إلبس الماسك بتاعك: اكتشاف 3 إصابات بمتحور أوميكرون في مصر ورفع حالة الطوارئ

جائحة الكورونا لسه مستمرة والخطر لسه موجود، ومتحور أوميكرون الجديد بيظهر مستوى جديد من الخطورة حيث أعلنت وزارة الصحة والسكان يوم الجمعة عن خروج 700 حالة تعافت من فيروس الكورونا من المستشفيات، وده بعد ما أخدوا الرعاية الطبية المطلوبة واكتمل شفائهم طبقًا لإرشادات منظمة الصحة العالمية، وبكده وصل إجمالي عدد المتعافين من الفيروس لـ 310749 لحد النهاردة.

ووضح الدكتور حسام عبدالغفار المتحدث الرسمي لوزارة الصحة والسكان، إنه تم تسجيل 910 حالة جديدة أظهرت التحاليل إنها إيجابية بالفيروس، وده ضمن إجراءات الترصد والتقصي والفحوصات المطلوبة واللي بتعملها الوزارة وفقًا لإرشادات منظمة الصحة العالمية، وأشار عبدالغفار لوفاة 43 حالة جديدة.

وفي إطار الإجراءات الاحترازية والوقائية اللي بتتخذها مصر في منافذ دخول البلاد في كل المطارات والموانئ، علشان تواجه فيروس كورونا والمتحورات الجديدة، تم منع دخول عدد من الوافدين في مطار القاهرة بعد اكتشاف إصابتهم بفيروس كوفيد-19 ورجعوا بلادهم.

أما بخصوص متحور أوميكرون الجديد، وضحت وزارة الصحة والسكان إنه تم اكتشاف تلات حالات إيجابية للمتحور أوميكرون، ضمن 26 حالة مصابة بفيروس كورونا تم اكتشافها، وتم عزلهم في مستشفيات العزل واتخاذ جميع الإجراءات الاحترازية للمخالطين.

وطبقًا للوزارة في حالتين ماعندهمش أي أعراض والحالة التالتة عندها أعراض خفيفة، وتم عزل الحالات علشان يتم متابعتهم من الفريق الطبي، وتم اتخاذ كل الإجراءات الاحترازية للمخالطين، ولحد اللحظة دي ماتمش الكشف عن أي حالات جديدة في المطارات والموانئ.

وطلبت وزارة الصحة والسكان من المواطنين الالتزام بجميع الإجراءات الوقائية والاحترازية لفيروس كورونا، ولبس الكمامة والحفاظ على التباعد الجسدي، وطلبت من المواطنين إنهم ياخدوا لقاحات فيروس كورونا في أسرع وقت لحمايتهم من خطر الإصابة بالفيروس.

وبكده لازم المصريين ياخدوا بالهم في الأماكن المزدحمة والعامة ويلبسوا الماسك طول الوقت ويلتزموا بالتباعد الإجتماعي وأهم حاجة إن الناس اللي ماخدتش اللقاح بتاعها تلحق تاخده في أسرع وقت لإن اللقاحات المتوفرة للفيروس حاليًا بتشتغل على متحور أوميكرون الجديد وبتحمي من الإصابة، وعلشان ماندخلش في ظرف سئ من الجائحة توصل المستشفيات لإزدحام شديد ومانقدرش نلاقي أماكن للمرضى، لازم ناخد بالنا ونلتزم بالإجراءات الاحترازية للجائحة زيّ ما كُنا ملتزمين بيها في بداية الإنتشار.

آخر كلمة: ماتفوتوش قراء: مصر هتزود الضرائب على السفر وتذاكر السينما والمياه الغازية وسلع تانية

تعليقات
Loading...
Tweet
Share
Share
Pin