أطفال كبروا على الشاشة: مين من المواهب الصغيرة قدر يكمل في طريق الفن؟

معظم القصص السينمائية والدرامية، بتحتاج لأطفال ومواهب صغيرة علشان يكملوا الحبكة الدرامية والقصة، اللي أكيد بيبقوا متواجدين في أي عيلة.. ومن خلال تجسيد بعض الأطفال لأدوارهم، في اللي بيمر مرور الكرام على المشاهدين، وفي اللي بيتوقف الناس عندهم، لإن موهبتهم وحضورهم على الشاشة بيفرض وجودهم، وجذب الانتباه ليهم.. ففي بعض من الأطفال دول اللي كان باين إن عندهم موهبة حقيقية وتوقعلهم الجمهور بمستقبل كبير من النجومية.. فتعالوا نفتكر بعض من الأطفال دول، ونشوف وصلوا لفين دلوقتي، وإذا كان فعلًا قدروا يكملوا في طريق الفن ولا خدوا طريق مختلف.

منة عرفة

منة عرفة لفتت الأنظار من أول ظهورها من وهي عندها 6 سنوات في فيلم “مطب صناعي” وست كوم “راجل وست ستات”، اللي حرفيًا كبرت فيه على الشاشة قدام الجمهور، وده بالمناسبة اللي خلى كتير مش قادر يتقبل أدوارها كشابة لإنها بقت في نظرهم الطفلة الصغيرة اللي شافوها في مجموعة كبيرة من المسلسلات.. وبالرغم من إن نجاحاتها وهي صغيرة كانت مديانا انطباع إن هيكون ليها تواجد أكبر في الأعمال الفنية، وهي لسه مستمرة في تقديم الأعمال حتى الآن، ونعتقد إن بالوقت هنشوفها واخدة حقها في أدوار أكبر وأكتر.

مها عمار

مين فينا يقدر ينسى “ماتقوليش يا أمورة” ودويتو كريم عبدالعزيز مع الطفلة الجميلة مها عمار؟ مها من الأطفال اللي ظهرت من سن صغير أوي، لما ظهرت لأول مرة في فيلم “ليه خليتني أحبك” لما كان عندها 6 سنين، وبعدها اشتركت في مجموعة من الأفلام المهمة زيّ فيلم حرامية في KG2، والسلم والتعبان، وخالتي فرنسا.. والمبهر فيها كان خفة دمها، أدائها العفوي، وقدرتها على تجسيد أدوار مختلفة وهي في سن صغير جدًا.. ورغم موهبتها الكبيرة والواضحة لكن بعدت عن التمثيل خالص بعد ما كبرت.

يوسف عثمان

مهما كبر يوسف في السن، هنفضل دايمًا فاكرينه بشخصية نعيم في فيلم “بحب السيما”، اللي قدر فيه إنه يثبت نفسه كفنان من العيار التقيل اللي أدى دور صعب، وواخد مساحة كبيرة نسبيًا من وهو لسه طفل صغير.. وشوفنا بعد كده في مجموعة من الأفلام والمسلسلات المختلفة.. ورغم إن تواجده بدأ يقل في فترة، لكنه رجع بقوة من كام سنة وقدم كذا مسلسل زيّ زلزال، ولآخر نفس، والميزان.

ملك ومريم قورة

الأختين ملك ومى قورة ظهروا في طفولتهم.. فشوفنا مريم في فيلم “غاوي حب” مع محمد فؤاد، وملك قورة في مسلسل “نور الصباح” لليلى علوي.. ورغم إن الاتنين عندهم كاريزما وحضور على الشاشة، لكن اختارت مريم إنها تبتعد عن تقديم أعمال فنية وهي كبيرة، لكن ملك استمرت في التمثيل، فشوفناها مؤخرًا في أكتر من عمل زيّ مسلسل عهد، ونصيبي وقسمتك.

نهاد نور

في فيلم “زكي شان” ظهر نهاد نور لأول مرة، والكل حب طريقة تمثيله وأدائه في الفيلم، وده اللي خلانا نشوف ليه أكتر من مسلسل اللي عملهم في أعمار مختلفة زيّ الحب كده، وريش نعام، وقيد عائلي.. ورغم إنه بيجي وبيختفي فجأة، إلا إن دايمًا وجوده ورؤيته في أي مسلسل بيبقى مرحب بيه جدًا!

جنا عمرو

بدأت جنا تمثيل وهي عندها 6 سنين لما خدت دور كبير في فيلم “سامي أكسيد الكربون”، ولفتت الأنظار جدًا وقتها لخفة دمها، وإنها قدرت تستخدم تعابير وجهها في التمثيل بطريقة احترافية.. وشوفناها بعد كده في كذا فيلم ومسلسل زيّ فيلم كلبي دليلي، ومسلسل الشوارع الخلفية، وحتى قدمت برنامج كامل باسمها “الليلة مع جنا”، ولكنها فجأة اختفت من الساحة وبطلت تقدم أي أعمال فنية.

ملك وليلى أحمد زاهر

طبعًا بنات الفنان أحمد زاهر، ملك وليلى معروفين من وقت ما طلعوا في سلسلة أفلام “عمر وسلمى” وفعلًا كانت أدوارهم محورية وبتضيف للفيلم. وبعد كدة شوفنا ليلى أحمد زاهر في كذا مسلسل وإلى الآن مستمرة في تقديم أدوار مختلفة، كان أخرهم مسلسل الفتوة سنة 2020. أما بالنسبة لملك فكانت متوقفة عن التمثيل من وقت ما كانت طفلة ومرجعتش غير السنة دي بس من خلال دورها في مسلسل لؤلؤ.

آخر كلمة: ماتفوتوش قراءة: نجمات زمان ودلوقتي: إزاى اختلف مفهوم الجمال والنجومية على مر السنين؟