بمناسبة العيد: 7 أفلام عربي ممكن تشوفهم في السينما

عيد الفطر خلاص قرب جدًا وكل الناس بتجهز للعيد وخروجات العيد، وطبعًا أفلام عيد الفطر جزء مهم جدًا من العيد علشان السينما واحدة من أهم عادات المصريين اللي بيحتفلوا بالعيد من خلالها. وعلشان خروجة السينما في العيد حاجة مهمة جدًا، جبنالكم قائمة بأهم الأفلام اللي نازلة في العيد علشان تقرروا هتتفرجوا على إيه منهم.

ولإن في نجوم كُبار نازلين بأفلام جامدة خلال عيد الفطر، وبعد غياب بعضهم لوقت طويل عن الساحة الفنية، احنا متحمسين جدًا لموسم أفلام عيد الفطر السنة دي.

زومبي: نجوم مسرح مصر

إعلان الفيلم بيقول إن أحداثه هتكون في إطار كوميدي مع شوية إثارة، وبيمثل علي ربيع في الفيلم شخصية مطرب المهرجانات الشعبية “حمادة بطة”، والمفروض إن علي ربيع بيقدم أغاني شعبية بصوته في الفيلم.

والكوميديا والإثارة اللي بتحرك أحداث الفيلم بتدور كلها حوالين رغبة “حمادة بطة” في إنه يكون مغني شعبي مشهور رغم كل العقبات اللي بتواجهه. والفيلم من بطولة علي ربيع، ودينا محسن (ويزو)، وحمدي الميرغني، وكريم عفيفي، وهاجر أحمد، وعارفة عبد الرسول، ومحمد محمود، وتأليف هشام أبو المجد وأمين جمال وإخراج عمرو صلاح.

واحد تاني: عودة أحمد حلمي في أفلام عيد الفطر

غاب أحمد حلمي عن السينما 3 سنين بعد فيلمة الأخير “خيال مأتة” سنة 2019، وبعد الغياب الطويل ده رجع أحمد حلمي بمفاجأة في عيد الفطر المبارك بفيلمه الجديد “واحد تاني”، واللي بيشاركه البطولة فيه عمرو عبد الجليل وسيد رجب وروبي، وهو تأليف هيثم دبور، وإخراج محمد شاكر خضير.

وبتدور الأحداث في إطار حياة موظف عادي بيشتغل أخصائي اجتماعي في مصلحة السجون، وشغله عبارة عن مقابلات مع المساجين اللي بيكتب تقرير عن حالتهم النفسية، لحد ما يقابل واحد من زمايل المدرسة ماشافوش من سنين طويلة ويكتشف إنه بقى رجل أعمال ناجح، ويعزمه الزميل ده على حفلة بيجمع فيها زمايل الدراسة اللي البطل مايعرفش عنهم حاجة من زمان. في الحفلة دي يكتشف البطل إنه كان سبب مباشر في فشل معظم زمايله في حياتهم، وده اللي يدفعه لإعادة التفكير في حياته مرة تانية.

عمل محمود مهدي فيديو ريأكشن على إعلان فيلم “واحد تاني”، تقدر تتفرج على الفيديو علشان تكون انطباع أفضل عن الفيلم قبل ما تقرر تدخله سينما.

أشباح أوروبا

بعد بطولة هيفاء وهبي في فيلم “حلاوة روح” سنة 2014، وظهورها كضيفة شرف في فيلم “خير وبركة” سنة 2017، غابت وهبي عن السينما 5 سنين، لكن فاجئتنا السنة دي برجوعها للسينما مرة تانية في فيلم عيد الفطر “أشباح أوروبا”.

وبتدور قصة الفيلم في إطار من الإثارة والمغامرات، والقصة بتحكي عن زوجة بتخلف 6 توائم، وبسبب الفقر بيضطر الزوج يبيع تلاتة من أولاده اللي لسه مولودين، ولما تكتشف الزوجة اللي حصل بتقرر تسيب زوجها وتسافر أوروبا علشان تبدأ سلسلة من المشاكل والصراعات اللي هيكون أولادنخا جزء كبير منها.

وبيشارك في البطولة مصطفى خاطر، وباسم سمرة، وأروى جودة، وعباس أبو الحسن، وسيناريو وحوار أمين جمال ومحمد أبو السعد وشريف يسري، وإخراج محمد حماقي.

العنكبوت: بعد غياب منى زكي من الموسم الرمضاني رجعت في أفلام عيد الفطر

بعد ما غابت الفنانة منى زكي عن موسم الدراما الرمضانية السنة دي، ظهرت في إعلان فيلم “العنكبوت” اللي نازل في عيد الفطر، وهي بتقدم فيه دور مرشدة سياحية وبتتكلم كوري لأول مرة في أحداث الفيلم.

الفيلم من بطولة الفنان أحمد السقا وبتدور أحداث الفيلم في إطار من الأكشن والإثارة اللي أبدع فيه السقا على مدار تاريخة الفني، وبيحصل الفيلم في إطار من صراعات المافيا ورجال الشرطة مع السقا بسبب شغل أخوه، اللي بيلعب دوره ظافر العابدين، غير المشروع في تجارة مخدر جديد قام بتصنيعه.

ليلة العيد

أفلام عيد الفطر
عن: elcinema

بتدور أحداث الفيلم في إطار من الدراما والكوميديا الخفيفة، وبيتطرق الفيلم لقضايا المرأة من المساواة والحقوق، وبيناقش الفيلم قضايا المرأة من خلال معاناة مجموعة ستات عايشين على جزيرة وبيتعرضوا لأزمات ومشاكل مختلفة بتسلط الضوء على غياب الوعي الذكوري عن القضايا النسوية.

ومن القضايا المهمة اللي الفيلم بيناقشها هي “زواج القاصرات” و”ختان الإناث”، والإطار العام للفيلم بيتكلم عن مفهوم قهر المرأة بشكل عام في جميع مراحل عمرها سواء في الطفولة أو الشباب، وأحداث الفيلم بتدمج كل القضايا المتفرعة دي في خط قصصي واحد بيتركز في ليلة واحدة هي ليلة وقفة العيد.

وذكرت الفنانة يسرا لليوم السابع إنها خلصت تصوير كل مشاهد دورها في الفيلم، وأكدت إن الدور ده بالذات هيكون مفاجأة للمشاهدين. وبتظهر الفنانة هنادي مهنا في الفيلم في دور مغنية عايشة في حارة شعبية مصرية، وبتمر بأزمات بتسلط الضوء على قضايا نسوية في مجال عمل المرأة وحياتها الشخصية.

الفيلم من إخراج سامح عبد العزيز، ومن بطولة مجموعة كبيرة من النجوم زيّ يسرا وغادة عادل وريهام عبدالغفور وعبير صبري.

الجواهرجي: الهنيدي في أفلام عيد الفطر

وبنشوف الفنانة منى زكي بتشارك بدور تاني في أفلام العيد السنة دي مع الفنان محمد هنيدي في فيلم “الجواهرجي” ومعاهم الفنان صلاح السعدني وآسر ياسين والجميلة لبلبة، والفيلم من إخراج إسلام خيري.

بتدور أحداث الفيلم في إطار من الكوميديا والدراما عن علاقة ما بين زوج وزوجته، والزوج “محمد هنيدي” هو تاجر مجوهرات “جواهرجي” بتوقعه زوجته في مشاكل ومواقف محرجة بتكون مصدر الكوميديا في الفيلم.

فارس

أفلام عيد الفطر
عن: elcinema

الفيلم من إنتاج شركة روتانا ومن إخراج رؤوف عبدالعزيز، ومن بطولة أحمد زاهر وحسين فهمي وإيمان العاصي ونهال عنبر ومنة فضالي وصلاح عبدالله.

أحداث الفيلم بتدور في جو درامي بسيط وفي منطقة شعبية، وبيظهر البطل فارس “أحمد زاهر” كشاب عادي جدًا ولكن عنده خلفية رياضية، وبتضطره الظروف إنه يواجه رجل أعمال ماعندوش رحمة هو رشيد السويفي “حسين فهمي”.

قول لنا في الكومنتات هتتفرج على إيه في العيد، ولو عندك ترشيحات لأفلام تانية نازلة في العيد وماتكلمناش عنها، قول لنا في الكومنتات.

أخر كلمة: ماتفوتوش قراءة: بعد تراجع مشاهدات رامز جلال: ليه المصريين فضلوا يشوفوا البرنامج رغم كل الجدل؟

تعليقات
Loading...
Tweet
Share
Share
Pin