أغاني الأفلام ازاي بيتم توظيفها دراميًا لخدمة العمل الفني؟

اتكلمنا قبل كده عن أشهر أغاني الأفلام المصرية اللي علقت معانا ومش بننساها بمرور الزمن، بس في الحقيقة في عوامل كتير بتبقى سبب في نجاح الأغنية بغض النظر عن الصوت اللي بيأديها، مع إن ده عامل مهم من عوامل نجاح الأغنية بس في عوامل تانية بتساعد وبتبرز الصورة، زيّ المشاهد اللي بتبقى في أغاني الأفلام وازاي في دقائق معدودة لخصت الفيلم ووصلت الإحساس وازاي تم الاستفادة منها دراميًا وكانت إضافة حقيقية للفيلم.

النور مكانه في القلوب

الفيلم كله كان عامل حالة مختلفة، بيحكي عن معاناة المكفوفين وازاي ممكن يقابلوا صعوبات في الحياة ويتعرضوا للتنمر، بس في الأخر عدوا كل ده! والأغنية اللي في نهاية الفيلم بصوت مدحت صالح وبأداء عادل إمام في المشهد الأخير وهو بيتم تكريمه كواحد من المكفوفين اللي قدروا إنهم ينقذوا حياة ناس معاه في الدار ويقبض على واحد من أخطر المجرمين، وكلمات الأغنية “يا تكون قد الحياة يا تعيش وحيد وسط الدروب” قدمت رسالة إن “العمى” زيّ ما بيقولوا عليه الناس السطحية بيبقى في القلوب وإن في ناس بصيرتها أقوى من نظرها.

واحد من الناس

الفيلم كان بطولة كريم عبد العزيز ومنة شلبي وكان بيتكلم عن معاناة الطبقة المتوسطة في وسط أصحاب المصالح والقوى الأكبر في المجتمع، الفيلم كان صادق وحقيقي وكسب تعاطف الجمهور خصوصًا بعد ما اتقتلت منة شلبي وبعد ما كان دورها مشاهد معدودة بس ساب بصمة وتعاطفت معاه الناس، وجات الأغنية علشان توصف كل الحالة دي بكلمات أثرت فينا كلنا بصوت وإحساس لؤي.

أنا مش هخاف المرة دي

في فيلم ظرف طارق بطولة أحمد حلمي ونور والأغنية تم توظيفها دراميًا مش بس علشان تبين محاولة طارق إنه يوصل لحبيبته ويمنعها من الجواز، بس كانت في رسالة تانية إنه قدر يتغلب على عقدة حياته وخوفه الوحيد من الأماكن المرتفعة والأغنية وكلماتها كانت متماشية مع حالة تحرره من عقدته.

سألت نفسي كتير

الأغنية كانت بمثابة قناع بيقع وبيبين شخصية أحمد عز في الفيلم الحقيقية، بعيدًا عن النصب والاحتيال والقضايا اللي كانت عليه، بينت إن ازاي ممكن الإنسان ممكن يتغير لو جات له الفرصة إنه ينسى ماضيه، لإن مش دي فطرته.

أصحاب ولا بيزنس

الأغنية كانت عبارة عن فلاش باك سريع لعلاقة صداقة قوية ربطت بين 3 أصحاب من أيام الجامعة لحد الشغل ومكملين في رحلة حياتهم، وكانت عايزة تقدم رسالة إن هل ممكن تقف المصالح في طريق الصداقة ولا لأ.

أخر كلمة: ماتفوتوش قراءة: 10 أعمال فنية قدر مدحت صالح إنه يِبَروزها بصوته

تعليقات
Loading...
Tweet
Share
Share
Pin