بنختار الفنان وبنقبل دخوله لحياتنا وبيشغل جزء منها، بنتابعه ونتعلق به، والموضوع ممكن يوصل إننا نحط صوره في كل مكان في الأوضة ونحضر له حفلات في أي مكان يروحه، وتفضل العلاقة دي لسنين وأنت مرتبط بالفنان ده وشايفه نجم في السما، وبسبب مواقف وآراء واتجاهات معينة بتبدأ تظهر عن الفنان ده، معاها بيحصلك صدمة فيه والوهج والحالة اللي حواليه بتبدأ تنطفي بالنسبة لك، بس الغريب إن الموضوع ده مع بعض الناس مش بيطول يعني ممكن يقاطعوه ويقاطعوا أعماله الفنية لمدة صغيرة وبعدين يرجعوا تاني للمتابعة، ومنهم اللي مش بيبقى بيقاطع من الأساس رغم ظهور مواقف للفنان مابيختلفش عليها حد، طب ليه بنفضل متابعين رغم بعض المواقف؟ بس تعالوا الأول نشوف احنا بنتابع الفنان وأخباره ليه؟
ليه بتابع الفنان من الأول؟
مش زي ما أنت فاكر إن السبب الأول لمتابعة الفنان هو حبه أو تقديرًا لأعماله، في أسباب بعضها ممكن يبقى نفسي، يعني مثلًا سبب متابعة أخبار فنان بالتحديد هو إن أخباره بتشكل مادة ترفيهية خفيفة وسهلة في الإنتاج، وإلى حد ما بعيدة عن المآسي وأخبار الكوارث والحروب والجرائم، وأحيانًا الناس بتتابع وبتستمر في المتابعة لسبب خفي وهو أنهم عايزين يشوفوا الجانب غير المشرق في حياته يمكن ده يرضيهم شوية من ناحية حياته، أنه عادي المشاكل عند كل الناس حتى النجم.
أو إن الفنان ده مرتبط معاهم بذكريات معينة وطفولة فمش بسهولة يقاطعوه خصوصًا لو الضرر مش واقع على الشخص اللي بيتفرج بشكل مباشر، أو متعلق بأعماله وبالنوع اللي بيقدمه خاصة لو النجم لامع ومش أي حد بيعرف يقدم أعمال زيه، وده بيقودنا لسؤال أهم.
هل احنا بنعتبره فنان بس ولا بناخده تركيبة على بعضها؟
في ناس بتعتبر المتابعة مش للشخص نفسه، للشخصية والدور اللي عامله وبشرط أساسي لو عمل دور حلو ممكن ينسيهم الشخص نفسه ويسرحوا مع الدور، وده يمكن راجع لنظرتنا في الأساس للفنان هل احنا بنعتبره فنان بس ولا فنان هناخده بالباكدج بتاعته بحياته الشخصية وبحلوه وبعيوبه ومواقفه اللي ممكن تكون خذلنا فيها قبل كده؟ ودي بيختلف فيها الناس، بس بالإجابة عن السؤال ده هتعرف إحنا ليه ممكن في لحظة نتابع ولحظة تانية نقاطع وهتبني عليها مواقفنا المؤقتة أو اللحظية تجاه الفنان.
آخر كلمة: ماتفوتوش قراءة: باية محي الدين: أيقونة التشكيل الجزائري وملهمة بيكاسو