تحديث بتاريخ 8 سبتمبر 2022: أعلنت وزارة الصحة والسكان عن نيتها إطلاق مبادرة بهدف تشجيع الولادة الطبيعية، وتقليل الولادات القيصرية غير الضرورية، وده بعد ما بلغت نسبة الأخيرة في مصر نتائج خطيرة، وصلت لـ72% سنة 2021، في مقابل 52% سنة 2014.
في نفس الوقت أظهرت احصائيات الجهاز المركزي للتعبئة العامة والإحصاء إن محافظات الوجه البحري تعتبر أعلى نسبة في معدل الولادات القيصرية اللي وصلت لـ84% في سنة 2021، في مقابل 70.6% في سنة 2014.
وضح مصدر وزارة الصحة إن مبادرة “الولادة الطبيعية” كانت على رأس أولويات وزير الصحة، خالد عبدالغفار، اللي كانت أول توجيهاته هي البدء في تدريب الأطقم الطبية على تسهيل الولادات الطبيعية للستات والحد من إجراء “القيصرية” بسبب مخاطرها على صحة الأم والجنين، إلا في حالة وجود ضرورة طبية.
المبادرة بتشتمل على حملات توعية موسعة للستات المصريات، وأهمية الولادة الطبيعية لصحة الأم والجنين، وكمان تدريب الأطقم الطبية على التعامل الأفضل مع حالات الولادة، وتوفير خدمات الولادة الطبيعية في المستشفيات الحكومية.
و أعلنت وزارة الصحة عن تخرج الدفعة الأولى من الممرضات المدربات على مهارات الولادة الطبيعية، أو بنسميهم “القِبالة”، في محافظة شمال سيناء، ضمن برنامج تدريبي يشمل كل المحافظات خلال الفترة الجاية.
الولادة القيصرية هي الشكل الجراحي اللي بيلجأ ليه دكاترة التوليد في حالة تعسر الولادة الطبيعية، ومنظمة الصحة العالمية بتنص على إن نسبة الولادة القيصرية في أي مجتمع ماينفعش تزيد عن 15% من عدد الولادات الكلية.
نسبة الولادة القيصرية في مصر، لحد سنة 2018، وصلت لأكتر من 51%، يعني أكتر من تلات أضعاف النسبة اللي منظمة الصحة العالمية بتنصح بيها. تواصلنا مع دكتور النساء والولادة وليد سرحان علشان نسأله عن إحصائيات الولادة القيصرية في مصر وفاجأنا إن نسبة الـ 51% دي نسبة قديمة ومش دقيقة وإن النسبة الحقيقية للولادات القيصرية في مصر النهارده أكتر من كده بكتير.
ومن الصعب النهارده إننا نحدد النسب الحقيقية للولادات القيصرية في مصر لإن كتير منها مش بتتسجل.
الولادة القيصرية: إمتى بتكون ضرورة طبية؟
- الطفل نازل بدري ومقلوب: يعني الجنين مولود قبل الشهر التاسع وفي وضعية هتخلي الراس ماتنزلش الأول وبالتالي ده ممكن يحط الجنين في خطر الاختناق أثناء الولادة الطبيعية. بس حتى في الحالة دي، الطبيب لازم يحاول يغير وضع الجنين أثناء الولادة الطبيعية ولو ماقدرش ساعتها بيلجأ للقيصرية كحل أخير.
- لو كان في أي سبب قفل منطقة المهبل: زيّ المشيمة اللي ممكن تكون في الجزء السفلي من الرحم مش في مكانها الطبيعي في الجزء العلوي منه. وبالتالي الولادة الطبيعية هتكون خطيرة على البيبي والأم لإن المهبل أصلًا مقفول.
- لو كان في خطر النزيف أو تمزق بطانة الرحم: والأخطار دي بتيجي غالبًا بسبب وجود جرح ولادة قيصرية سابقة وبيكون عرضة للتمزق في الحمل التاني.
- بعض المشاكل الصحية اللي ممكن تمنع الأم من الولادة الطبيعية.
لو اتبع الطبيب السياسات الطبية السليمة وماخدش قرار الحل الجراحي في الولادة غير في الضرورات القصوي، نسبة الولادة القيصرية في مصر هتكون ما بين 15% لـ 20% بس، ودكتور وليد سرحان بيقول إن النسبة ممكن توصل لـ 20% وتفضل نسبة صحية في المجتمع.
لو نسبة الولادات القيصرية زادت عن النسبة دي هيكون خطر على النساء لزيادة احتمالية حدوث مضاعفات الجراحة اللي ممكن الست تعيش أزماتها الصحية طول عمرها، ولو النسبة قَلِت عن كده بيكون برضه خطر علشان معنى كده إن بعض الستات بيمروا بولادات طبيعية ممكن تشكل خطر على حياتهم.
مخاطر الولادة القيصرية
دكتور وليد سرحان بيقول إن الولادة القيصرية زيّها زيّ أي تدخل جراحي مش بنلجأله غير لما نستنفز كل الحلول التانية اللي مفيهاش داعي لعمل جروح في جسم المريض، وده لإن الجراحات أيًا كان نوعها ليها مضاعفات، ومخاطرها على حياة المريض كتير.
من مخاطر الولادات القيصرية غير الضرورية:
- عملية التخدير: عملية التخدير هي عملية دقيقة جدًا وفيها نسبة خطورة في أي ظرف من الظروف، وبالتالي وارد إنها تسبب مضاعفات للأم والجنين.
- أخطاء طبية: الخطأ الطبي وارد الحدوث لإن الدكتور اللي بيولد إنسان معرض للخطأ مهما كان كبير ومتمرس، والأخطاء دي ممكن في بعض الأحيان توصل لموت الأم والجنين، فليه تعرضي نفسك لخطورة زيّ دي طالما مش مضطرة؟
- الإلتصاقات: شق البطن معناه إن الدكتور هيعمل شقوق في طبقات متتالية في بطن الأم لحد ما يوصل للبيبي جوا الرحم، ولمس الطبقات الداخلية من العضلات والجلد بتخلي الطبقات دي تستجيب بطريقة شاذة وممكن يحصلها التئام في شكل طبقة واحدة وساعتها بتبدأ آلام الإلتصاقات ومشاكلها الكتير، واللي مالهاش غير حلول جراحية وفي الغالب حتى الجراحات دي مش بتحل المشكلة.
- انسداد في أنابيب فالوب: وده بيعمل آلام مزمنة وبيسبب حمل خارج الرحم واللي بيسبب مضاعفات كتير للأم منها استئصال الرحم، وفي أسوأ الحالات ممكن توصل للموت.
- جرح الولادة القيصرية ممكن يجذب المشيمة في الحمل التالي ويخليها تلزق فيه بدل مكانها الطبيعي في أعلى الرحم، وده هيسبب انغلاق المجرى المهبلي وبالتالي هيمنع الولادة الطبيعية وممكن يعمل تمزق في بطانة الرحم ويسبب نزيف حاد.
ليه الدكاترة في مصر بيلحوا على الولادة القيصرية؟
ممكن يكون السبب هو توفير الوقت، زيّ ما دكتور وليد سرحان بيقول: بعض الدكاترة بيتجنبوا أوبشن الولادة الطبيعية لإن الدكتور محتاج يفضل وقت طويل جنب الأم واللي ممكن يوصل ليوم كامل أو أكتر، في الوقت اللي ممكن يعمل فيه ولادة قيصرية خلال ساعة ونص بالكتير.
أسعار الولادة القيصرية أكتر من الولادة الطبيعية وممكن في يوم واحد يعمل 10 عمليات أو أكتر وبالتالي بزنس القيصرية بيكسب كتير جدًا.
ممكن يكون في بعض التعقيدات في الولادات الطبيعية اللي بتخلي الدكتور يخاف منها وياخد الأوبشن الأسهل علشان يتجنب الشكاوي في النيابة واللي ممكن تعمله مشاكل كتير هو في غنى عنها.
ليه بعض الأمهات الحوامل بيفَضَلوا الولادات القيصرية؟
بعض الأسباب اللي بتخلي الستات تخاف من الولادات الطبيعية وتعليق دكتور وليد عليها:
- خوف من آلام الولادة الطبيعية والطلق: وعلشان كده دكتور وليد بينصح الستات بحقنة الألم، لإن الألم الكتير ممكن يعقد الولادة الطبيعية.
- خوف على شكل المهبل وحجمه اللي ممكن يتغير بعد الولادة الطبيعية: شكل المهبل بيتغير بسبب هرمونات الجسم خلال فترة الحمل وشكل الرحم اللي بيضغط على المثانة والمهبل، بالتالي التغير في الشكل والحجم ده طبيعي جدًا وهيحصل حتى مع الولادات القيصرية.
- استسهال فكرة الجراحة: بعض الأمهات بيكونوا عاشوا تجربة الولادة الطبيعية ولقوها طويلة ومتعبة وعلشان كده بنلاقيهم بيفَضَلوا الولادات القيصرية، بس هل هما عارفين مخاطرها؟
لازم نبدأ نوعي الستات بمخاطر الولادات القيصرية ونعرفهم إمتى بتكون ضرورية وإمتى يتجنبوها وياخدوا الاختيار الأقل خطورة “الولادة الطبيعية”، لإن زيادة نسبة عملية جراحية ستة أضعاف عن النسبة الطبيعية داخل بلد بيقول إن في مشكلة خطيرة ومحتاجة تدخل مجتمعي سريع.
والجراحات غير الضرورية طبيًا اللي الدكاترة بيخلوا الستات يتعرضوا لها تعتبر شكل من أشكال العنف ضد النساء، لإنه بيعرض حياتهم للخطر وبيسبب لهم معاناة وألم مش مضطرين يعيشوه.
طالما مفيش أي مانع طبي يمثل خطورة على الأم أو الجنين خلال الولادة الطبيعية، ساعتها بتكون هي الاختيار الأفضل للأسباب الجاية:
- استجابة الأم الهرمونية وبداية الرضاعة الطبيعية بتكون سلسة جدًا مع الولادة الطبيعية.
- الأم بتقدر تقوم وتتحرك بعد ساعات بس من الولادة، وبالتالي هتبدأ تؤدي واجبها كأم بشكل أسرع.
- آلام ما بعد الولادة بتكون أقل بكتير.
- مفيهاش مخاطر القيصرية والمضاعفات التالية ليها.
أشهر خرافات الولادة القيصرية: الحوض ضيق والمياه قليلة حولين البيبي
الحوض الضيق خرافة سخيفة في مجال طب النساء ومش داعي للقيصرية خالص. عظام الحوض ممكن ترتخي وتوسع أثناء الولادة وزمان كان الدكاترة بيعملوا قياسات لمساحة حوض الأم وحجم رأس البيبي علشان يعرفوا هيختاروا ولادة طبيعية أو قيصرية، ودكتور وليد بيقول إن الطريقة دي بقت قديمة ومالهاش لازمة لإن الدكتور بيقدر يولد الأم طبيعي مهما كان حجم الحوض، والحالات اللي بتستدعى القيصرية بتكون قليلة جدًا والدكتور بيكتشفها خلال الولادة الطبيعية وممكن ياخد القرار في وقتها إنه يحول الولادة لقيصرية.
المياه اللي حولين البيبي طبيعي إنها تقل قبل الولادة في المستوى الطبيعي، وسواء في حالة المياه القليلة أو الحوض الضيق، العنصر الوحيد اللي يخلي الدكتور يقرر شكل الولادة هو مراقبة نبض البيبي، وطالما النبض كويس يبقى البيبي ينفع يتولد طبيعي.
كل واحدة حرة في جسمها ومن حقها تختار شكل الولادة اللي هي عايزاه بس احنا بنحاول نوَصَل التوعية الطبية الكافية اللي تخلي الستات ياخدوا اختيار الولادة وهما عارفين إيه المخاطر اللي ممكن تتعرض لها في كل اختيار.
ازاي المنظومة الصحية في مصر تقدر تحل أزمة الولادة القيصرية؟
دكتور وليد سرحان قال لنا إن كل بلد في العالم في دستور طبي بيقول للدكتور يعمل إيه في كل خطوة بالظبط أثناء أي تدخل طبي، وبالتالي لو الدكتور مشي على الـ Guidelines دي وحصل تعقيدات طبية أدت لمضاعفات صحية عند المريض يبقى ده قضاء وقدر ومش غلطة الدكتور، والمحاسبة القانونية للدكتور بتركز على هل هو ماشي على الدستور الطبي الثابت في الحالات دي ولا لأ.
في الحالات اللي بيكون مفيهاش دستور طبي محدد Guidelines، الدكاترة بيحاولوا على قد ما يقدروا يتجنبوا الشكاوي والمحاسبة القانونية اللي ممكن ماتكونش عادلة في أوقات كتير وبالتالي بيضطروا ياخدوا الحلول الجانبية اللي بتنجز الحالة المرضية، حتى لو كانت حلول غير ضرورية.
علشان نحل أزمة زيّ انفجار معدل الولادات القيصرية اللي بتهدد صحة الستات في مصر ممكن المنظومة الصحية تعمل دساتير طبية شاملة تجبر الأطباء على اتخاذ الخطوات الضرورية بس ونبدأ المحاسبة الطبية للدكاترة بناءًا على الدساتير دي.
طبعًا كل ست حرة في جسمها، ولكن لازم الدكاترة تشجع الستات في إنهم مايلجأوش للولادة القيصرية إلا كحل أخير.
كان النائب فايز بركات اتقدم بطلب إحاطة موجه إلى هالة زايد، وزيرة الصحة والسكان، بخصوص انتشار “بيزنس” الولادة القيصرية. وكان رد الوزارة إيجابي وبدأوا ينظروا في الموضوع.
نص طلب النائب فايز بركات على إن:
هناك شريحة كبيرة تجرى القيصرية لأسباب ليست طبية، حيث هناك أطباء ضعاف النفوس يبحثون عن الربح المادي، والجهد والوقت الأقل، فيتعامل بعض الأطباء مع الحالة كـ “بيزنس” وهؤلاء يخالفون ضميرهم المهني ويحولون مهنة الطب من رسالة سامية إلى تجارة خبيثة دون النظر إلى الحالة الصحية للأم. وتابع أن أحد أسباب نقص إعداد الحضانات هو الولادات العشوائية بدون فحوصات طبية واللجوء إلى القيصرية.
كما أشار في الطلب إلى أن الدولة تتحمل تكاليف باهظة، إذ بلغت فاتورة الولادة القيصرية طبقا للمسح الصحي السكاني الأخير لعام 2019 نحو 14 مليارا و525 مليون جنيه سنويا، بالإضافة إلى أنها تشكّل خطورة على صحة الأم والجنين.