استقبل الرئيس عبد الفتاح السيسي الدكتور رشاد العليمي رئيس مجلس القيادة الرئاسي في اليمن بقصر الاتحادية، رئيس مجلس القيادة الرئاسي اليمني اللي تولي المنصب حديثا قدامه تحدي كبير في ظروف صعبة بيعيشها بلد بيعتبر واحد من أعرق الحضارات العربية والإنسانية بشكل عام.
الرئيس السيسي دعا لحل نهائي في اليمن ينهي سنوات طويلة من المعاناة للشعب الشقيق ويلبي طموحاته، الرئيس السيسي أضاف خلال مؤتمر صحفي مشترك مع رئيس مجلس القيادة الرئاسي بالجمهورية اليمنية أن اليمن كان دايما هو بوابة كبرى من بوابات العروبة، كمان أشار أن أمن واستقرار اليمن يمثل أهمية قصوى لمصر والعالم العربى.
أهمية اليمن لمصر والعالم العربي كله والزيارة المهمة دي اللي ليها دلالات كتير بتدي أمل في إنهاء معاناة الشعب الجميل ده بيخلينا نعرض لكم في المقال ده أخر التطورات هناك وأخبار بلد مكناش بنسمع عنه غير المعاناة المستمرة.
اليمنيين بيعيشوا حياة هادية نسبيًا.. الهدنة وتمديدها
وافقت الحكومة الشرعية في اليمن وميليشيات الحوثي، الخميس اللي فات على تمديد الهدنة الحالية لمدة شهرين إضافيين، وده كان قبل ساعات من انتهائها وتم برعاية الأمم المتحدة ومبعوضها هانس روندبرج، الهدنة دي بدأت في ٢ أبريل اللي فات وتمديدها بيدي أمل في أن حياة اليمنيين العاديين تفضل في سلام أخيرا ولو إلي حين، وده كان كلام مبعوث الأمم المتحدة اللي قال أن اليمنيين شهدوا الفوائد الملموسة للهدنة دي طول شهرين بالتمام والكمال، وانخفض عدد الضحايا المدنيين بشكل كبير، ودخل البنزين إلى اليمن من ميناء الحديدة، واستأنفت الرحلات الجوية من وإلى مطار صنعاء الدولي بعد ست سنين.
ودلوقتي اليمنيين بيسعوا لحل سياسي يرسخ للهدنة دي بشكل مستمر يستفيد منها اليمنيين اللي عانوا كتير.
كارثة البحر الأحمر..أزمة الخزان “صافر”
في نفس الوقت وكأن المشاكل مش راضية تسيب اليمنيين ولو نسيبا وده بعد ما أعلنت الممكلة العربية السعودية والخارجية الأمريكية توفير مبلغ بيوصل لأكتر من ١٠ مليون دولار للمساعدة في وقف تسرب النفط من السفينة “صافر” اللي واقفة قدام ساحل البحر الأحمر شمال مدينة الحديدة اليمنية.
تسرب البترول ده ممكن يكلف العالم مليارات الدولارات لتنضيفه وهيدمر الحياة البحرية والتجارة العالمية في واحد من أهم الممرات المائية يعني خساير من كل ناحية، إنقاذ كارثة “صافر” بيحي بالتزامن مع اليوم العالمي للمحيطات وده خلي الأمم المتحدة تتدخل وهتوفر حوال ٩٨٠ مليون دولار لوقف الكارثة دي.
الجولة التانية من المحادثات وفتح الطرق وحاجات تانية مهمة
الجولة التانية من المحادثات المباشرة اللي وصلتنا للهدنة اللي أشرنا إليها بين الحكومة اليمنية وجماعة الحوثيين بتحصل دلوقتي في العاصمة الأردنية عمّان برعاية مبعوث الأمم المتحدة إلى اليمن وواحدة من أهم بنودها إعادة فتح الطرق في تعز ومحافظات أخرى وهو اللي بيشير للوضع البائس في بلد كان في يوم من الأيام مهد للحضارة الإنسانية بيعيش دلوقتي أزمة جوع أدت لوفاة أطفال كتير في بلد بقي ساحة للصراعات الإقليمية بين قوي دولية من ناحية وإيران من ناحية تانية.
آخر كلمة: متفوتوش قراءة: “مأساة اليمن”: العيد على الأبواب وكتير من أهل اليمن مش معاهم دخل كافي يخليهم يحتفلوا بعيد الأضحى