ياسمين عز في الفترة الأخيرة اتعرفت بالتصريحات الغريبة والمُثيرة للجدل، تصريحات بتدعم وبتروّج للعنف ضد المرأة ودايمًا عندها أراء وأفكار غير صحيحة، بس بتحب تصدرها لملايين المشاهدين. والمذيعة حبت تقول “رأيها” بخصوص المعاكسات والتحرش الجنسي.. بس يا ترى كان إيه المرة دي؟
في حوار مع الفنانة نيفين مندور، بعد اختفائها سنين من الظهور الإعلامي، نيفين كانت بتحكي عن موقف جمعها مع الفنان محمد سعد قبل تصوير فيلم اللي باللي بالك، وقالت إن هي سبق وقابلته على الطريق الصحراوي في موقف مش حابة تقول هو إيه.
بس ياسمين قررت ماتسكوتش وابتدت تحاول تخرج منها الكلام، وقالت “أكيد الموقف ده كان معاكسة طبعًا!” فردت الفنانة وقالت إن الموقف ده ماكنتش ينفع يطلع من شخصية مشهورة زيّه، بس المذيعة كان لها رأي تاني وقالت “حقه أنا لو مكانه، هعاكسك ده شيء عادي جدًا! .. لأ مش عيب قدام الجمال ده مش عيب، أنا بقولك مش عيب!”
المذيعة بتبرر التحرش زيّ ما سبق قبل كده وبررت العنف الزوجي، وقالت إن الست الأصيلة لازم تستحمل ولازم تعرف تحتوي جوزها وهو في لحظات غضبه وعصبيته، والتصريح ده كان على فيديو لعروسة بتتسحل وهي لابسة فستان فرح! حادثة زيّ دي، تديكي ألف إشارة وإشارة وأكتر من ريد فيلاج تقولك إن الشخص اللي عايزة تبدأي معاه حياتك، هو الشخص الغلط! بس المذيعة دايمًا بتصدمنا بأرائها، الأراء اللي بتضيع حقوق ستات كتير وبسببها يطلع ناس وتقول للست “ما ترضي وتضربي وتستحملي زيّ غيرك”.
لما تطلع على شاشة تلفزيون بيشوفها ملايين المشاهدين، لازم تركز مليون مرة وأنت بتقول أي كلمة ممكن الأجيال اللي طالعة تسمعها وتشوف إن ده شيء طبيعي ومُسلم به وبيحصل عادي، زيّ إنها تتربى على إن التحرش عادي والمعاكسات ممكن تبقى شيء مُحبب عند الستات، وبالمرة يعتبروا إن العنف والضرب ممكن يحصل! وده اللي هيوصل لهم لما مذيعة زيّ ياسمين تتكلم وتقول “وماله لما يعاكسك؟”
في فرق كبير بين إنك تقول رأيك، مع إن الحاجات دي مافهاش رأي، وبين إنك تطلع وتقول إن ده شيء عادي، ويلا يا رجالة اعملوا كده لإن الستات بتحب تتعاكس، وواحدة ست بنفسها جاية علشان تأكد على الكلام ده. الأفكار المسمومة والمعتقدات الغلط اللي زيّ دي، مكانها مش التلفزيون ولا الإعلام!