مش كل التاريخ نعرفه، وكمان مش كل التاريخ بيتكلم عن القصور والملوك وحياتهم، عشان تعرف حكايات مصر الحقيقية في مبانيها وشوارعها وناسها البسيطة، أستاذ جامعي قرر يوثق كل ده على قناة على اليوتيوب و صفحات على السوشيال ميديا وإنضم له شباب من طلبة كليات الفنون، وبعدها كمان انضملهم فنانين وخريجين.
المبادرة هدفها إنها تحكي تاريخ مصر بالفرشاة والألوان، وسرد التاريخ الموازي من حكاوي مرتبطة بأسماء الحارات والحرف والأمثال الشعبية والأغاني، ومن ناحية تانية تدريب الطلبة على مقررات الرسم والألوان بطريقة عملية جديدة من خلال ربطهم بتاريخ بلدهم وزيادة الوعي الوطني ليهم، وتعرف الشباب على تاريخهم الموازي الشعبي البسيط اللي بيخص الحرافيش وولاد البلد مش بس الملوك والقصور فقط زي ما متعودين في التاريخ.
القناة متوفر عليها مجموعة من اللوحات الفنية بتعبر عن الحضارة المصرية وعلومها ومعارفها وكمان بتضم تعريف بالقيم الجمالية والعناصر الزخرفية للأثار والمعالم السياحية المصرية، وحكاوي من تاريخ الشارع المصري ورسم للأشخاص كمان مش بس المباني، كمان بتهتم بتوثيق صور ورسومات للمباني المعرضة للهدم بسبب العوامل الزمنية.
تقدروا تشوفوا كل محتويات القناة من هنا.
المشاركين في المبادرة بيوضحوا إنهم مهتمين بالكلام عن تاريخ مصر بدون تعقيد، وإنهم مش بس بيرسموا الحجر والمباني بس، كمان بيتكلموا عن البشر اللي شالوا الحجر وبنوا المباني دي.
من خلال المبادرة، الطلاب بينزلوا لشوارع القاهرة كل يوم جمعة في صحراء المماليك، وكل واحد فيهم بيرسم من منظوره الفني، وبيتم توثيق كل ده على القناة وكمان توثيق للجولات نفسها ومعلومات حول مكان الجولة، الجولات دي بتبقي داخل أماكن معروفة وأماكن تانية منسية، الأهم إن كلها في مصر.
ومن المحتمل عمل معرض في مارس الجاي، حسب ما وعدت به كلية التربية الفنية بجامعة حلوان.