يوم الجمعة اللي فاتت، لجنة التسعير البترولي للمنتجات البترولية في مصرأعلنت انخفاض أسعار البنزين 25 قرش لكل فئات الأوكتان؛ حسب التسعيرة دي، سعر لتر الـ 95 بقى 8.5 جنيه مصريّ و الـ 92 وصل لـ 7.75 جنيه مصريّ. أما سعر لتر الـ 80 نزل من 6.5 جنيه لـ 6.25.
اللجنة قارنت بين الأسعار العالمية في الربع الأخير من 2019 وأول 3 شهور في 2020، ولاحظت انخفاض ملحوظ للأسعار في أسواق النفط العالمية بسبب أزمة وباء كوفيد-19، وترتب عليه قرار خفض الأسعار في مصر في محاولة لتخفيف العبء على المواطن في الفترة الجاية.
بيان لجنة التسعير البترولي للمنتجات البترولية وضح إن الانخفاض كان محدود ومش شامل عشان يكون في نوع من الحماية للمواطنين والحكومة على حد سواء. وده لإن للأسف الانخفاض ده مش هيستمر، اللجنة توقعت إن هيكون في ارتفاع حاد في الأسعار العالمية في الفترة الجاية، خصوصًا خلال وقت مواجهة تبعات الأزمة.
الخبراء شايفين إن دي محاولة من الحكومة لتفادي الحاجة لرفع الأسعار تاني لما أسعار السوق العالمي للبترول ترجع تزيد وده لتجنب أي موجات تضخمية ناتجة عن زيادة أسعار المواد البترولية.