بعد شهور من الحجر الصحي وحظر التجوال الكلي أو الجزئي، أغلب دول العالم بتتجه حالياً للتعايش مع فيروس الكورونا وعودة الحياة وحركة السفر والطيران بشكل تدريجي، وده طبعاً مع اتخاذ بعض الإجراءات الاحترازية اللي هتستمر معانا لفترة طويلة نسبياً. ففي مصر مثلا، على الرغم من ارتفاع أعداد الإصابات بفيروس الكورونا في الأيام القليلة اللي فاتت وتخطيها حاجز الألف في اليوم الواحد، إلا إن الدولة مُستمرة في خطتها للتعايش، ومركزة في تشديد إجراءاتها الاحترازية لمقاومة الفيروس زي فرض غرامات مالية على أي حد مش هيلتزم بلبس الكمامة في الأماكن العامة والمؤسسات ووسائل المواصلات.
ومع تخفيف الإجراءات ابتدت حياتنا ترجع لطبيعتها، وابدتينا نتحرك لمسافات بعيدة وكمان نسافر لأماكن مختلفة. وعلشان نقدر نحافظ على سلامتنا، لازم نطبق على نفسنا بعض الإجراءات الاحترازية الإضافية وقت السفر أو ركوب وسائل المواصلات، ودي مجموعة من النصائح اللي هتفيدكم في أغلب تحركاتكم في الفترة اللي جاية.
في حالة السفر لمسافات قصيرة
1- لو في وسيلة مواصلات للمكان اللي إنت رايحه غير الطيران، فمن الأفضل إنك تاخدها وتتجنب الطيران بقدر الإمكان في الفترة الحالية. ومن الأحسن ليك بردو إنك تتنقل بسيارتك الخاصة علشان تقدر تتجنب الاختلاط وتتجنب التعرض لمصادر العدوى.
2- لو مضطر لركوب وسيلة مواصلات عامة زي القطر أو الأوتوبيس، حاول على قد ما تقدر تتجنب ملامسة الأسطح اللي بيتم لمسها بكثافة زي شباك التذاكر مثلاً والبوابات. ولو مفيش مفر، يبقى ضروري جداً إنك تغسل إيدك بالماء والصابون بعدها مباشرة أو تطهرها بالكوحول لو مفيش إمكانية لده.
3- حاول على قد ما تقدر تتجنب ركوب المواصلات أو الوجود في الأماكن العامة في وقت الذروة علشان تتجنب التزاحم وتقدر تسيب مسافة كافية بينك وبين أقرب شخص ليك في الوسيلة اللي إنت راكبها. ممكن مثلاً لو إنت راكب أتوبيس أو ميكروباص تقعد في الكرسي اللي جمب السواق على طول بحيث تقلل تعاملك مع بقية الركاب أو تعد جمب الشباك. وضروري جداً إنك تفتح كل النوافذ الممكنة علشان تحسن دوران للهواء ويكون في تهوية جيدة.
في حالة السفر الجوي
1- لو مضطر تركب طيارة فاحرص دايماً على إنك توصل بدري حتى قبل المعاد اللي متعود عليه دايماً وده لإن في إجراءات زيادة بقت مطلوبة منك في المطار في الفترة الحالية.
2- حاول تحجز مقعد جمب شباك الطيارة علشان تقلل اختلاطك ببقية الركاب طول فترة الرحلة، وتجنب مغادرة مقعدك إلا في الضرورى القصوى. وعلشان تعزز حركة الدم في جسمك، خصوصاً في الرحلات الطويلة، ممكن تمدد وتثني رجلك في مكانك بدلاً من إنك تتحرك في الطيارة.
3- الطيارات بتتعقم وتتنضف بعد كل رحلة بشكل دوري في الأوقات العادية، ومع الإجراءات الاحترازية الجديدة عمليات التعقيم زادت بس ممكن بردو كنوع من زايدة الأمان تعقم المقعد اللي هتقعد عليه والحاجات اللي هتستخدمها في الطيارة، وحاول متستخدمش غير الحمام الموجود في المكان اللي إنت قاعد فيه وتغسل إيدك كويس جداً بعد كل تعامل أو أختلاط.
الإجراءات دي لا تغنينا عن الحاجات اللي بقت جزء أساسي في حياتنا اليومية في الوقت الحالي زي إننا لازم مثلاً منخرجش أبداً من البيت لو حسينا إننا مريضى أو حرارتنا مُرتفعة. ولازم في كل الأوقات نكون لابسين الكمامة الخاصة بينا ومننساش نستخدمها الاستخدام الصحيح علشان نضمن سلامتنا وسلامة غيرنا.