بعد غياب طويل عن الحفلات الفنية، بترجع لنا النجمة المصرية شيرين عبد الوهاب على الساحة، من خلال حفل غنائي كبير من المقرر إنها تحييه بمناسبة عيد الفطر المبارك في دبي، يوم الجمعة 28 أبريل، على مسرح (كوكاكولا إيرينا)، هتقدم فيه باقة من أجمل أغنياتها القديمة والجديدة اللي اتعلق بها الجمهور.
شيرين دايمًا معودانا إن مع كل غياب عودة قوية بتعوض الغياب ده، وزي ما بتعمل ده من خلال حفلاتها، في أغانيها كمان كانت معانا في كل مود وحالة احنا عايشينها.
مود الحزن والكآبة
هتلاقي عندها مخزون كبير؛ منه “جرح تاني هو قلبي لسه طاب من الأولاني؟” ولا “كده يا قلبي يا حتة مني يعني خلاص أنا مش هشوفك تاني؟” ولا “على بالي ولا أنت داري باللي جرى لي، وحبيته بينه وبين نفسي” حاجة منتهي تقطيع الشرايين.
في مود الحب
عندها رصيد عالي من الأغاني اللي تسمعها ف حلاوة البدايات، أو في النص في اللحظات اللي بتبقوا مش فاهمين فيها أنتوا في أنهي مرحلة في العلاقة؛ زي “حبه جنة أنا عشت فيها قربه فرحة حلمت بيها”، ولا أغنية “مشاعر ويادي يادي المشاعر” الأغنية دي بالذات خلت ناس كتير تتمنى تعيش قصة حب علشان تحس كل المشاعر اللي في الأغنية دي.
مود الفرفشة
طبعًا أول حاجة جت في بالك “آه يا ليل” تقدر تسمعها في الفرفشة والانبساط والحفلات، ولا أغنية “كلها غيرانة بتحسد والنفسية سواد لو أعدي في حتة مش بسلم من الكومنتات”.
مود الحماس والوطنية
حتى في الحماس والوطنية عندها اللي تقدمه، لو عايز تعيش الأجواء دي تقدر تسمع أغنية “ماشربتش من نيلها” أو لو عايز شوية حماس اسمع “يا معافر كمل للآخر”.
آخر حفل غنائي أحيته شيرين عبد الوهاب كان في يناير اللي فات في الكويت، ولو عايزين تعرفوا تفاصيل أكتر عن حفلة العيد ده، ادخلوا على اللينك من هنا.