من وأنا صغير وأهلي دايمًا بيحذروني من أكل الشارع، أمي كانت بتطلع كل فترة بحملة جديدة داخل البيت لمقاطعة كل الأكل اللي بيتاكل خارج البيت! كانت عمرها ما بتثق في الأكل دا، ومعتقدش إن دا عمره هيتغير؛ بس أنا كان دايمًا دا واحد من طرق أكلي المفضلة، وفي الغالب كنت باكل كتير من الشارع بس من وراها.
أكيد جزء من الإغراء بيكون سببه إن أكل الشارع رخيص وسهل تلاقيه في كل مكان، بس الموضوع وراه أسباب تانية كمان. فبيكون فيه إحساس دافي غريب كده وانت بتجرب أكل شارع في زحمة شوارع القاهرة العتيقة؛ وبتشوف ناس من مختلف الطبقات متجمعين سوا بيتشاركوا في وجبة، مش مجمّعهم غير حبهم للمطبخ المصري الأصيل.
تقريبًا تقدر تقول إن واحد من أسباب وحدتنا كشعب هي أكل الشارع المصري، وبالرغم من تحذيرات أمي المستمرة سواء كانت صح أو غلط، لازم كل فترة كده الواحد يحس بإحساس الأصالة والدفء اللي بيخلوني مع كل قطمة في الأكل أقرّب أكتر لأصلي ومكاني.
طبعًا حاليًا فيه كتير من أماكن أكل الشارع ما بيجيش من وراها غير التسمم، بس فيه كتير تانيين بيقدموا أكل نضيف وحلو مع مذاق مصري أصيل. وفي السنوات الأخيرة، ابتدينا نشوف مطاعم زي زوبا وقازوزة اللي بيقدموا أكل مصري تقليدي من الشارع بس بشكل وجو مختلف وإطار فخم.
وسواء كنت من محبي المطاعم الشعبية زي فرحات أو بتميل أكتر للأماكن العصرية الغالية، حضرنالك قائمة بأهم وأفضل مطاعم أكل الشارع المصري الأصيل.
أكل مصري تقليدي أصلي من الشارع
كبدة البرنس
في قلب واحد من أكثر أحياء القاهرة ازدحامًا وشعبية، وهو حي إمبابة، بيقع المطعم الشهير كبدة البرنس. لو رايح المطعم دا عمرك ما هتتوه، فالترابيزات والكراسي الستانلس اللي مرصوصين بعرض الشارع بيميزوا المكان وبيخلوه شبه الأماكن السياحية الضخمة. هو بالفعل واحد من علامات حي إمبابة اللي صنع اسم كبير لنفسه فبقى بينافس أكبر المطاعم المصرية في شهرته وشعبيته اللي بيخلوا من الصعب جدًا تروح وتلاقي مكان بسهولة، بس العاملين بالمكان دايمًا بيكونوا على درجة عالية من الصبر والرغبة في المساعدة.
الأكل هناك كله مصري من المطبخ التقليدي، بس أكلتي المفضلة -واللي هي أشهر حاجة ممكن تاكلها هناك- هي الكبدة. الممتع هو إنك ممكن تاكل طبق الكبدة هناك بطرق مختلفة وبكل الوصفات، من الكبدة البقري المشوية لحد طاجن الكبدة الجملي بالصلصة. نصيحة هامشية: ورقة اللحمة بالرز والملوخية هناك طبق لازم تجربه!
صبحي كابر
بخليط من الملوخية الرائعة وكفتة اللحمة الطازة، تقدر كده تقول على مطعم صبحي كابر -وهو أشهر مطاعم روض الفرج- إنه مش مجرد مطعم، هو تجربة فريدة متكاملة من كل النواحي. مؤسس المطعم بدأ بعربية صغيرة في الشارع وأصناف قليلة جدًا في المنيو، بس لأنه كان بيقدم أكل بجودة عظيمة، قدر يكبّر البيزنس بتاعه لحد ما اشترى في 2016 مطعمه الخاص جنب مكان مطعمه القديم بالظبط.
في 2018، صبحي فتح أول فرع له بره مصر في مدينة دبي الضخمة علشان ينقل المذاق المصري التقليدي لأهل المدينة المتعددي الثقافات.
كشري أبو طارق
تقدر تقول عليا إني تقريبًا زبون دائم عند أبو طارق من وأنا عندي 7 سنين، وأنا فعلًا أقدر أحلف وبدون تفكير كتير إنه بالفعل بيقدّم أحلى كشري في مصر. أنا مش عارف هل دا بسبب المكرونة المسلوقة بشكل معين ولا الرز ولا الخلطة الغريبة اللي في الصلصة، بس طبق الكشري هناك ليه مذاق مغري محدش بيقدر يقاومه.
معلومة غريبة: كشري أبو طارق بيحمل الرقم القياسي في موسوعة جينيس لأكبر طبق كشري اتعمل في العالم.
كشري التحرير
في الخناقة الدائمة بتاعة مين أحلى كشري في مصر دايمًا هتلاقي كشري التحرير موجود في النقاش وبيعترف الكل بيه كواحد من أحسن 5 مطاعم كشري في البلد. كشري التحرير بيميزه فروعه اللي متصممة بشكل عصري إلى حد كبير ومختلفة عن تصميمات أغلب مطاعم الكشري، وبطبيعة الحال مكوناته المِتبّلة اللذيذة اللي بتخلي طعمه مختلف وبتحطه دايمًا على قائمة الأفضل بجدارة.
الميزة في كشري التحرير كمان إن فروعه في كل حتة حول القاهرة، فتقدر في أي وقت تجمع صحابك وتتجهوا لأقرب فرع وتعملوا حفلة كشري معتبرة.
عز المنوفي
واحد من أقدم مطاعم الشارع في الشرق الأوسط بخلطات الكبدة والسجق الشرقي الأصيل. عز المنوفي مكانه في حي الدقي وتحديدًا تقاطع شارع الدقي مع شارع إيران، من 1976 وهو بيقدم سندوتشات الكبدة والسجق الشهيرة اللي بتخليه من أفضل مطاعم أكل الشارع في مصر. لو رحت هناك، متستغربش تمامًا من منظر الناس الكتير اللي هتلاقيهم واقفين صفوف على عربية صغيرة جدًا، وجايز تستنى ساعة على ما تقدر تاكل، وماتستغربش كمان لما تروح وتبقى عايز بس تجرب ساندوتش وينتهي بيك الأمر بتاكل 6 سندوتشات.
فيه إحساس غريب بتحسه لما بتاكل السندوتش هناك بسبب طريقة طبخ الكبدة والسجق، والتوابل اللي بتكون مطبوخة مع الأكل بالتأكيد هتخليك تطلب تاني كل مرة.
المطعم نجح جدًا لدرجة إنه فتح ثلاث فروع أخرى في المهندسين والمعادي والقاهرة الجديدة.
سامح
في مطعم سامح، كل سندوتش ليه حكاية فعلًا. أول ما فتح مطعم سامح وسط البلد، كان بيخلي الزباين تختار مكونات السندوتش، مع الوقت كان فيه سندوتشات اختارها الزباين بدأت تعجب الناس، فقرر سامح يطلق اسم كل حد اقترح مكونات معينة على السندوتش بتاعه في المنيو.
المنيو هناك هتلاقيها مليانة بأسامي ناس زي شفيق، وميخا، ومينا، وسامي وغيرهم. وهتلاقي مكونات السندوتش تحت اسم كل شخص منهم، أكتر اتنين مفضلين ليا هم شفيق وكريم علام.
فرحات
أكلة الحمام موجودة في ثقافات قليلة حول العالم، وفي ثقافات أقل بتكون مشهورة والناس فعلًا بيحبوها، وللمصادفة، المصريين بيعشقوا حاجة اسمها حمام. الحمام المحشي، المتبل بخليط من التوابل والبهارات الحارة والحلوة مع الليمون والبصل، ومشوي أو محمّر لإضافة الطعم الفحمي اللذيذ، هو أفضل أطباق مطعم فرحات.
المطعم بيُعتبر من أقدم وأشهر المطاعم المصرية اللي بتقدم طبق الحمام المحشي، بعبارة أخرى هو واحد من المطاعم اللي ماتتفوتش بشكل عام.
أكل مصري تقليدي فخم
زوبا
زوبا هو واحد من المطاعم الراقية جدًا اللي بتقدم أكل مصري شعبي في جو هادي ودافي بيخليك تحس إنك في البيت، ومعروف عنه كمان إنه مش بيستخدم أي أكل مجمد أو محفوظ. المطعم بيقدم الأكل المصري التقليدي ولكن مع محاولة إعادة اكتشافه بإضافة مكونات أو حبكات للوصفة الأصلية.
زوبا عنده فروع كتير في القاهرة الكبرى ومن المقرر إنه يفتتح قريبًا فروع في السعودية والبحرين ومدينة نيويورك الأمريكية لإتاحة الفرصة للعالم من أجل التعرف على أسرار المطبخ المصري.
كازوزة
لو بتدوّر على أكل مصري تقليدي على وجبة العشاء فكازوزة هيكون وجهتك المثالية. المكان هناك بيوفر منيو ثابتة على مدار اليوم بيكون فيها فطار مصري شعبي وأطباق غداء تقليدية في جو رائع. المكان من الداخل مصمَّم بحيث يحسسك إنك في القاهرة بس عصر مختلف، إحساس غريب هيفكرك بإحساس البيت.
كازوزة مشهور بالفطير والكبدة الإسكندراني والسجق كمان، لو عديت على المكان هناك فدول أول حاجات لازم تجربها.
الثور
هو أنا كنت مستغرب شوية في الأول لما سمعت عن وصفات الأكل الغريبة والميكسات الغير معتادة اللي بيقدمها مطعم الثور، بس الحقيقة بعد ما جربتها اكتشفت إن المطعم فاهم هو بيعمل ايه. المنيو عندهم فيها عدد كبير من الأطباق المصرية التراثية اللي فعلًا بتكون معمولة حلو جدًا، أما بالنسبة لفكرة التخليط، فالفول المصري اللي بيُقدّم داخل البوريتو المكسيكي هو بالتأكيد واحد من أحلى الساندوتشات اللي أكلتها في حياتي.
فول تانك
فول تانك هو واحد من المطاعم اللي بتقدم أكل عن طريق خدمة التوصيل فقط، وبعد تجربة كذا حاجة من المنيو المتنوعة بتاعتهم، فأقدر أؤكد لكم إن هو من المطاعم اللي ليها مستقبل وعندها اللي تضيفه لمشهد تخليط الأكلات الجاري حاليًا في مصر. المطعم بيقدّم اختيارات تقليدية للفطار، مع ميكسات غريبة وحلوة هتعجبك مع أول تجربة.
من الخلطات الرائعة هناك هي الجبنة الكيري، وصوص الباربيكيو، ووصفة السويت آند ساور الشهيرة وأخيرًا الفاهيتا! الأسعار هناك معقولة جدًا والوصفات اللي فوق دي هما أحلى اختيارات المنيو اللي لازم تجربهم.
باب الحديد
بديكوره الخشبي العتيق والخدمة الممتازة داخل المكان، مطعم باب الحديد بيعتبر من مطاعم القاهرة النامية بسرعة شديدة جدًا واللي بتقدم أكل مصري تقليدي بجودة رائعة وأسعار اقتصادية.
المكان بيشتهر بطبق السجق التركي، والكبدة الإسكندراني، دا إلى جانب طبعًا الحواوشي العظيم بتاعهم.
دسوقي وصودا
من أشهر المطاعم المصرية حاليًا بفروع تقريبًا في كل مكان في القاهرة، دسوقي وصودا هو البيت الرسمي للطواجن التقليدية المليانة جبنة اللي كلنا بنعشقها. المطعم باختصار هو قصة نجاح مصرية بدأت بفرع وانتهت بأربع فروع شغالين حاليًا.
فَسَحة سُميّة
في أعماق حي وسط البلد القاهري هتلاقي مطعم مُلوّن بالأزرق والأبيض اسمه “فسَحة سميّة”. بالداخل، هتلاقي ترابيزات مرصوصة وقاعد عليها الزبائن في انتظار انتهاء سميّة من تحضير طبق اليوم. في مطعم فسحة سمية، مفيش منيو محددة، اللي بيحصل هو إن سمية بتقرر الطبق اللي عايزة تطبخه يومها وتقدمه للكل. أول ما يخلص الأكل، المطعم بيقفل في اليوم دا ويفتح اليوم اللي بعده وهكذا.
المكان مليء بديكور رائع من الصور القديمة الموضوعة في قوالب وأُطُر خشبية جميلة، المبهج في المكان إن سمية -وهي صاحبة المطعم- بتعامل زباينها وكأنهم ضيوف في بيتها وبتفتح أحاديث جانبية معاهم سواء عن الأكل أو مواضيع أخرى فبتحس بدفء غريب من نوعه داخل المكان.
المكان فعلًا بيقدّم واحدة من أحلى التجارب اللي محتاج تخوضها وأكلهم عمره ما بيخيب.