مدحت صالح مانقدرش ننكر موهبته في الغنا بأي حال من الأحوال، بس النادر والمميز عنده واللي مش بنلاقيه في نجوم ومطربين كتير. إنه لما بيغني أغنية لفيلم أو بيغني تتر لمسلسل، مش بتبقى أغنية كده وخلاص أو مجرد جزء تكميلي لعناصر العمل الفني، لأ دي بتبقى عنصر أساسي وسبب أساسي في نجاح العمل ده، وبعد ما بيخلص العمل والناس تتفرج عليه ويعدي سنين، بتلاقي الناس أول حاجة بتفتكر العمل بها هي الأغنية!
مفيش شك إن كل الأعمال والأفلام اللي غنى لها مدحت صالح كلها عظمة من الألف للياء، من طاقم التمثيل لأداء تمثيلي حرفي وعالي لإخراج لقصة وسيناريو. ومع كل مقومات النجاح دي، تقدر تقول إن مدحت صالح قدر إنه يِبَروز العمل من خلال الأغنية أو التتر اللي قدمه. وده طبعًا بجانب كلمات الأغنية اللي لخصت الحدوتة والألحان اللي وصلت الإحساس.
غنى حوار بين الأب والابن وماقدرش يمسك مشاعره وبكى وهو بيسجل الأغنية في تتر مسلسل حضرة المتهم أبي، وغنى عن حب الوطن برغم كل العيوب في فيلم مافيا، وغنى عن حبنا للحياة وتمسكنها بها برغم الصعوبات في فيلم أمير الظلام، وغنى الرومانسية والحب في فيلم حرب إيطاليا وأبو علي، وغنى عن مشاكل الحياة في البلياتشو، وغنى عن العيلة في أبو العروسة.