الشغف هو اللي بيخلينا نعمل أي حاجة من قلبنا مهما كانت صعبة أو مستحيلة، بس دايمًا في مرحلة في حياتنا بنحس بعدها إننا انطفينا! مش حاسين بحاجة ولا عايزين نعمل حاجة، فقدنا الشقف تجاه كل شيء الشغل والعيلة والحياة نفسها! مرحلة بتحس بعدها إنك مش قادر تكمل، طب هو إيه اللي بيحصل ممكن يوصلنا للمرحلة دي من فقدان الشغف؟
فقدان الشغف مش بيحصل بشكل مفاجيء، يعني مش هتصحى الصبح تقول إيه ده أنا فقدت الشغف! لأ الموضوع بيجي بالتدريج من خلال صدمات وخيبات أمل وأسباب كتير بتحصل ورا بعضها وبتوصلك في النهاية لنفس النقطة وهي إنك مش قادر تكمل!
الروتين من أهم الأسباب اللي بتقتل الشغف، شوفنا ناس كتير فقدوا شغفهم تجاه هواياتهم اللي كانوا بيحبوها لما اتحولت لوظيفة وبقوا مجبرين كل يوم يمارسوها بس المرة دي بقواعد المكان اللي هما فيه ومش بالشكل اللي بيشبعهم معنويًا واللي كانوا بيحسوا بيه قبل ما تتحول هوايتهم لمجرد وظيفة تقليدية وروتينية بيصحوا لها كل اليوم الصبح.
وأحيانًا لحظات الفشل والانكسار المتتالية اللي بنمر بيها هي اللي بتضعف من مقاومتنا علشان نكمل، ده غير الضغوطات النفسية والاجتماعية كفيلة إنها تستنفذك معنويًا ونفسيًا، ومن ضمن الأسباب برضه لما دماغك تتشتت عن هدف الأساسي في الحياة وتبطل تعمل أي حاجة علشان تنجزه ساعتها برضه، هتحس إنك ماعندكش حاجة تصحى الصبح علشانها كل يوم، وبالتالي برضه شغفك هيقل تجاه أي حاجة تانية، وهنلاقي برضه لما يغيب التقدير بكل أشكاله، لإن مين مننا مش بيحب يسمع مدح فيه وفي شغله وفي أي حاجة بيعملها؟ مين في عز ما هو خلاص هيستسلم وكلمة إيجابية واحدة تتقال في حقه، فتديلوه دفعة لقدام علشان يكمل.
فقدان الشغف ممكن يبقى أسوء من الاكتئاب، لإن الاكتئاب دايمًا ممكن تلاقيله مخرج لو حاولت تعمل الحاجات اللي بتحبها، ناس كتير بسبب اكتئابهم بقوا مبدعين لإنهم خرجوا طاقة الحزن في حاجات زيّ الرسم أو الكتابة، بس مع فقدان الشغف أنت حتى الحاجات اللي بتحبها هتبطل تعملها مفيش حاجة هتجذبك أصلًا علشان تعملها!
كلها أسباب ممكن تفقد شغفنا بالتدريج ومن غير ما نحس نقع في الحفرة، طب هو كده خلاص مفيش مخرج؟ لأ أكيد فيه، بس الأهم إنك ماتستسلمش لأي لحظة وحشة تعدي عليك وتدور بنفسك لحد ماترجع تاني تحس بالحاجات الحلوة اللي في حياتك.