اللي محتاج تعرفه عن الجناح المصري في معرض إكسبو دبي 2020

انتهت مصر من كل الاستعدادات الخاصة بالجناح المصري في معرض إكسبو دبي 2020، واللي من المقرر انطلاقه في شهر أكتوبر اللي جاي وبمشاركة 193 دولة.

الجناح المصري هيتيح فرصة إننا نستعرض فيه تاريخ مصر الماضي والحاضر والمستقبل، له هوية واضحة وخصوصية شديدة بشكل مبهر وهيساعد في إظهار مصر بالصورة اللي تستحقها كونها بلد من أقدم الحضارات على وجه الأرض ولها تاريخ عريق وحاضر يشرف، وكل ده بيحاولوا يوصلوه من خلال الجناح.

الجناح مكون من تلات طوابق ومتقسم على 14 منطقة فيها عدد مناسب من شاشات العرض بتزيد عن 65 شاشة، وفي أول منطقة “المقدمة” هيتم استعراض ملخص سريع للي هيشوفُه الزائر في باقي المناطق جوا الجناح، وبعدها هيتم عرض بعد التطورات اللي حصلت في مصر واللي متعلقة بالمجالات الحيوية زيّ: قناة السويس والهيئة الاقتصادية للقناة والمدن الجديدة والذكية والعاصمة الإدارية، وكل ده خلال مدة تتراوح بين 33-37 دقيقة.

ده غير التجربة السياحية اللي هيعيشها الزائر في غرفة مكونة من 36 متر لمدة تلات دقايق، وهيشوف فيها معبد أبو سمبل والأهرامات بشكل افتراضي، ده غير الأقسام اللي مخصصة علشان تجاوب على أسئلة الزائرين اللي عايزين يستثمروا في مصر أو يزوروها، بجانب مجموعة من الفعاليّات اللي هتتعمل بحضور متخصصين ورجال أعمال من مصر ومن العالم علشان يبقى في فرصة لصفقات تجارية توصل مصر لصادرات تعدي 100 مليار دولار، غير المردود المادي اللي بتحلم بيه مصر، كمان المردود المعنوي على الجناح مهم واللي هيلفت النظر لمصر قدام كل حكومات العالم.

ومن ضمن الحاجات اللي هتخطف الأنظار وهتكون في استقبال الزائرين في الجناح المصري، هو تابوت فرعوني تم اكتشافه مؤخرًا في منطقة سقارة الأثرية وده وفق ببان لوزارة السياحة والآثار، كل ركن من الجناح بيحكي قصة مختلفة من النجاحات المصرية على كل المستويات.

أخر كلمة: ماتفوتوش قراءة: معرض الخط العربي في السعودية.. علشان نرجع تراث اتمحى من الذاكرة

تعليقات
Loading...
Tweet
Share
Share
Pin