امبارح، الأربع 2 نوفمبر، أعلنت الحكومة الهولندية إنها هتستعيد 12 مواطنة هولندية من سوريا، متهمين بارتكاب جرايم إرهابية، ومعاهم 28 من أطفالهم، في أكبر عملية استعادة لأفراد من عائلات تنظيم داعش الإرهابي، اللي بتنظمها هولندا.
وضحت الحكومة الهولندية في رسالة للبرلمان “هيتم توقيف النساء بعد وصولهم لهولندا ومحاكمتهم” وأشارت الرسالة إن الهدف من العملية هو “منع السيدات الـ 12 المشتبه بهم من العقاب”.
ووصت محكمة “روتردام” الحكومة في مايو بإعادة الستات دول خلال أربع شهور، أو تقديم التزام ملموس بخصوص الموضوع ده، وماوضحتش الحكومة المكان اللي هتيجي منه المجموعة دي، وده لأسباب لها علاقة بأمن وخصوصية أفراد المجموعة.
بتعيش عائلات الإرهابيين، اللي تم أسرهم أو اتقتلوا في سوريا والعراق، غالبًا في مخيمات بتديرها سلطات الإدارة الذاتية الكردية اللي بتطالب بلادهم باستعادتهم.
وتعتبر إعادة عائلات أفراد تنظيم “داعش” قضية حساسة في معظم دول الاتحاد الأوروبي، ومنها هولندا، من وقت سقوط التنظيم الإرهابي في سنة 2019.
وفي بداية سنة 2022، رجعت الحكومة الهولندية خمس سيدات من أفراد تنظيم داعش، وأطفالهم الـ 11، من مخيم “روج” في شمال شرق سوريا.
ورجعت أول ست لهولندا من سوريا في يونيو 2021، مع أولادها الاتنين، وأصلها من مدينة “غودا” في غرب هولندا، واتحكم عليها بالسجن تلات سنين ونص بتهمة الانضمام لتنظيم داعش.
من داعش لفرنسا: رحلة عودة صعبة
في شهر أكتوبر اللي فات، قالت وزارة الخارجية الفرنسية، إنها استعادت 40 طفل و15 سيدة لفرنسا، وإن هيئات الخدمة الاجتماعية هتكون مسؤولة عن رعاية الأطفال، ووضح مكتب الادعاء العام إن سبعة من الأطفال أيتام ومالهمش مرافق، و12 من الستات اللي رجعوا مسجونين، وفي تلاتة تانيين خاضعين لمذكرات توقيف.
ويعتبر مخيم “الهول” واحد من أشهر المخيمات اللي بيعيش فيها عائلات أفراد داعش حاليًا، وهو مخيم موجود عند الحدود السورية مع العراق، وبيعيش فيه أكتر من 50 ألف شخص، وعلى حسب بيانات الأمم المتحدة، نص سكان المخيم عندهم أقل من 12 سنة.
ووضح المنسق المقيم للأمم المتحدة في سوريا “عمران رضا” إن أكتر من 100 حالة قتل حصلت في مخيم “الهول” من بداية السنة اللي فاتت بس.