البلح أو التمر من أكتر الأكلات اللي فيها كمية فوائد مهولة، بيدي لك طاقة تسندك اليوم كله، وبيساعد في تحسين الجهاز الهضمي، وبيخفف من حدة الإمساك، وبيعالج الأنيميا الحادة، ومفيد لصحة الدماغ، ده غير إنه غني بالبوتاسيوم، ومفيد لعضلة القلب. والدراسات كمان أثبتت إنه ممكن يحمي من حدوث جلطات القلب وأمراض الشرايين، وكمان بيقاوم السرطان والاضطرابات المعوية، كل دي فوائد موجودة في البلح، ولو دورت هتلاقي أكتر.
ونظرًا لفوائده اللي مش هنعدها، وبمناسبة إننا داخلين على رمضان والبلح بيبقى شيء أساسي على سفرة الفطار، حبينا نجمع وصفات نعملها من التمر طعمها لذيذ وفي نفس الوقت مفيدة.. ورقة وقلم واكتب معايا.
كرات التمر
في الأول هنجيب ½ كيلو عجوة، وربع كيلو زبدة وهنسيحها، وكوباية ونص مكسرات مشكلة مطحونة؛ بندق وفول سوداني وفستق مطحون، ونص ملعقة صغيرة حبهان (هيل) مطحون، ونص ملعقة صغيرة قرفة مطحونة.
والخطوات بسيطة أوي، هنجيب طبق كبير، هنحط فيه العجوة والزبدة اللي سيحناها والمكسرات المطحونة والحبهان والقرفة، وهنقلب كويس لحد ما يتمزجوا مع بعض. وبعدين هنشكل العجوة على شكل كور صغيرة، ونغمسها في المكسرات المجروشة، ونقدمها في الطبق، وبالهنا والشفا.
سموزي التمر بالموز
من المشروبات اللذيدة والمغذية اللي ممكن تتشرب في رمضان، خصوصًا لو كان ساقع، وتقدر تحضره في خمس دقايق. هنجيب موزتين، وتمر منزوع النوة بمعدل ¾ كوباية، وكوبايتين ونص لبن، ورشة قرفة مطحونة، ومكعبات تلج، وسكر بالمقدار اللي تحبه، وبنحط كل المكونات في الخلاط، وبالهنا والشفا.
مهلبية التمر
المهلبية من الحلويات المشهورة في رمضان، وهو الشهر الوحيد تقريبًا اللي بيكتر فيه عمل المهلبية، بس دايمًا الناس حاصرينها في نوع واحد وهو المهلبية التقليدية اللي معمولة بقمر الدين، بس لما دورنا، لقينا إن في أطعمة كتيرة ممكن يتعمل منها زيّ التمر.
في الأول، هنجيب كوباية نشا الرز، و ¾ كوباية سكر أبيض، وأربع كوبايات ونص لبن بالتمر بس يكون دافي، وبعدين ملعقة كبيرة فانيليا، وتلات معالق كبيرة نشا بس ممكن تستغنى عنه، ومعلقتين صغيرين مياه ورد، وتلات كوبايات زبيب وزبدة.
هندوب نشا الرز مع اللبن بالتمر على النار، وبعدها هنضيف السكر ونفضل نقلب لحد ما يتقل، وبعدين هنرفعه من على النار ونحط الفانيليا ومياه الورد ونفضل برضه نقلب لحد ما يدوب، وهنحط الزبدة وكل ده واحنا لسه بنقلب، وبكده يبقى الخليط جاهز إنه يتصب في الكاسات، وممكن تزينه بالفستق، وبالهنا والشفا.
تارت التمر
هنجيب 100 جرام زبدة، وبيضتين ونص، وكوباية دقيق، ومعلقة صغيرة باكينج صودا، ومعلقة زيّها فانيليا وبكينج باودر، و¾ كوباية من السكر البني، ونص كوباية مياه سخنة، وربع كيلو تمر منزوع النواة، و50 جرام زبدة، وكوباية كريمة لباني، وكوباية سكر بني.
وبعد ما جبنا كل المكونات، هنجيب حاجة كبيرة نحطها فيها بالتدريج. في الأول هنولع النار على التمر مع المياه ومعاها معلقة بيكنج صودا ونسيبها لحد ما تطرى تمامًا، وبعدين نرفعها من على النار ونسيبها لحد ما تبرد. ونجيب حلة تانية نحط فيها الزبدة والسكر ونقلبهم كويس لحد ما الخليط يبقى كريمي، وبعدها نضيف البيض والفانيليا ونخلطهم لحد ما يتجانسوا، ونضيف التمر والدقيق والباكينج بودر بالتدريج واحنا بتقلب في كل مرة.
وبعد كده بنحط الخليط في صينية مدهونة بالزبدة، مع حمام مائي، في فرن على درجة حرارة 180 لمدة 40 دقيقة أو لحد ما نحس إنه استوى، وبالهنا والشفا.
كيكة التمر
هنجيب ربع كوباية دقيق، و50 جرام زبدة، و¾ كوباية عسل أسود، ونص كوباية سكر، وبيضتين، ونص معلقة صغيرة ملح، وربع معلقة قرنفل، ونص معلقة صغيرة باكينج صودا، ومعلقة صغيرة فانيليا، وتلات موزات مهروسة وعليها قطرات ليمون حامض، وكوباية تمر متقطع.
وبعد ما نجيب كل ده، هنخلطه في الخلاط الكهربائي مع الزبدة والسكر والعسل الأسود لحد ما القوام يبقى زيّ قوام القشطة، وهنضيف عليهم البيض ونضرب بالخلاط لمدة خمس دقايق، وبعدها نضيف الملح والباكينج باودر والقرنفل ونضرب تاني بالخلاط، ونضيف الدقيق، وبعدين التمر والموز ونخلطهم كلهم لحد ما نوصل للقوام اللي احنا عايزينه. وفي صينية مدهونة بالزبدة ومرشوشة بالدقيق، هنحط الخليط وندخله الفرن على درجة حرارة 40 لمدة 45 دقيقة، وبعدين نقدمها باردة، وبالهنا والشفا.
رمضان شهر الفرحة واللمة والحاجات الحلوة، ولإن أكتر الحلويات بتتاكل في الشهر ده بمختلف أشكالها، البلح هيبقى اختيار مميز بالنسبة لك، لإنك هتجمع ما بين فوائده وطعمه اللذيذ ووصفاته اللي ماتتعدش، ولو عندكم وصفات تاني لذيذة بالتمر اكتبوها في التعليقات.