لقينا واحنا بنقلب كده الناس بتحتفل بيوم الفيديو جيمز، ماهمناش أوي نفكر مين اخترع اليوم ده أو اشمعنا بنحتفل بيه دلوقتي، بس الجميل إننا افتكرنا أحلى ألعاب كنا متعلقين بيها واحنا صغيرين، ولحد دلوقتي يمكن بندَور عليهم ولما تحصل معجزة إننا نلاقيهم بنبقى في قمة سعادتنا، ألعاب شغلت وقتنا وتفكيرنا وخلتنا نخرج برا عالمنا الصغير في وقت ماكانش متاح فيه وسائل ترفيه زيّ دلوقتي، علشان كده حبينا نفتكر إيه هي أكتر ألعاب اتعودنا نلعبها ولسه بنحبها ونلعبها.
سوبر ماريو
من أيام الأتاري قبل الكمبيوتر كمان بفترة، تعتبر دي من أول الألعاب اللي حبيناها، بيقولوا على اللي حضر الأتاري وأيامه ده يعتبر من “الجيل الذهبي”.
GTA
Grand Theft Auto، أو “جاتا” زيّ ما ناس كتير بتختصر واخترعت لها الكلمة دي، أيًا كان بتقولها إيه، أكيد لعبت اللعبة الـ iconic دي بأي نسخة ليها، وتعتبر جزء كبير من ذكرياتنا، وكتير مننا لسه بيحب يلعبها لحد دلوقتي.
Tekken
من كل ألعاب المصارعة، دي أكتر لعبة كنا بنحبها وتقريبًا هي أشهرهم، مستحيل تلاقي حد ماكانش بيلعبها من صغره وكانت بتجمعنا واحنا صغيرين وبنحب نلعبها مع أخواتنا وأصحابنا.
طرزان
من أقدم الألعاب اللي اكتشفناها من صغرنا وكانت جزء كبير من يومنا، بنعدي فيها levels وبنفرح لما طرزان يكبر كإنه إبننا.
Chicken Invaders
الراعي الرسمي لأي جيمر مبتدئ. أغلبنا دي هتكون أول لعبة لعبناها في حياتنا واحنا صغيرين.
ازاي تخنق جارك
لحد دلوقتي احنا بنحب نلعبها من وقت للتاني ونفتكر أيامنا واحنا صغيرين، أول ما بنيجي بنلعبها دلوقتي واحنا في يومنا بنحاول نستوعب كبرنا امتى.
Feeding Frenzy
لعبة مسالمة لكل اللي مابيحبش ألعاب الحروب والمصارعة، وكمان أي سباق بيجيب له إحباط، دي كانت الوجهة المثالية ليهم.
The House Of The Dead
اللي قلبهم ميت من وهما صغيرين، زومبيز وقتل ورعب من قبل الأفلام حتى.