بتتكسفي تتصوري؟ كذا طريقة بسيطة تخليكي تاخدي صور حلوة ومختلفة

لما الموضوع يجي “للتصوير” فالناس بتختلف حسب طبيعتهم، ففي اللي مجنون تصوير وبياخذ 100 سيلفي قبل ما ينزل، وفيه اللي بيصور غيره بس مبيحبش يتصور هو، وفي كمان اللي مبيحبش الموضوع كله من الأساس. وبين كل الأنواع دي، في نوع في النص كده، اللي هما بيحبوا التصوير، ولكن بيجيلهم لحظات إحراج كده وسط التصوير.. أحط إيدي فين؟ أضحك إزاي؟ لا لا أنا مش “photogenic”.. لو انت شايفة نفسك في الكام جملة دول، يبقى المقالة دي علشانك! مقومات الصورة الحلوة كتير، ومنها إزاي بتاخدي الـ “pose”، المكان والإضاءة اللي بتتصوري فيها، وحاجات تانية كتير. فجمعنالكم مجموعة من الأفكار، اللي هتخلي مستوى صوركم اللي جاية في حتة تانية خالص!

اتصوري بضهرك

أظن مفيش أسهل من كده بداية مش كده؟ لو بتتكسفي ومش بتعرفي تتصوري يبقى ممكن تبدأي بخطوة صغيرة وهي إنك تدي ضهرك للكاميرا، وتعملي أي حركة بسيطة زيّ إنك ترفعي ايدك أو تمسكي شعرك. والطريقة دي بتبقى مناسبة بالذات لما تكوني في مكان الـ “view” بتاعه حلو ومختلف، زيّ على البحر مثلًا أو لو مسافرة في بلد مختلف.

إسندي على حاجة

لو مش بتعرفي تعملي إيه بايديك وانتي بتتصوري، فإنك تسنديها على أي حاجة ده أكيد هيحل المشكلة، وكمان هيخلي شكل الصورة يطلع أحلى، ومختلف!

بصي للكاميرا بضهرك وانت ماشية

Attitude “الشهرة عايزة مني إيه” ده في كتير من الأوقات بينفع.. لو مكسوفة تفضلي واقفة كده وانت بتاخدي الصورة، يبقى امشي لقدام وبصي للكاميرا بضهرك، بتطلع الصورة مختلفة وملفتة للنظر، لإن فيها حركة..

اتصوري وانت ماسكة حاجة قريبة من وشك

جالك ورد؟ أو بتحبي دبدوب أو مخدة معينة؟ جيه وقتهم إنهم ينقذوكي! ولو كمان في إضاءة خفيفة، الصورة هتطلع فنية لأقصى الدرجات!

“صورني وأنا مش واخد بالي”

دي تقريبًا أكتر حيلة بيستخدمها أي حد أثناء التصوير، لإنها عمرها ما بتفشل! بص في الموبايل، أو على أي حاجة وفي أي اتجاه.. والباقي على اللي بيصور.

اقعدي على الأرض

عن: Pinterest

هنا داخلنا في poses أكتر جراءة شوية معلش.. هتتصوري بوشك وكمان هتعملي حركة، بس صدقينا مش هتندمي لو جربتي.. اقعدي على الأرض واسندي إيدك على رجلك، وشوفي بقى التعليقات الكتير اللي هتجيلك.. متخافيش شكة دبوس!

آخر كلمة: جربوا الطرق دي وقولونا رأيكم في التعليقات! وماتفوتوش قراءة: “عاوز تتعلم تصوير ومش عارف تبدأ منين؟ جبنالك مجموعة من النصائح هتنمي بيها مهاراتك“.

تعليقات
Loading...
Tweet
Share
Share
Pin