الزيت مش مكانه في الصرف، استفيدوا من الزيت المستعمل مع “جرين بان”

زيوت القلي اللي بنستخدمها كتير في البيت لعمل الأكل، وبنتخلص منها برميها في الحوض، أو أي بلاعة بنلاقيها في البيت، دايمًا لما بنتخلص منها بتوصل للصرف، وبتسد المواسير، فبتشكل صعوبة كبيرةفي تنقيتها، وبتعمل مشاكل كبيرة على المدى البعيد في الصرف الصحي بتاع البيت، وبتاع المنطقة كلها.

وعلشان كده ظهرت مبادرة جرين بان، برعاية شركة تجدد للطاقة المتجددة، وبتصريح من وزاة الصحة ووزارة البيئة، للتخلص من الزيوت دي بطريقة سليمة، وإعادة تصنيعها في شكل منتجات تانية زي الوقود الحيوي كبديل للطاقة، والجليسرين، والصابون.

وجرين بان كمان بتشجع على تقليل استخدام البلاستيك اللي أضراره كبيرة علينا، لأنه بيلوث الهواء، والمياه، والتربة، وبتشجع على استخدام اللمبات الموفرة للطاقة بدل اللمبات العادية اللي بتسبب تغيير المناخ، ومشاكل الاحتباس الحراري. وكمان بتشجع على استخدام البرطمانات الازاز بدل رميها كفازات للورد، أو أواني للزرع.

وعلشان تقدروا تتعاونوا مع جرين بان، وتساهموا في الحفاظ على البيئة، كل اللي عليكم هو إنكم تجمعوا من 5 ل 10 لترات من أزايز الزيت اللي استخدمتوها، وتكلموهم على الخط الساخن 19481، أو تبعتولهم على صفحة الفيسبوك، والمندوب بتاعهم هيجي ياخد الأزايز من عند البيت، وهيديكم هدية كمان زي منتجات التنظيف كلوركس، أو منتجات عصير جهينة اللي متعاونة معاهم.

آخر كلمة: لسة نقدر ننقذ كوكبنا من عوامل التلوث، ساعدوا بالتعاون مع جرين بان أو غيرهم من مبادرات الحفاظ على البيئة.

تعليقات
Loading...
Tweet
Share
Share
Pin