في احتفاء وتكريم لواحدة من أهم سيدات مصر، تم منح وزيرة الهجرة وشئون المصريين بالخارج، نبيلة مكرم، جائزة المرأة العربية للمسئولية المجتمعية “الشخصية المبدعة والأكثر إنسانية”، خلال النسخة الرابعة من منتدى يوم المرأة العربية تحت عنوان “إبداع، ابتكار، تنمية.. بين الريادة والرقمنة”. وفي الحقيقة هي تستحق التكريم ده من زمان، لإنها عملت إنجازات ومجهودات ومبادرات كتير إنسانية ومجتمعية، وبمناسبة تكريمها، حبينا نتكلم عنها وعن إنجازاتها في سطور، عارفين إنها مش هتوافيها حقها.
مين هي نبيلة مكرم؟
اتخرجت من كلية الاقتصاد والعلوم السياسية جامعة القاهرة، واشتغلت في وزارة الخارجية سنة 1993 ومن بعدها بدأت تتدرج في المناصب؛ سكرتير تالت بمكتب مساعد وزير الداخلية للشئون الإدراية، وسكرتير تالت بسفارة مصر في دولة البرازيل، وسكرتير تاني بالقطاع الأسيوي، وسكرتير أول بإدارة المراسم بوزارة الخارجية، لحد ما بقيت نائب القنصل العام بإمارة دبي وهي دلوقتي وزيرة الدولة للهجرة وشئون المصريين بالخارج.
إنجازات كتير من 2015 لحد النهارده … ولسه مكملة
على مدار أكتر من سبع سنين كان لها بصمات مميزة ومبادرات علشان تربط المصريين الموجودين برا مصر ببلدهم الأم، وهي نجحت في ده:
- مبادرة “اتكلم عربي” واحدة من أهم المباردات اللي كان هدفها تعليم أطفال مصر لغتهم الأم وتعريفهم بالقيم والثقافة المصرية والحضارة العريقة، ودي تعتبر من أهم الخطوات أو المبادرات اللي اتعملت، لإن كتير من الأطفال المقيمين بالخارج بيبقى عندهم أزمة هوية أو بيحصلهم طمس للهوية لما بيكبروا وبيرجعوا مصر، ولو مابدأناش معاهم من دلوقتي، مش هنقدر نغرس فيهم حاجة لما يكبروا وهيفضلوا متمسكين باللي كبروا عليه.
- مبادرة “نورت بلدك” و”بداية ديجيتال”، اللي قدرت الوزارة من خلالهم إنها تشتغل على دمج المصريين اللي رجعوا من برا وكانوا متضررين من تداعيات أزمة كورونا، عن طريق إنها وفرت لهم فرص تدريب وتأهيل لسوق العمل.
- مبادرة “بيتك ومكانك” علشان تساعد المصريين اللي راجعين مصر إنهم يتواصلوا مع الجهات المختلفة في الدولة وفقًا لتخصصاتهم، والدولة تقدم لهم وظائف.
- مبادرة “خلينا سند لبعض” كانت في الدول اللي ماقدروش يرجّعوا منها العالقين بسبب ظروف الإغلاق، والمبادرة كانت بتقدم لهم كل المساعدات الممكنة.
- بتعتبر واحدة من أكبر الإنجازات اللي اتعملت هي مكافحتها في قضية الهجرة غير الشرعية، وكانت بتنظم حملات وفعاليات علشان تواجه الظاهرة دي، واتعمل حملات إعلانية في التلفزيون وفي الجرايد. وفي نفس الوقت، كانت بتقدم حلول للشباب عن طريق توفير فرص عمل وتدريب لهم في مجال الأعمال الفندقية والحرفية، ونتيجة لده، ماخرجش أي مركب غير شرعية من السواحل المصرية من سنة 2016.
وعلى مستوى المواقف الإنسانية، كان لها وقفات نشهد لها، وده لإنها مؤمنة إن الحكومة ماينفعش تنفصل عن الشعب إنسانيًا. مثلًا، في قضية الشاب المصري اللي تم الاعتداء عليه من واحد كويتي وضربه بالقلم والفيديو وقتها انتشر انتشار كبير، وسبب حزن وغضب والناس اعتبرت إنه فيه إهانة كبيرة، وفضلت نبيلة مكرم متابعة القضية لحد ما اتقبض على الكويتي واتحول الموضوع لجنحة، وطالبت نبيلة بمنع تداول الفيديو أكتر من كده حفاظًا على مشاعر المُعتدى عليه.
حتى قبل ما تتولى منصب الوزارة كان لها مواقف مميزة بتعبر عن إنسانية وشجاعة بيظهروا في الوقت الصح، زيّ موقفها مع البنت الإيطالية اللي رجعتها لجدها، وقت لما كانت بتشتغل في سفارة مصر في روما. رفعت نبيلة أكتر من قضية هناك علشان البنت ترجع لمصر ولحضن جدها، لدرجة إنها كانت بتترافع قدام القاضي علشان ترجع البنت لحد ما كسبت القضية، وبعد 15 سنة من رجوعها، شافت البنت تاني في مصر بالصدفة وقالت “كنا بنعيط لما شوفنا بعض”.
نبيلة مكرم كان لها مواقف قوية علشان ترجع حقوق لمقيمين في الخارج، وأخدت على عاتقها مسئولية كبيرة وكانت قد المسئولية.