أدوار بنحبها للراحل أحمد خليل ماينفعش تتنسي

النهارده فقدنا فنان بنحبه وأثرت فينا أدواره على مدار سنين كان بيقدم فيها شغل بيحبه وبيقدمه بكل شغف، الفنان أحمد خليل توفى عن عمر بناهز 80 سنة، متأثرًا بإصابته بفيروس كورونا.. اللي للأسف بسببه فقدنا ناس كتير بنحبهم.. بس أحمد خليل من الناس اللي سيرتهم هتفضل عايشة لإنه سايبلنا بصمته في أعمال فنية كتير قريبة لينا مش ممكن ننساها.. وحابين نفتكر بعض الأدوار المفضلة اللي هنفضل فاكرينه بيها.

عطا المراكيبي

في واحد من أهم المسلسلات في تاريخ الدراما المصرية، وضم نجون كتير، كل واحد فيهم بيفتخر إنه في مسيرته الفنية دور في مسلسل حديث الصباح والمساء.. الفنان أحمد خليل قدّم دور الناس لحد دلوقتي بتتكلم عنه، باختلاف الأجيال اللي حبت المسلسل وتابعته على مدار سنين، عطا المراكيبي من أهم أدوار أحمد خليل وأقربهم لجمهوره.

رياض بيه

في بلوت تويست من قبل ما تبقى تريند، أحمد خليل قدم دور الشرير اللي بنكتشفه في آخر لحظة وبيطلع ورا كل المصايب اللي بتحصل في الفيلم، في فيلم جاءنا البيان التالي مش هننسى رياض بيه بعد ما لف الكرسي واكتشفنا إنه رئيس العصابة، و”الكلام ده معناه إن الواد ده كشفني أنا شخصيًا” اللي لحد دلوقتي بنشوف عليها ميمز.

بكر أبو شهاب – قصة الأمس

الناقد الأدبي المثقف في مسلسل قصة الأمس، اللي ألقى مونولوج “الكلمة” لعبدالرحمن الشرقاوي، بكل سلاسة، وكمان عرف يقوم بدور الأب اللي عارف امتى يكون حنين، وامتى ياخد مواقف في الخلافات بين بنته وزوجها، واتشهر مشهد “الكلمة” وبقى علامة في مسيرته.

علي باشا ماهر – الجماعة

في مسلسل الجماعة، أحمد خليل قام بدور مهم في المسلسل اللي حقق نجاح وحجز مكانه في الدراما المصرية، بدور علي باشا ماهر صاحب المقام الرفيع ومستشار الملك فؤاد.

عم رمضان – ورا كل باب

في أحدث أعماله في مسلسل ورا كل باب، الأب الحنون، واللي كمان بيساعد الناس اللي حوليه واللي بيشتغلوا معاه، من مواقف جد لواقف مضحكة، قدم دور مميز مش هننساه.

عزيز -إلا أنا

في آخر عمل فني للفنان أحمد خليل في مسيرته الفنية.. مسلسل إلا أنا، في حدوتة حكايتي مع الزمان اللي بيتعرض دلوقتي، وقدم فيه دور مميز، هيكون علامة رغم سيطرة الحزن بسبب إنه أخر دور قام بيه.

وغير الأعمال الفنية اللي شوفناها، صوت أحمد خليل كان صوت مميز كمان في الأعمال الفنية المسموعة، سواء المسلسلات الإذاعية، أو حتى الحملات الإعلانية اللي بمجرد ما نسمع صوته فيها بنعرفه، هنفتقد فنان حقيقي وإنسان طيب.

آخر كلمة: ماتفوتوش قراءة: ربنا يرحمه.. وهتفضل سيرته موجودة بأعماله الفنية.

تعليقات
Loading...
Tweet
Share
Share
Pin