واحنا في موسم الشتا وفي وسط السقعة والتكتكة وقعدة البيت. أكتر حاجة بتسلينا هي المسلسلات والأفلام ولإن بقى من الحاجات المميزة اللي بتتعمل في الصناعة. هي عرض مسلسلات على مدار السنة مش بس تركيزها في شهر رمضان. لإن ده بقى يدي مساحة للمشاهد علشان يشوف العمل وكمان يقيمه. وفي نفس الوقت بتدي فرصة لصناع العمل إنهم يسمعوا تقييم الناس. وفي نهاية الشهر ده، في مسلسلات هتتعرض متحمسين نشوفها خصوصًا إن في منهم اللي بيعرض الجزء التالت.
أبو العروسة 3
من المسلسلات النادرة اللي اتعملت الفترة الأخيرة وكانت بتوصف البيت المصري بكل تفاصيله. بأفراحهم وأحزانهم وبالمشاكل اللي بيواجهوها. أول جزئين اتعملوا وحققوا نجاح كبير والناس مستنية الجزء التالت منه!
اللعبة 3 (اللعب مع الكبار)
من أهم المسلسلات الكوميدية اللي اتعملت في السنين الأخيرة. كوميديا خفيفة تحترم عقل المشاهد ومش مبتذلة. الجزء الأول والتاني حقق نجاح كبير والناس مستنية الجزء التالت واللي من المفترض يبقى نهاية الشهر ده.
عروس بيروت
من ضمن المسلسلات اللي بقالها أكتر من سنة بيتعرض وكان له جماهيرية عالية مش بس في مصر. لأ ده في الوطن العربي كمان وأعلنوا عن الجزء التالت منه في 23 يناير. المسلسل بطولة ظافر العابدين وكارمن بصيبص وتقلا شمعون ومجموعة كبيرة من الفنانين العرب.
نقل عام
من المسلسلات اللي الناس متحمسة تشوفها لإنه بطولة مجموعة من النجوم الكبار منهم محمود حميدة وسميحة أيوب وأحمد بدير ومحمد محمود عبد العزيز ونور خالد النبوي. المسلسل أعلنوا إنه هيتعرض في أخر شهر يناير. وبيتكلم عن موظف في هيئة النقل العام وعن قصة كفاحه في تربية أولاده.
وعد شيطان
من بطولة عمر يوسف ونيللي كريم ومن إخراج المخرج البريطاني كولين تيج وأحداثه بتدور في جو من الإثارة والغموض عن شخص بيتحالف مع الشيطان! وانتهوا من التصوير ومستنيين عرضه على منصة شاهد.