أول ميدالية ذهبية لقطر فاز بيها فارس حسونة.. مصري يحمل الجنسية القطرية

حصد فارس حسونة أول ميدالية ذهبية في أولمبياد طوكيو 2020 في لعبة رفع الأثقال باسم دولة قطر، وحقق رقم قياسي أولمبي، بوزن إجمالي قدره 402 كغم (177 كغم في منافسات الخطف، و225 كغم في منافسات النتر وهو رقم قياسي أولمبي كمان).

اترفع علم قطر واتغنى لها النشيد الوطني ونالت ميدالية ذهبية في إنجاز رياضي مبهر ومشرف وبرقم قياسي عالمي جديد.

مين هو فارس حسونة بطل رفع الأثقال؟

هو بطل رفع أثقال مصري حامل للجنسية القطرية، اتولد 1998 (23 سنة) في محافظة الغربية بمدينة المحلة الكبرى، في شارع سعد زغلول بمنطقة البوظ.

بدأ في رفع الأثقال بنادي 23 يوليو بالمحلة بسبب تأثره بوالده إبراهيم حسونة، نجم المنتخب المصري لرفع الأثقال، واللي حقق لمصر عدد كبير من الميداليات الذهبية في بطولة أفريقيا، وقاد تدريب منتخب مصر للأثقال قبل ما يدخل في خلافات مع اتحاد رفع الأثقال واللي قرر بسببها يسيب تدريب المنتخب المصري.

لعب باسم مصر في رفع الأثقال خلال تلات دورات أولمبية، في 1984 و1988 و1992.

حقق فارس إبراهيم حسونة لقب بطولة العالم في رفع الأثقال للشباب مرتين، وحقق المركز التالت في بطولة آسيا 2020 لوزن 104.

ودي تاني مشاركة لحسونة بعد أولمبياد ريو 2016 في وزن 85 كجم، لما كان عنده 18 سنة وأخد مركز سابع جيّد. تأهل للألعاب الحالية بعد فوزه بذهبية وزن 96 كجم في كأس قطر الدولية.

الميدالية الذهبية اللي فاز بيها حسونة هي السادسة في تاريخ قطر في الأولمبياد، بعد 4 برونزيات وفضية، وتعتبر الذهبية التانية للعرب في أولمبياد طوكيو 2020 بعد ذهبية أحمد حفناوي لتونس في السباحة.

تاريخ الهجرة من مصر لقطر

أول رحلة لإبراهيم حسونة برا مصر كانت في 2006 لما أخد مسئولية تدريب منتخب السعودية لرفع الأثقال وقدر يقودهم لأولمبياد بكين في 2008. رجع بعدها لمصر لكن سافر مرة تانية للإمارات في 2009.

سافر قطر في 2013 بعد ما الخلافات بينه وبين اتحاد رفع الأثقال في مصر وصلت لحيطة سد. وفي قطر تولى مسئولية تدريب بعض نوادي رفع الأثقال.

وفي حواره مع يلا كورة قال: “قصة فارس مالهاش علاقة بسفري لقطر في 2015، في وقتها كان لسه عيل صغير وماكانش عندنا أي ترتيبات للعب باسم دولة قطر”.

وأكد إن في قطر الاهتمام كبير بإعداد بطل أولمبي على عكس المناخ العام في مصر اللي مليان مشاكل وصراعات. على حد تعبيره.

وقال: “قالوا لي هتعمل إيه في طوكيو 2020؟ مضيت إنه هينافس على ميدالية ذهبية وده اللي اتحقق بالفعل علشان أنا اللي دربته بنفسي”.

آخر كلمة: ماتفوتوش قراءة: أول ميداليات مصر في أولمبياد طوكيو: هداية ملاك وسيف عيسى أبطال التايكوندو بالبرونزية

تعليقات
Loading...
Tweet
Share
Share
Pin