تحت رعاية وزارة الثقافة المصرية، بدأت الهيئة العامة لقصور الثقافة برئاسة د. أحمد عواض تنظيم فعاليات سور القاهرة الشمالي، واللي فيه هتقدم الهيئة عروض ليالي رمضان الفنية والثقافية وهتستمر لحد ليلة 24 رمضان.
وفي ظل المناسبة دي، خرجت وزيرة الثقافة د. إيناس عبد الدايم وشجعت شعب مصر على حضور الفعاليات، اللي للأسف اتلغت في 2020 بسبب جائحة فيروس الكورونا المستجد، ووضحت إن برنامج السنة دي هيكون متنوع وهيكون بيهدف لنشر التنوير والوعيّ الثقافي بين فئات الشعب المختلفة.
المسرح الروماني في قلب قاهرة المعز بيستضيف بشكل يومي فقرات فنية وثقافية مختلفة ضمن فعاليات سور القاهرة الشمالي، ومنها أوبريت السلام الوطني، وعرض فنى لفرقة أوبرا عربى بقيادة محمد مصطفى، بالإضافة عدد من الأعمال الغنائية منها “رمضان نور كل المواقع، مصر عروسة، قوم يا مصري، بلادي بلادي”، مش بس كده، ده فرقة الأنفوشى للموسيقى العربية قدمت عرض فني بقيادة هيثم مدحت فيه كل الأغاني القديمة اللي بنحبها ومنها “اهو جيه يا ولاد للمجموعة، أم النبى لنرمين محمود، كوكتيل النصر للمجموعة، أم البطل شيرين شاكر، واختتمت الفرقة بميدلي الفوازير.
بجانب ده هيكون في عدد من المعارض الفنية المختلفة، اللي هتحتوي على لوحات تشكيلية ومنحوتات من الخزف والفخار، كمان هيكون في معرض للحرف الفنية والتراثية بتبيع منتجات الحصير والنول اليدوي, بالإضافة لده هيكون في معارض بتقدم لوحات الشباب ومشغولاتهم الفنية.
أما فى جناح الورش، فتم تنظيم عدد من الورش المختلفة منها ورشة نسيج يدوى للخيامية، وورشة لتشكيل الإكسسوارات بالسلك، وورشة ثقافة الطفل اللي ضمت ورشة عمل حظاظة من الخشب، وعمل عروسة على شكل فراشة، بالإضافة لجداريات على شكل فانوس هندسي، كمان في ورش للرسم الحر وعمل لوحة من الموزاييك بالفوم والجليتر، جيه بعدهم ورشة حكي للأطفال بعنوان “سنة أولى صيام”، ناقش فيها حسام قطب فوائد الصيام ومظاهر الاحتفال بشهر رمضان، بجانب ورش الحرف البيئية والتراثية ومنها الحصير والنول اليدوي والسجاد والكليم.