إزاي تعرفوا إنه عندكم نقص فيتامينات وإزاي تعالجوه بطرق بسيطة؟

نقص الفيتامينات في الجسم ممكن يعمل مشاكل صحية كتيرة وأنتم مش واخدين بالكم إن أساسها بسيط لأنه كتير بنحس بأعراض ونفتكر إنها لاقدر الله أمراض خطيرة وهي في الأساس نقص فيتامينات مهمة في جسمكم، وسهل معالجتها كمان بطرق بسيطة جدًا من غير حتى الحاجة لأدوية.

وعلشان كده احنا اتكلمنا مع أخصائية التغذية، د/ ندى بهاء، علشان نقولكم إزاي تعرفوا إنه عندكم نقص فيتامينات من خلال أعراض بسيطة، وإزاي تعالجوه بمكونات طبيعية.

عن: pexels

د/ ندى عرفتنا إنه من أهم الفيتامينات لجسم الإنسان وأكثرهم شهرة فيتامين د، وفيتامين أ، وفيتامين ك، وفيتامين هـ، ودول الفيتامينات اللي بيتم تخزينهم في الخلايا الدهنية والكبد، وهنشرح أعراض وطرق علاج بسيطة لكل واحد منهم.

فيتامين د

فيتامين د من أهم الفيتامينات اللي ليها تأثير كبير على صحة العظام والمساعدة في علاج أمراض البهاق والصدفية، والمساعدة على التعلم وزيادة التركيز، وغيرها من الفوايد. بيعتبر نقص فيتامين د في الجسم مؤشر خطير لازم ننتبه ليه ونعالجه، ومن أعراض نقصه في الجسم:

  • التعب: وده بيكون ظاهر من أقل مجهود فتلاقي نفسك بتتعب بسرعة.
  • آلام في العظام والظهر.
  • كآبة وتغير في الحالة النفسية للأسوء.
  • ضعف التئام الجروح.
  • آلام العضلات وتساقط الشعر.
  • وعلى المدى الطويل ممكن يؤدي إلى هشاشة العظام، والزهايمر، والسمنة.

ومن أهم المصادر الطبيعية للحصول على فيتامين د

  • التعرض للشمس لمدة كافية بعيدًا عن ساعات الذروة للشمس اللي بتكون فيها آشعة ضارة.
  • سمك الرنجة.
  • المشروم.
  • سمك السالمون، والسردين، والتونة.
  • البيض.
  • سمك الماكريل وثعبان البحر.
  • الكبد البقري.

فيتامين أ

عن: vitacost

فيتامين أ من أهم الفيتامينات اللي بتساعد على تحسين الرؤية، وتعزيز نمو العضلات، وتحسين المناعة، وكمان ضبط نسبة الكوليسترول في الدم، وإصلاح الأنسجة، والوقاية من السرطان. ومن أهم علامات نقصه في الجسم:

  • التهاب الجفن.
  • ضعف الأظافر فبتكون هشة وبتتكسر بسهولة.
  • العمى الليلي.
  • الجلد الجاف والمتقشر.
  • عدوى الجهاز التنفسي، وجفاف والتهاب العين.
  • الأرق والاكتئاب.

ومن أهم مصادر الحصول عليه

  • الكبد البقري.
  • الجزر والبطاطا الحلوة والبيض.
  • سمك التونة.
  • الزبدة.
  • اللبن.
  • البروكلي، والبرتقال، والفلفل الحلو، وقرع العسل، والكرنب.
  • سمك السالمون.
  • الطماطم، والشمام، والسبانخ، والمشمش، والفستق، والمانجو.

فيتامين ك

ضروري لدعم صحة القلب، ومحاربة السرطان، وتحسين وظائف المخ، والحفاظ على صحة الأسنان واللثة، وبيحسن كثافة العظام. ومن أعراض نقص فيتامين ك في الجسم:

  • سهولة الإصابة بالكدمات.
  • نزيف الأنف.
  • نزيف حاد من الجروح.
  • غزارة في الدورة الشهرية، ونزيف من القناة الهضمية.
  • دم في البول والبراز.

ومن مصادر الحصول على فيتامين ك بطرق طبيعية:

  • السبانخ، والبروكلي، والكبد البقري.
  • الدجاج والكرنب.
  • الفاصوليا الخضراء.
  • البرقوق والكيوي.
  • الأفوكادو، والزبادي، والبصل الأخضر.

فيتامين هـ

عن: Pexels

من أشهر فوايد فيتامين هـ إنه غني بمضادات الأكسدة، وبيساعد على كثافة الشعر، والمساعدة في علاج الزهايمر وتوازن الهرمونات، وكمان بيساعد في علاج أمراض الأكزيما والصدفية. ومن أعراض نقصه في الجسم:

  • مشاكل في الجهاز الهضمي.
  • الشعور بالألم والوخز، وجفاف في الجلد.
  • ضعف العضلات.
  • بطء التئام الأنسجة، وتقلصات في الساق.
  • تساقط الشعر.

ومن أهم مصادر الحصول عليه:

  • بذور عباد الشمس.
  • اللوز، والبندق، وزبدة الفول السوداني.
  • المانجو، والبروكلي، والكيوي.
  • الأفوكادو، والسبانخ، والطماطم، والبطاطا الحلوة.
  • الفلفل الأحمر، والبقدونس، والزيتون، والصنوبر.

آخر كلمة: لازم تاخد بالك من الأعراض دي، ولو لاحظت وجودهم عالج نقص الفيتامينات فورًا

تعليقات
Loading...
Tweet
Share
Share
Pin