المواقف الغريبة بتسيطر على بطولة أمم أفريقيا في أول أسبوع

Image processed by CodeCarvings Piczard ### FREE Community Edition ### on 2019-06-11 10:08:38Z | http://piczard.com | http://codecarvings.com

بواسطة: رحمة حجاج

من بداية بطولة أمم أفريقيا في الكاميرون اللي بدأت يوم 9 يناير، المواقف الغريبة بتزيد من أول أسبوع واللي البعض وصفها بـ “فضائح بطولة أمم أفريقيا في الكاميرون.”

أول موقف حصل كان ماتش مصر ونيجيريا، كان الحكم بكاري جاساما عنده إصرار إنه يغير الكرة أكتر من مرة. وفعلًا غَير الكرة تلات مرات على الأقل، بحجة إن الكرة ماتنفختش بشكل صحيح. ودي حاجة مابنشوفهاش كتير في البطولات العالمية. والماتش خلص بفوز منتخب نيجيريا بنتيجة ١-٠.

تاني موقف حصل واللي الناس وصفته بالفضيحة بكل معنى الكلمة، لما الحكم الزامبي جاني سيكازوي نهى ماتش مالي وتونس قبل ما الوقت الأصلي يخلص. الحكم الزامبي نهى الماتش في الدقيقة ٨٥. وبعد اعتراضات كتير، الحكم رجع الماتش تاني ونهى الماتش في الدقيقة ٨٩ يعني برضه قبل نهاية الوقت الأصلي. المنتخب التونسي احتج بشكل كبير واعترض على قرارات الحكم ورفض النزول للملعب مرة تانية بعد ما الحكم الرابع قرر إنه يكمل الماتش. والماتش خلص بفوز المنتخب المالي بهدف دون رد.

وبسبب الاعتراضات والفوضى اللي حصلت في ماتش مالي وتونس، ماتش موريتانيا وغامبيا اتأخر ساعة إلا ربع. وده علشان الماتش هيتلعب على نفس الملعب.

إن ماتشين يتلعبوا ورا بعض على نفس الملعب حاجة عادة مرفوضة في البطولات القارية والدولية علشان بيعملوا حساب الحضور الجماهيري وحالة أرضية الملعب اللي بتكون تأثرت من لعب الماتش الأول. المواقف الغريبة ماخلصتش عند الموقفين دول بس. المنتخب الموريتاني اتفاجأ بإن تم عزف نشيده الوطني القديم بدل النشيد الحالي. وده اضطر المنتخب الموريتاني وجهازه الفني إنهم يقولوا النشيد الجديد من غير تسجيل موسيقي.

والكاميرون مستمرة في المفاجئات خلال البطولة في أول أسبوع. المؤتمر الصحفي اللي كان قبل ماتش المغرب وجزر القمر، ممثل اللجنة المنظمة طلب من حارس مرمى المنتخب المغربي إنه يجاوب على الأسئلة باللغة الفرنسية أو الإنجليزية بسبب عدم وجود مترجم. الطلب أغضب حارس المرمى المغربي بشكل كبير وقال إن عدم وجود مترجم مش مشكلته وأصر إنه يجاوب باللغة العربية. وأخيرًا في ماتش جزر القمر والجابون، الكاميرا أوضحت نوم رئيس الإتحاد الأفريقي خلال الماتش واللي أثار سخرية ناس كتير. 

آخر كلمة: هل هنشوف كوارث تانية في بطولة أمم أفريقيا السنة دي ولا الكاميرون هتقدر تظهر البطولة بشكل أحسن الأيام اللي جاية؟ وماتفوتوش قراءة: لحظات مميزة بعد فوز منتخب الجزائر بكأس العرب

تعليقات
Loading...
Tweet
Share
Share
Pin