محاربة الاكتئاب الشتوي: أكلات هتساعدك تحسن مزاجك في الشتاء

أول ما تبدأ السما تغيم، والليل يجي من الساعة 5 كده، والهواء الساقع يوجعلك كل عضمة في جسمك، بنبدأ نعرف إن الاكتئاب المصاحب للشتاء على وصول! للي مايعرفش اللي إحنا بنتكلم عنه، الاضطراب العاطفي الموسمي هو نوع من الاكتئاب بييجي نتيجة تغير الفصول.. وبتبدأ الأعراض تزيد لحد ما توصل للذروة خلال شهور الشتاء، فلو انت من الناس دي وقادر تحس بالمعاناة، وبما إن لسه فاضل شوية حلوين لحد ما الصيف يجي، خلينا نقولك على شوية أكلات يبقوا هما سلاحك في مكافحة الاكتئاب اللي بيهجم عليك، لإن مثبت علميًا إن الأنواع دي من الأكل بتساعد في التحسين من الحالة المزاجية.. فهنشرح بطريقة مبسطة وباختصار مكونات الأكل وتأثيرها علينا، وفقًا لبحوث علمية.

الشوكلاتة الدارك

أظن فتحنا نفسك على المقالة صح؟ الشوكلاتة اللي كده كده الكل بياكلها سواء هي صحية أو لأ، الحقيقة نحب نقولك إن النوع الدارك أو الـ”dark chocolate” بيحسن الموود، وده بيرجع للعامل النفسي اللي تلقائيًا بيتحسن لما يستمتع بطعم الشوكلاتة اللي حرفيًا “طعم السعادة” وكمان لوجود عناصر في نبات الكاكاو نفسه اللي بيساعد في زيادة تدفق الدم في الدماغ.

الفاكهة ومنتجات الألبان

خصوصًا الفراولة والتوت وكمان الموز، فالفراولة والتوت بيمنعوا إفراز هرمون الكورتيزول، وده اللي بتفرزه المعدة وقت التوتر، وبكده بيساعدك تكون أهدى وأكتر قدرة على التحكم في عواطفك.. أما بالنسبة للموز، فوجود الماجنيزيوم كعنصر من عناصره مُثبت إنه بيحسن القدرة على النوم وبيقلل القلق، ودول من الحاجات المهمة اللي بيعاني منها الناس في الاكتئاب الموسمي.

السلمون والأسماك

بيحتوي السلمون على نسبة عالية من الأوميجا 3، وكمان هو مفيد لإنه مصدر كبير للبروتين خالي من الدهون، وبيحتوي على كتير من الأحماض الأمينية واللي ليها تأثير إيجابي على المزاج العام وكمان مصدر للطاقة اللي بيساعدك تتغلب على الشعور بالتعب والإرهاق.. ده بينطبق على السلمون، وأي نوع بروتين خالي من الدهون.

الزبادي ومنتجات الألبان

لما تكون نسبة فيتامين B12 قليلة في الدم، ده بيسبب اكتئاب، وعلشان كده الزبادي والبيض والجبن واللبن كلهم بيساعدوا على تحسين الحالة المزاجية لتواجد عنصر الفيتامين B12 فيهم.

المكسرات والشوفان

الشوفان مصدر رائع “للألياف” اللي بتساعد في إبطاء عملية الهضم، وده اللي بيسمح بالإفراز التدريجي للسكر في الدم علشان مستوى الطاقة في الجسم يستقر. وخلال بعض الدراسات، أثبت إن اللي بياكلوا شوفان على الفطار، حالتهم المزاجية بتبقى أحسن لإن مستوى الطاقة والسكر في الدم بيبقى مستقر أكتر وده اللي بيساعد على التحكم في التقلب المزاجي أو العصبية.. أما المكسرات فبتحتوي على التربتوفان، وهو حمض أميني مسؤول عن إنتاج السيروتونين المحسن للمزاج، اللوز، والكاجو، والفول السوداني، والجوز، والسمسم، وبذور عباد الشمس، كلها مصادر ممتازة لتحسين الحالة المزاجية.

آخر كلمة: ماتفوتوش قراءة: ” إزاي تعرفوا إنه عندكم نقص فيتامينات وإزاي تعالجوه بطرق بسيطة؟

تعليقات
Loading...