف نهاية السنة دي، سنة 2021 واحنا بنحتفل بنهايتها وبما إن الديك الرومي أكلة من الأكلات الأساسية اللي لازم تبقى محطوطة على السفرة في ليلة الكريسماس، ولكن في ناس مش بتقدر أو بتلحق تعمله، وعلشان كده جمعنا لكم مجموعة من الأطباق والأكلات اللي نقدر ناكلها بعد الصيام الطويل ونبسط بطننا.
أرز بالخلطة
من الأكلات المحببة عند الكبار والصغيريين، بعيدًا عن طعمه اللذيذ بس هو كمان مفيد لإنه فيه أكتر من مكون وممكن يتعمل بأكتر من طريقة بشكل يجمع فيه كل العناصر الغذائية، يعني عندك مثلًا المكسرات اللي ممكن تتحط فيه فيها فوائد كتيرة بجانب إن الرز من النشويات أصلًا، وممكن كمان يتاكل مع الكبد والقوانص يعني بروتين مع نشويات، يعني وجبة متكاملة ممكن تتاكل لوحدها! وأهم حاجة في الوصفة دي هي التوابل وكمية البصل اللي بيتحط وبمقدار قد إيه.
الكبيبة
في منها المصري وفي منها الشامي، الشامي يعني هتلاقي سوريا ولبنان والأردن والعراق وفلسطين تقريبًا بياكلوها بنفس الطريقة، وبتبقى خليط ما بين اللحمة المفرومة والبرغل والبهارات وممكن تتقدم مع صوص من اللبن الرايب أو الزبادي، والمصري بتبقى برز ولحمة مفرومة، والاتنين بيبقوا مختلفين في الطعم أو في طريقة التجهيز وكمان في الشكل النهائي.
فتة الكوسة
نقدر نعتبره طبق جانبي وفي نفس الوقت طبق رئيسي، لإنه مليان بالعناصر الغذائية المهمة، والكوسة ممكن تتعمل بطرق كتير وبرضه تبقى لذيذة، شوفناها بالبشاميل وشوفناها وهي متحمرة في الزيت وشوفناها وهي محشية بالرز، وشوفناها برضه وهي فتة بالتوم واللبن واللحمة المفرومة. خلاصته الكوسة على أي وضع وبأي طريقة قادرة إنها تبقى لذيذة!
طاجن الرز المعمر
من الأكلات المناسبة جدًا في فصل الشتا خصوصًا إن فيه قشطة ولبن وسمنة، مناسبة برضه للناس اللي بتحب الرز في كل حالاته، ممكن يتعمل برضه بالفراخ أو الكفتة.
ورق عنب
من الأطباق اللي مفيش خلاف عليها، اتقال عن تاريخها إنها انتقلت للعرب من خلال الأتراك وكان اسمها “يبرق” وقصده بها ورق العنب المحشي بالرز واللحمة المفرومة وده غالبًا بيتاكل في الدول الشامية. أما ورق العنب اللي احنا نعرفه دلوقتي واللي عبارة عن أرز بالخلطة وبهارات، فده كانوا بيسموه “اليالنجي” بمعنى “الكذاب” يعني من غير لحمة، بس في الحالتين طعم ورق العنب لذيذ وجبار.
المكرونة بالبشاميل
راشقة معانا في أي مناسبة وأي عزومة، من الأكلات اللي لو اتحطت على السفرة هي أول حاجة بتخلص، خصوصًا لو كانوا متوصيين بصوص البشاميل! ومن الحاجات اللطيفة اللي سمعناها في حب المكرونة بالبشاميل، إن في شخص قبل كده نظم مهرجان اسمه “في حب المكرونة بالبشاميل” باعتبارها من الأكلات اللي بتناسب معظم الأذواق، وعمل إيفينت على الفيس بوك في مسابقة كده شبه مسابقة فيلم فول الصين العظيم بس بين صحابه ومع جائزة في الأخر لأحسن واحد يعمل المكرونة بالشاميل!
الفراخ البانيه
البانيه من الأكلات اللي بتقدر تحتويك نفسيًا، خصوصًا لو معاها مكرونة بصلصة، بس بما إنها هتتاكل جانب الديك الرومي المرة دي، هتبقى اختيار مناسب للناس اللي ممكن ماتحبش طعم التركي ومنهم الأطفال وفي نفس الوقت سهل في التحضير ومش بياخد وقت.
سلطة التبولة
من أشهر السلطات في العالم وخصوصًا في دول الشام، مكوناتها كتير زيّ البرغل والطماطم والتوم والبصل والبقدونس ودبس الرمان.
جلاش باللحمة المفرومة
مفيش سفرة في عيد إلا وهتلاقي عليها الطبق ده، سواء مع محشي بقى أو مكرونة بشاميل أو فراخ.