“العيد فرحة” إيه اللي بيحسس المصريين بفرحة العيد؟

0

بواسطة يارا البحيري.

بالإضافة للعادات الدينية اللي بتتعمل في العيد زي صلاة العيد، والأضحية، وصوم وقفة عرفات، في مجموعة من التقاليد الاجتماعية اللي بتمثل جزء لا يتجزأ من العيد، وأساسية عند كل المصريين عشان يحسوا بفرحة العيد.

لبس العيد 

من الطفولة وإحنا متعودين إن العيد يعني لبس وحاجات جديدة زي الجزم، واللعب، والبيجامات، ومع إنه ممكن مع السن والمسؤوليات الاجتماعية المُختلفة يفقد الكُبار اهتمامهم بالعادة دي لنفسهم، لكنهم دايمًا بيحافظوا عليها مع أولادهم وأقاربهم.  

العيدية 

العيدية من أكبر مصادر السعادة في العيد، وهي بيرجع أصلها لعصور الفاطميين والمماليك لما كان السلطان والخليفة بيهادوا الأمراء، والجنود بمرتب بمناسبة العيد، وهى اختلف اسمها على مر العصور بدايةً من “الجامكية” لحد ما وصلت للعيدية.

الأكل

اتعود المصريون إنهم يفطروا و يتغدوا فتة ولحمة كوجبة أساسية أول يوم عيد الأضحى، وعادة أكل الفتة مربوطة باستخدام المصريين للرز، واللحمة، والعيش بطرق متعددة من أيام العصر الفرعوني. 

تجهيز البيت لتبادل الزيارات 

بواسطة: الجوهرة

قبل العيد بأيام، بتحرص الأسرة المصرية على تنظيف وترتيب البيت علشان يكون جاهز لاستقبال الضيوف، والأقارب في أي وقت طول فترة العيد، ودايمًا بتتجمع الأسرة على التنظيف، وبيقسموا بينهم المهام بطريقة بتكون في الغالب مش عادلة بالنسبة للأبناء.

أشهر الخروجات 

بواسطة: مصراوي

من أشهر الأماكن اللي بيزورها المصريين في العيد هي الحدائق، والملاهي الترفيهية، وكورنيش النيل، والأهرمات، والسينمات. وبيحرص دايماً صناع الأفلام على إنهم يوفروا مجموعة متنوعة من الافلام الجديدة في موسم العيد.

الأغاني 

أغاني العيد اللي بتنشر البهجة عند المصريين وبتهيأهم للاحتفال بتكون شغالة على طول في كل بيت من مغرب يوم وقفة عرفات لحد آخر أيام العيد. وأشهر الأغاني المصرية اللي بقت علامة مميزة للمناسبة دي في كل الدول العربية يا ليلة العيد لأم كلثوم، واهلاً بالعيد لصفاء ابو السعود، والليلة دي عيد لياسمين الخيام.

آخر كلمة: مصر بتتميز بالعادات اللي بتخلي العيد فيها مختلف، ومبهج، وفرحة العيد مبتكملش من غير طقوس المصريين.

تعليقات
Loading...