بسبب الترامبولين: الطفل يوسف جاله شلل رباعي وعلاجه 2 مليون جنيه!

انتشر خبر مؤخرًا عن الطفل يوسف اللي اتصاب بشلل رباعي. وهو في رحلة مدرسية لواحد من المولات الشهيرة في 6 أكتوبر. وبسبب لعبة الترامبولين حصل له كسر في الفقرات العنقية التانية والتالتة المسئولة عن الحركة والتنفس.

بحسب تصريحات والدة الطفل قالت إن جالها مكالمة من مسئولة الرحلة في المدرسة. وفي بداية المكالمة طمنتها وقالت “ابنك إصابته خفيفة وده مجرد التواء في الرقبة”. وبعد دقائق جالها مكالمة تانية من المسئولة وقالت لها “ماتروحيش على المكان وتعالي على المستشفى”. ولما راحت لقت إن الموضوع ماكانش مجرد التواء زيّ ما اتحكى في الأول. والتشخيص المبدأي للحالة بعد عمل أشعة رنين كان كسر وتهشم في الفقرات وشلل رباعي!

المدرسة وإدارة الملاهي وتخلي عن المسئولية

وكملت كلامها وقالت “إن وهي في المستشفى جالها مكالمة تانية من مسئول قسم الألعاب الترفيهية. ورمى المسئولية على المسئولين من المدرسة. وبعدها بفترة مش كبيرة جالها مكالمة من مسئولين المدرسة وهما برضه بيرموا اللوم والمسئولية على الملاهي! وفضل كل واحد فيهم يرمي اللوم على التاني ويشيلُه المسئولية”

وكملت “المدرسة بتقول إن ده كان خارج سور المدرسة وبالتالي احنا مش مسئولين. مع العلم إن ده كان يوم نظمته المدرسة. وأخدت فلوسه قبل ما الرحلة تطلع، والحادثة حصلت الساعة 11 يعني خلال مواعيد المدرسة”. بالإضافة إن المسئولين في الملاهي قالوا “إن ده حادث قدري!”

وتابعت في حديثها “بعدها إدارة شركة الألعاب عملت معانا عقد بتحمل مصاريف العلاج. وتم كتابيًا وكانت البنود إنه مجرد تضامن إنساني وإن الحادث قدري”. “وكان بند من بنود العقد إنه مش من حقهم يقاضوا المول أو إدراة الملاهي لا دلوقتي ولا بعدين.” وده الشرط اللي اعتبرته أم الطفل ظالم وكما وصفته “ربط إيديها بسلاسل”. وتابعت”كنت مجبرة أوافق لإن ابني كان بيموت في المستشفى وقعد ينزف بالساعات. وللأسف الشركة بعد ما اتكفلت بجزء من العلاج رفعت إيديها عن الموضوع”.

وقالت “اللي عرفته بعد كده إن الترامبولين كان ارتفاعها أقل من متر وده لا مش متناسب لا مع طول ابني ولا وزن ابني”.. يوسف دلوقتي محتاج يكمل علاجه الطبيعي على الأقل لمدة سنة كاملة وبتكلفة توصل لمليون و800 ألف جنيه. محتاجين نوصل صوته للمسئولين علشان يتعالج ويرجع تاني أحسن من الأول.

أخر كلمة: ماتفوتوش قراءة: محمود عزت مصاب بأخطر أنواع مرض ضمور العضلات، وعلاجه 10 مليون جنيه!

تعليقات
Loading...
Tweet
Share
Share
Pin