إزاي الصحاب ممكن يكونوا سبب فشلك في الشغل أوالجامعة؟

مش عارفين عالمنا كان هيمشي إزاي من غير أصحابنا، الصحاب اللي معانا في الحلوة والمرة، واللي بنعتمد عليهم في كل حاجة تقريبًا، ونحكيلهم على الكراش والإكس، ومشاكل البيت، ومشاكلنا النفسية، ونظبط قعدتنا في القهوة أو نظبط لخروجة كبيرة أخر الشهر بعد ما نقبض، واللي أكيد بيكون في خناقات كتيرة ما بيننا ولكن في الأخر بنبص ونكتشف إننا مالناش غير بعض، والأصحاب بيكونوا في المدرسة والجامعة والشغل وفي العيلة والجيران والتمرين، ولكن هنتكلم عن أكتر اتنين بنشوفهم ونتعامل معاهم يوميًا وهما صحاب الشغل والجامعة اللي بنفكر إنهم موديننا في داهية ولكن في الحقيقة اللي بنفكر فيه كلنا هو إحنا هنستحمل إزاي قرف الجامعة أو ضغوطات الشغل من غيرهم، وفي منهم أنواع كتيرة هنلاقيهم في الناحيتين، فتعالوا نعرفهم.

صاحبك الجعان

عن: steemit

صاحبك اللي عايز ياكل على طول ويقولك يلا نطلب دليفيري أو يلا ننزل الكشك، ويلا نسيب التاسك ونقوم ناكل اللانش بوكس في المطبخ أو يلا ننزل الكافيتريا ونطلب سندوتش بطاطس بالتومية ونفكس للمحاضرة، هو مش بس بيخليك تهرب من اللي وراك، لا ده كمان بيضيعلك فلوسك وبيتخنك.

صاحبك الفرفوش

عن: 123rf

صاحبك اللي عايز يفرفش على طول ويشغل أغاني ومهرجانات، ويلا نضحك شوية، ويلا نتريق شوية، ويلا نتفرج على كوميكس شوية، ويلا نرقص شوية.

صاحبك المكتئب

عن: twitter

صاحبك اللي عايز يموت دايمًا، وشايف سواد الدنيا كلها قدام وشه، وعلى طول متضايق وزعلان وشكاء بكاء زيّ أخت طه حسين، وينقل اكتئابه ليك.

صاحبك الكسلان

صاحبك اللي تعبان وعايز ينام على طول، وكل يوم الصبح بيغريك إنك ماتنزلش وتكمل نوم، وكل شوية يتاوب وتلاقيه نايم على جنب في أي حتة يلاقيها قدامه.

صاحبك المبذراتي

صاحبك اللي كل ما يشوف وشك يقولك تعالى نعمل شوبينج أونلاين، أو يقولك إيه رأيك بعد ما نخلص شغل أو جامعة نعدي على المحل إياه نصرف فيه اللي ورانا واللي قدامنا.

آخر كلمة: ماتفوتوش قراءة: المصري معروف بجبروته! أغرب حاجات لقيناها على OLX مصر.

تعليقات
Loading...
Tweet
Share
Share
Pin